Read Jamaican Patois Luuk 22 Bible Online

Luuk 22 - Jamaican Patois bible

Luuk 22

¹ Di alidie we piipl nyam bred widout yiis an we did niem Paasuova, did suun kom

² an di ed priis an di Laa tiicha dem, did a chrai fain wan wie fi get rid a Jiizas anda di kwaiyat, kaaz dem did fried a di piipl dem.

³ Den Sietan go iina Juudas, we dem kaal Iskyariyat, im a did wan a Jiizas Twelv apasl dem.

⁴ So, Juudas go a di ed priis an di tap man dem we gyaad Gad ous fi taak bout ou im kuda sel out Jiizas an gi im uova tu dem.

⁵ Dem glad so til an pramis fi pie im.

⁶ Juudas mek baagin wid dem, an im wiet fi di chaans, wen di kroud no de de fi gi Jiizas uova tu dem.

⁷ Nou di alidie wen piipl nyam bred widout yiis did kom. Da taim de piipl did afi bon sakrifais wid di biebi shiip dem we get pik fi di Paasuova alidie.

⁸ Jiizas se tu Piita an Jan se, “Go luk bout di Paasuova fuud fi wi nyam.”

⁹ Dem aks Jiizas se, “Wich paat yu waahn wi fi go luk bout it?”

¹⁰ Jiizas ansa dem se, “Az unu go iina di toun, wan man we a kyari wan jog a waata wi miit unu. Fala im go a di ous we im a go,

¹¹ an tel di uona se, ‘Di tiicha se fi aks yu se: We di ges ruum de, we mi kyan nyam di Paasuova fuud wid mi speshal falara dem?’

¹² Im a-go kyari unu opstiez go iina wan big ruum we set op aredi. A de-so unu fi fiks op di fuud.”

¹³ Dem lef an fain evriting jos laik ou Jiizas did tel dem. An dem luk bout di Paasuova fuud.

¹⁴ Wen di taim kom fi dem nyam it, Jiizas an im apasl dem sidong a di tiebl.

¹⁵ Jiizas se tu dem se, “Unu no nuo ou mi did wel waahn da taim ya kom so mi kuda nyam da Paasuova fuud ya wid unu bifuo mi sofa.

¹⁶ Mi naa go nyam it agen til mi riich iina Gad kindom.”

¹⁷ Jiizas tek op di kop an gi Gad tangks. Den im se tu dem se, “Tek dis an shier it op mongks unu wan aneda.

¹⁸ Mi a tel unu dis mi naa go jringk wain agen, til Gad kindom kom.”

¹⁹ Jiizas tek op di bred, gi Gad tangks an brok it op gi dem, an se, “Dis a mi badi, we mi a gi op fi unu. Unu fi du dis fi memba mi.”

²⁰ A siem so wen dem don nyam, im tek di kop an se, “Da wain ya a di nyuu pramis wa Gad mek wid mi blod we a-go puor out fi unu.

²¹ Bot luk, di man we a-go sel mi out de rait ya-so a di tiebl wid wi.

²² It don disaid aredi ou di Man we Gad Pik a-go ded bot chobl fi di wan we sel im out.”

²³ Dem staat fi aks dem wan aneda, a wich wan a dem wuda du dat.

²⁴ Den di apasl dem staat kos bout wich wan a dem av di tap pozishan iina di gruup.

²⁵ Jiizas tel dem se, “Di piipl dem we a no Juu, fi dem king dem baas dem op fi mek dem du we dem waahn dem fi du; an dem de we iina powa se dem a ‘di wan we elp di piipl.’

²⁶ Bot unu no fi galang laka dem. Di wan we av di tap tap pozishan fi gwaan laik di wan we de a di batam, an di liida fi gwaan laik di sorvant.

²⁷ Tel mi sopm, uu aiya dan uu? Di wan we sidong a di tiebl ar di wan we a sorv? No di wan a di tiebl? Bot mi de ya mongks unu a sorv.

²⁸ Unu tan wid mi wen mi did a go chuu mi chobl dem.

²⁹ An nou mi a mek unu king, jos laik ou fi mi Faada mek mi king,

³⁰ so unu kyan nyam an jringk a mi tiebl iina mi kindom, sidong pan chuon, an joj Izrel twelv chraib dem.

³¹ “Saiman, Saiman, Sietan aks fi sib unu chuu chriena laik flowa.

³² Bot mi prie fi yu, Saiman, so yu no tap biliiv. An wen yu chos iina mi muo agen, elp yu breda dem fi chos iina mi tu.”

³³ Bot Saiman se “Laad, mi redi fi go wid yu a prizn an fi iivn ded wid yu tu.”

³⁴ Jiizas se tu Saiman se, “Piita, bifuo di ruusta kruo, yu wi se chrii taim se yu no nuo mi.”

³⁵ Den Jiizas aks dem se, “Di taim mi did sen unu widout moni, an tel unu no fi pak no bag ar kyari no ada slipaz, unu did shaat a notn?” Dem ansa Jiizas se, “Nuo wi neehn shaat a notn.”

