Read Jamaican Patois Luuk 24 Bible Online

Luuk 24 - Jamaican Patois bible

Luuk 24

¹ Orli, orli Sonde maanin, di uman dem go a di tuum wid di spais we dem did luk bout.

² Dem fain di stuon ruol we fram fronta di tuum.

³ Dem go iin de, bot dem no fain Jiizas badi.

⁴ Siem taim wen dem a wanda wa apm, tuu man iina kluoz we brait laik lait kom tan op saida dem.

⁵ Di uman dem aat riich a dem mout an dem eng dong dem ed kaaz dem so fraitn. Bot di man dem se tu dem se, “Wa mek unu a luk fi di wan we a liv mongks di wan dem we ded?

⁶ Im no de ya, im kom bak alaiv! Memba wa im tel unu wen im did mongks unu iina Gyalalii.

⁷ ‘Dem a-go tek di Man we Gad Pik gi wikid piipl we a-go kil im pan di kraas bot im a-go kom bak alaiv chrii die lieta.’ ”

⁸ Den dem memba we Jiizas did tel dem.

⁹ Afta dem kom bak fram di tuum, di uman dem tel Jiizas ilevn apasl an aal di res a falara dem wa did apm.

¹⁰ Nou a did Mieri Magdaliin, Juowana, Mieri we a Jiemz mada, an di ada uman dem, uu did tel di apasl dem wa dem si.

¹¹ Bot di apasl dem neva biliiv di uman dem, kaaz we dem did a se soun laik fuulinish.

¹² Piita get op an ron go a di tuum. Im ben dong, bot di onggl ting im si a di piis a linin klaat wan, so im go we, a wanda wa apm.

¹³ Di siem die tuu a Jiizas falara dem did a go a wan dischrik niem Emiyos, bout sevn mail fram Jeruusilem.

¹⁴ Dem did a chat bout evriting wa apm.

¹⁵ Siem taim dem a chat an aal a aagyu wid dem wan aneda, Jiizas kom op an staat waak wid dem,

¹⁶ bot dem kudn pik op se a im.

¹⁷ Jiizas aks dem se, “Wa unu a taak bout?” Dem tap waak, dem fies sad.

¹⁸ Di wan niem Kliiyopas, se tu Jiizas se, “Yu mosi di onggl sumadi we kom iina Jeruusilem we no nuo bout di sitn dem wa apm dem laas kopl a die ya.”

¹⁹ Jiizas aks dem, “Wa kain-a sitn?” Dem se tu im se, “Bout Jiizas fram Nazaret. Im did se an du som powaful sitn yu si we shuo aal di piipl dem se im a wan a Gad prafit dem.

²⁰ Di ed priis dem an wi ruula dem an im uova so dem kuda kil im, an dem niel im op pan wan kraas.

²¹ Bot wi did a uop se im a did di wan fi frii Izrel. Nou a chrii die sins aal a dis apm.

²² Bot no onggl dat, som a di uman dem we fala Jiizas laik wi, shak wi. Dem go a di tuum orli dis maanin

²³ bot dem no fain di badi. Dem kom tel wi se, dem si ienjel we tel dem se Jiizas alaiv.

²⁴ Som a di man dem go an fain di tuum uopm an emti jos laik ou di uman dem did se.”

²⁵ Jiizas se tu dem se, “Ou unu fuul-fuul so, unu aat so tof unu no waahn fi biliiv aal a wa di prafit dem se!

²⁶ Unu no nuo se di Krais afi sofa dem sitn de bifuo Gad tek im op iina evn an ana im?”

²⁷ Jiizas eksplien tu dem aal a di sitn dem we did rait dong bout im, fram wa Muoziz did se tu aal a wa di ada prafit dem did se.

²⁸ Wen dem riich nier di dischrik we dem a go, Jiizas gwaan laik se im did a go forda.

²⁹ Bot dem beg im, “Luk di die aalmuos don, an nait a kom, so tan wid wi.” So Jiizas tan wid dem.

³⁰ Im sidong a di tiebl wid dem. Jiizas tek bred, gi tangks, brok it an gi dem.

³¹ Den dem pik op se Jiizas a di man dem did a taak tu bot siem taim — braps, im disapier!

³² Dem aks dem wan aneda, “Wi neehn fiil sitn a bobl iina wi aat wen im did a chat wid wi pan di ruod an a eksplien tu wi wa Gad wod se?”

³³ Dem get op an go baka Jeruusilem siem taim. An dem fain di Ilevn an dem we did gyada wid dem

³⁴ an se, “A chuu! Di Laad kom bak alaiv an mek Saiman si’im.”

³⁵ Den dem tel dem wa apm pan di ruod tu Emiyos, an ou a wen Jiizas a brok di bred gi dem, dem pik op se a im.

³⁶ Siem taim dem a chat bout aal a dis, Jiizas imself tan op wid dem an se, “Piis!”

³⁷ Im falara dem fraitn, kaaz dem tingk dem a si wan dopi.

³⁸ Jiizas se tu dem se, “Wa mek unu fraitn? Wa mek unu no biliiv?

³⁹ Luk pan mi an an fut dem. A mi! Toch mi an si. Dopi no av skin an buon, laik mi.”

⁴⁰ Afta Jiizas se dis, im shuo dem im an an im fut dem.

⁴¹ Dem glad so til dem kudn biliiv we dem a si. So im aks dem se, “Unu na’av notn fi iit?”

⁴² Dem gi im piis a ruos fish,

⁴³ an Jiizas tek it an nyam it infronta dem.

⁴⁴ Jiizas tel dem se, “Wen mi did de mongks unu, mi tel unu bout aal a dem sitn ya. Mi tel unu se evriting we rait bout mi iina Muoziz Laa, wa di prafit dem se an we iina di Saamz tu did afi kom chuu.”

⁴⁵ Den Jiizas uopm op dem main an mek dem andastan we Gad wod se.

⁴⁶ Jiizas tel dem se, “Dis a wa rait dong: Krais a-go sofa, im a-go ded an kom bak afta chrii die,

⁴⁷ an iina fi mi niem unu fi priich an tel di piipl dem we a no Juu fi ton tu Gad an get paadn fi we dem du rang. Staat rait ya-so iina Jeruusilem.

⁴⁸ Unu mos tel piipl bout evriting we apm.

⁴⁹ An luk, mi a sen unu we mi Faada pramis fi gi unu, bot tan iina di siti til unu get powa fram evn.”

⁵⁰ Jiizas liid dem go outa Betani. Im lif op im an an bles dem.

⁵¹ Siem taim Jiizas a bles dem, im get tek op iina evn an im lef dem.

⁵² Afta di falara dem worship Jiizas dem go baka Jeruusilem api so til.

⁵³ An dem eva de a Gad ous a priez im.