Read Jamaican Patois Luuk 21 Bible Online

Luuk 21 - Jamaican Patois bible

Luuk 21

¹ Jiizas luk op an si di rich piipl dem a put iin fi dem sitn we dem a gi fi aafrin iina di aafrin baks.

² Im si wan puo uman, we ozban ded, a put iin tuu sent tu.

³ Jiizas se, “Mi a tel unu di chuut, da puo uman, we ozban ded, put iin muo dan di res a dem.

⁴ Aal a dem ya piipl gi fi dem aafrin outa wa dem av fi spier, bot da uman ya, iivn duo shi puo, shi gi evriting we shi av.”

⁵ Som piipl did a chat bout di priti stuon dem we priti op Gad ous an di iip a sitn dem we piipl gi Gad fi aafrin, wen Jiizas se,

⁶ “Di taim a-go kom wen no iivn wan stuon a-go lef pan tap a wan aneda. Aal a dem a-go get lik dong.”

⁷ Dem aks Jiizas se, “Tiicha, a wen aal dem sitn ya a-go apm? Wa kain-a sain wi fi luk fa fi shuo se dem suun apm?”

⁸ Jiizas se tu dem se, “Wach out, no mek nobadi fuul unu op. Kaaz uol iip a piipl a-go kom yuuz op yuuz op mi niem, an a se, ‘Mi a Krais, a mi Gad sen fi siev piipl’ an, ‘di taim fi Jiizas kom bak de nier.’ No fala dem.

⁹ Enitaim unu ier bout waar an se govament get ton uova, no fraitn. Dem sitn ya afi gwaan fos, bot di en naa go kom siem taim.”

¹⁰ Den Jiizas tel dem se: “Wan set a piipl a-go waar gens wan neks set a piipl, an wan kindom a-go fait gens wan neda kindom.

¹¹ Big ortkwiek a-go kom, an aal bout, fuud a-go shaat an aal kain-a siknis a-go kil aaf piipl; som torbl sitn a-go kom fram evn an piipl a-go fried.

¹² “Bifuo aal dem sitn ya apm, dem a-go grab unu an diil wid unu bad. Dem wi tek unu an an unu uova tu di liida dem fi di Juu dem choch an sen unu go a prizn. Dem a-go kyari unu go infronta king an liida, kaaz unu fala mi.

¹³ Dis a-go gi unu chaans fi tel dem di gud nyuuz.

¹⁴ No fret bout ou unu a-go ansa.

¹⁵ Mi wi gi unu di wod dem so unu wi nuo ou fi ansa, so non a unu enimi dem kyaahn tan op gens unu ar se unu rang.

¹⁶ Aal mada, faada, breda, fambili an fren, a-go sel unu out, an dem a-go kil som a unu.

¹⁷ Evribada a-go iet unu siek-a unu fala mi.

¹⁸ Bot dem kyaahn toch no iivn wan schraan a ier pan unu ed.

¹⁹ Uu tan op chrang fi mi no mata wa, wi siev dem laif.

²⁰ “Wen taim unu si se suoja soroun Jeruusilem, unu fi nuo se dischrokshan de nier.

²¹ Evribadi iina Judiya fi ron go op iina di mountn dem. Uu iina di siti fi kom out an uu de iina di konchri no fi kom a di toun.

²² Di taim wa rait dong wen Gad a-go ponish im piipl wuda don de ya.

²³ Wat a sitn iina dem taim de fi uman we av biebi iina beli an fi mada we av yong biebi! Piipl a-go sofa bad bad iina di lan, an Gad a-go ponish dem piipl ya.

²⁴ Dem enimi a-go yuuz suod kil aaf som a dem, an tek som a dem ton prizna a farin. Di piipl dem we a no Juu a-go ruul uova Jeruusilem an mek dem sofa til fi dem taim don.

²⁵ “Sain a-go de iina di son, di muun an di staar dem. Pan di ort, di piipl dem we a no Juu a-go twis an ton an no nuo wa fi du wen dem ier di sii a ruor.

²⁶ Piipl a-go kech dem fried an kin uova kaaz dem a-go wanda wa a-go apm tu di worl, kaaz evriting we de iina di skai a-go get shiek outa dem plies.

²⁷ Den dem a-go si di Man we Gad Pik a kom iina wan kloud an im a-go av powa an wan brait brait lait a shain roun im.

²⁸ Wen dem sitn de staat fi apm, tan op chriet an uol op unu ed kaaz di taim fi frii unu suun kom.”

²⁹ Jiizas tel dem dis tu, “Luk pan di fig chrii an aal di ada chrii dem.

³⁰ Enitaim dem staat gruo liif, unu nuo se soma suun kom.

³¹ So enitaim unu si se aal dem sitn de a apm, unu nuo se Gad kindom suun kom.

³² “Mi a tel unu dis an a chuu mi a taak, di piipl dem fram da taim ya naa ded til aal a dem sitn ya apm.

³³ Evn an ort naa go de bout fi eva, bot fi mi wod a-go laas fi eva.

³⁴ “Wach out an no spen di uol a unu taim a nyam an jringk, an a fret bout laif, ar da die de a-go kriip op an kech unu laik wan chrap.

³⁵ It a-go kom pan aal we a liv pan di ort.

³⁶ Aalwiez a wach, prie se unu wi kyan get we fram aal a wa a-go apm, an prie se unu kyan tan op infronta di Man we Gad Pik.”

³⁷ Evridie Jiizas tiich iina di yaad we Gad ous de, an a nait taim im go op a Mount Aliv.

³⁸ Aal a di piipl dem get op orli a maanin taim fi kom lisn Jiizas a Gad ous.