Read Jamaican Patois Luuk 23 Bible Online

Luuk 23 - Jamaican Patois bible

Luuk 23

¹ Den di uol a dem get op an tek Jiizas kyari im go a Pailat.

² Dem staat tel bier lai pan Jiizas se, “Wi kech da man ya a chrai fi mek di piipl dem go gens di govament. Im waahn wi fi tap pie taks tu Siiza di Ruoman ruula an kliem se im a Krais — bout im a King.”

³ Pailat aks Jiizas se, “Yu a di Juu dem king?” Jiizas ansa im se, “A yu se so.”

⁴ Den Pailat tel di ed priis dem an di kroud se, “Mi no fain no riizn fi chaaj da man ya.”

⁵ Bot dem stil a push, “Im rail op di piipl aal uova Judiya wid we im tiich. Im staat iina Gyalalii an kom aal di wie op ya-so wid it.”

⁶ Afta Pailat ier dis, im aks ef di man kom fram Gyalalii.

⁷ Az im fain out se Jiizas de anda Erad ruul, im sen Jiizas go a Erad, we did iina Jeruusilem dem taim de.

⁸ Wen Erad si Jiizas, im api so til, kaaz fi wan lang taim im did waahn si im. Fram wa Erad ier bout Jiizas, Erad uop fi si Jiizas wok som kain-a mirikl.

⁹ Im aks im uol iip a kwestiyan, bot Jiizas no ansa non a dem.

¹⁰ Di ed priis dem an di Laa tiicha dem did tan op de an a kos se Jiizas du uol iip a bad sitn.

¹¹ Afta Erad an im suoja dem laaf aafa Jiizas an tek im mek preke, dem jres im op iina wan priti ruob, an sen im go baka Pailat.

¹² Da die de Erad an Pailat ton big fren, kaaz bifuo da taim ya dem did iet dem wan aneda.

¹³ Pailat kaal op di ed priis dem, liida dem an piipl dem

¹⁴ an se, “Unu kyari da man ya kom tu mi an kliem se im a kaaz di piipl dem fi go gens di govament. Mi kwestiyan im infronta unu an si se im no du non a di sitn dem we unu a bliem im fa.

¹⁵ Erad neva si we im du notn rang niida, kaaz im sen im bak tu mi. Unu kyaahn si se da man ya no du notn fi wi kil im.

¹⁶ So, mi wi jos ponish im an let im go.”

¹⁸ Di uol kroud shout out, “Kil Jiizas! Gi wi Barabas!”

¹⁹ (Barabas did iina prizn kaaz im liid piipl fi fait gens dem ruula, an im did kil piipl.)

²⁰ Pailat did waahn let go Jiizas, so im taak tu di kroud agen.

²¹ Bot dem kip aan a shout, “Yes! Kil im pan di kraas! Kil im pan di kraas!”

²² Pailat aks dem agen — dat mek chrii taim. “Wa mek? Wa im du rang? Mi no fain se im du notn rang fi wi kil im. Mi wi ponish im an den let im go.”

²³ Bot dem no tap shout out se dem fi kil Jiizas pan di kraas; dem shout so til dem win.

²⁴ So, Pailat gi dem wa dem waahn.

²⁵ Im let go di man we dem did aks fa. Di wan we did mek piipl fait gens dem ruula an we did morda piipl. An Pailat gi dem Jiizas fi du wa dem waahn du wid im.

²⁶ Siem taim dem a liid we Jiizas, dem grab Saiman we kom fram Sairiin, im did a kom fram konchri. Dem fuos im fi waak baka Jiizas an kyari di kraas.

²⁷ Uol iip a piipl fala baka Jiizas, an di uman dem ban dem beli an a baal fi im.

²⁸ Jiizas ton roun an se tu dem se, “Uman fram Jeruusilem, no baal fi mi. Baal fi unuself an fi unu pikni dem.