³⁶ Jiizas tel dem se, “Nou, ef unu av moni kyari it wid unu, ef unu av wan bag kyari it tu, an ef unu naa no suod, sel unu jakit an bai wan.

³⁷ Mi a tel unu, it rait dong se, ‘An dem kaal out im niem wid aal di kriminal dem.’ Wa rait dong, afi apm. A mi it a taak bout an it a gwaan rait ya nou an it a-go don suun suun.”

³⁸ Im falara dem tel im se, “Laad, si tuu suod ya.” “Dat wi du,” Jiizas se.

³⁹ Jiizas go a Mount Aliv jos laik im aalwiez du, an im speshal falara dem did go wid im.

⁴⁰ Wen im riich de, Jiizas se tu dem se, “Prie se unu no fies notn we wi kaaz unu fi sin.”

⁴¹ Jiizas go wan said, no tuu faar fram dem an niil dong an prie,

⁴² “Faada, ef yu waahn fi dwi’it, tek da kop ya fram mi, bot ef a no dat yu waahn, aarait den.”

⁴³ Wan ienjel fram evn kom tu Jiizas an mek im chrang.

⁴⁴ Jiizas did a sofa an dat mek im prie aada. Im swet komiin laik blod a jrap a grong.

⁴⁵ Jiizas get op fram wich paat im did a prie. Im go bak tu im speshal falara dem, onggl fi si se dem a sliip. Dem did taiyad out kaaz aal a di sitn dem we Jiizas did tel dem, dem did a tek it wel aad.

⁴⁶ Jiizas aks dem, “Wa mek unu a sliip? Git op an prie man so unu no fies notn we wi kaaz unu fi sin.”

⁴⁷ Wen Jiizas did stil a taak, aal av a sodn wan kroud kom dong. Wan a Jiizas twelv apasl dem, di wan we niem Juudas, did a liid dem. Im go fi kis Jiizas,

⁴⁸ bot Jiizas aks im se, “Juudas, yu a go yuuz wan kis an sel out di Man we Gad Pik?”

⁴⁹ Jiizas speshal falara dem si wa a go apm an se, “Laad, wi fi tek wi suod an fait dem?”

⁵⁰ Nou, di liida fi di priis dem sorvant did de de an wan a Jiizas falara dem tek im suod chap aaf im rait iez.

⁵¹ Jiizas se, “Unu tap it!” Den Jiizas toch di man iez an fiks it bak.

⁵² Jiizas se tu di ed priis dem, di man dem we inchaaj a di gyaad dem fi Gad ous an di elda dem we kom tu im, “A kom unu kom wid suod an big tik fi ares mi laik mi a oul tiif an mordara?

⁵³ Evridie mi de a Gad ous wid unu, an unu neva ares mi. Bot dis a fu’unu taim an di taim wen di wan we ruul uova daaknis a wok.”

⁵⁴ Dem grab Jiizas, an tek im we go a di liida fi di priis dem ous. Piita fala dem bot no tuu kluos.

⁵⁵ Den dem bil wan faiya iina di migl a di kuotyaad an sidong tugeda, an Piita sidong wid dem.

⁵⁶ Wan sorvant gyal si Piita a sidong iina di faiya-lait. Shi luk pan im gud an se, “Da man ya did de mongks im tu!”

⁵⁷ Bot Piita se a lai shi a tel. “Uman, mi no nuo im,” Piita se.

⁵⁸ Likl lieta sumadi els si Piita an se, “Yu a wan a dem.” Piita se, “Luk ya man! Mi a no wan a dem!”

⁵⁹ Bout wan owa afta dat wan neda wan taak out chrang se, “Mi shuor se da man ya a wan a im speshal falara dem, kaaz im kom fram Gyalalii tu.”

⁶⁰ Piita se, “Man, mi no nuo we yu a chat bout!” Siem taim, Piita a chat, di ruusta kruo.

⁶¹ Di Laad ton an luk chriet pan Piita an im memba wa di Laad did se tu im, “Bifuo di ruusta kruo, yu wi se yu no nuo mi chrii taim.”

⁶² Piita go outa duor an baal, an baal, an baal so til.

⁶³ Di man dem we did a gyaad Jiizas staat laaf aafa im an biit im op.

⁶⁴ Dem put klaat uova im yai an se, “So yu se yu a prafit, so tel wi, uu lik yu?”

⁶⁵ An dem se aal saat a ada torbl sitn gens im.

⁶⁶ Wen maanin kom, di gruup we mek op a di ed priis an di Laa tiicha dem, miit op, an gi aada fi Jiizas kom bifuo dem.

⁶⁷ Dem se, “Ef yu a di Krais, tel wi.” Jiizas ansa, “Ef mi tel unu, unu naa go biliiv mi,

⁶⁸ an ef mi aks unu, unu naa go ansa.

⁶⁹ Fram nou aan, di Man we Gad Pik a-go sidong a di rait an a Gad, we powaful.”

⁷⁰ Aal a dem aks im se, “So yu a Gad pikni?” Jiizas ansa an se, “A yu se so.”

⁷¹ Den dem se, “Wa wi waahn muo witnis fa? Wi ier it kom outa fi’im uona mout.”