²⁹ Kaaz di die a-go kom wen piipl gweehn se, ‘Uman we kyaahn av pikni, uman we neva av pikni an uman we neva nors no biebi — a dem bles!’

³⁰ Den “ ‘dem wi tel di mountn dem, “Jrap pan wi!” an dem wi tel di il dem, “Kova wi op!” ’

³¹ Ef piipl du dem sitn ya wen chrii griin, wa a-go apm wen it jrai op?”

³² Dem kyari tuu kriminal fi go kil dem siem taim wid Jiizas.

³³ Wen dem kech a di plies we niem Di Skol, dem niel op Jiizas an di kriminal dem pan di kraas dem, wan pan di rait-an-said a Jiizas an di ada wan pan im lef.

³⁴ Jiizas se, “Faada Gad paadn dem, dem no nuo wa dem a du.” Den dem chuo dais fi shier op Jiizas kluoz.

³⁵ Di piipl dem we tan op wan said a wach an di ruula dem did a skaan Jiizas. Dem se, “Im siev ada piipl, mek im siev imself, ef im a riili Krais.”

³⁶ Di suoja dem kom a tek Jiizas ton preke a gi’im sowa wain

³⁷ an a se, “Ef yu a di King fi di Juu dem, siev yuself.”

³⁸ Wan sain did iivn uova Jiizas ed we se, “DIS A DI JUU DEM KING.”

³⁹ Wan a di kriminal dem we did eng op saida Jiizas, staat kos im se, “Yu a no di Krais? Siev yuself an siev wi tu!”

⁴⁰ Bot di ada kriminal set im chriet an se, “Yu no fried a Gad, laik ou yu a ded laik im?

⁴¹ Dem a ponish di tuu a wi fi wa wi du, so wi a get wa wi dizorv. Bot da man ya no du notn rang.”

⁴² Den im se, “Jiizas, memba mi wen yu kom iina yu kindom.”

⁴³ Jiizas se tu im se, “Mi a tel yu di chuut, tide yu a-go de wich paat mi de iina Paradais.”

⁴⁴ Nou a did bout migl die an di uol plies ton daak daak rait bak til bout chrii aklak.

⁴⁵ Afta it get daak, an di big tik kortn iina Gad ous plit iina tuu,

⁴⁶ Jiizas baal out loud, “Faada, mi put mi spirit iina yu an.” Az Jiizas se dis so, im bluo im bret wan laas taim an ded.

⁴⁷ Wen di ed suoja fi di aami, si wa apm, im priez Gad an se, “Fi riil da man ya mos a wan gud man we neva du notn rang!”

⁴⁸ Wen aal a di piipl we gyada si wa apm, dem go we wid pien iina dem aat.

⁴⁹ Bot di piipl dem we nuo Jiizas, an di uman dem we fala im fram Gyalalii, tan wan said a wach.

⁵⁰ Yu did av wan man we niem Juozif, we bilang tu di gruup we mek op a di ed priis an di Laa tiicha dem. Im did a wan gud an anis man,

⁵¹ an neva did go fi wa di res a kounsl memba dem did mek op dem main fi du. Juozif did kom fram Arimatiya, wan toun iina Judiya an im did a wiet fi Gad kindom.

⁵² Im go a Pailat go aks im fi Jiizas badi.

⁵³ Im tek dong Jiizas badi an rap it op iina linin klaat an put im iina wan tuum we dig iina wan rak we nobadi neva beri iina yet.

⁵⁴ A did di die wen di Juu dem wuda get tingz redi fi di Sabat we did bout fi staat.

⁵⁵ Di uman dem we kom wid Jiizas fram Gyalalii fala Juozif an si di tuum an ou Jiizas badi did pudong iina it.

⁵⁶ Den dem go a dem yaad go luk bout spais an porfyuum. Bot pan di Sabat, dem res kaaz a dat Muoziz Laa se dem fi du.