Read Jamaican Patois Luuk 3 Bible Online

Luuk 3 - Jamaican Patois bible

Luuk 3

¹ A fiftiin ier nou Taibiiriyos did a Ed Ruula iina Ruom, im did av Ponchos Pailat a ron Judiya, Erad Antipas a ron Gyalalii, im breda Filip a ron Aituuriya an Chrakonaitis an Lizaniya did a ron Abiliin.

² Anas an Kaiyafas a did liida fi di priis dem. Iina da siem taim de Jan, Zakaraiya bwai pikni, did de iina di dezot an get wan mesij fram Gad.

³ Im go aal roun Jaadn a priich se di piipl dem fi ton we fram dem sin an get baptaiz, an Gad wi paadn dem fi aal di rang we dem du.

⁴ A im Aizaiya, di prafit, did a rait bout wen im se: “Sumadi a shout iina di dezot, ‘Klier di wie fi di Laad kom chuu, mek di chrak we im fi waak pan chriet.

⁵ Evri goli a-go riez op, An evri moutn an il a-go mash dong. Evri ruod we twis an ton a-go chrietn out, an evri chrak a-go sumuud out.

⁶ An evribadi a-go si ou Gad siev piipl.’ ”

⁷ Wan iip a piipl did kom fi Jan baptaiz dem, im se tu dem se, “Unu siniek pikni unu! A uu waan unu fi ron we fram di jojment we a kom?

⁸ Du di sitn dem we shuo se unu riili tap sin. An no bada staat tingk tu unuself se unu sief, an se, ‘A Iebriyam a wi faada.’ Mek mi tel unu sopm, Gad kyan mek pikni fi Iebriyam outa dem rakstuon ya ef im waahn!

⁹ Rait ya nou di aks de a di chrii ruut. An evri wan a di chrii dem we naa bier gud fruut a-go chap dong an bon op iina faiya.”

¹⁰ Di kroud aks Jan, “So wa wi fi du den?”

¹¹ Im se tu dem se, “Ef yu av tuu shot yu fi gi sumadi wan an ef yu av fuud yu fi du di siem ting.”

¹² Taks kalekta kom fi get baptaiz tu. “Tiicha,” dem aks Jan, “wa wi fi du?”

¹³ Jan tel dem, “No kalek no muo dan we yu fi kalek.”

¹⁴ Den som suoja aks Jan, “So wa bout wi, wa wi fi du?” Jan ansa, “No bad op piipl an tek we dem moni ar tel lai pan dem fi get it niida. Unu fi satisfai wid di pie we unu get.”

¹⁵ Dem taim de piipl did a riili luk fi di wan we Gad a sen fi siev dem, an a wanda iina dem main ef Jan a di Krais.

¹⁶ So im se tu dem, “Mi baptaiz unu iina waata. Bot sumadi we muo impuotant dan mi a kom an mi no iivn gud inof fi pul di chrap pan im slipaz. Im wi baptaiz unu iina di Uoli Spirit an faiya.

¹⁷ Im av im faak iina im an, redi fi riek op di fluor wich paat di grien chrash out. Im a-go gyada op di grien an put it iina im bochri, bot im a-go bon di chrash iina wan faiya we kyaahn out.”

¹⁸ An Jan yuuz uol iip a ada wod fi gi gud nyuuz tu di piipl dem.

¹⁹ Bot afta Jan tan op tu Erad Antipas, di ruula, an tel im ou im rang fi marid im breda waif, Eruodiyas, an bout aal di ada wikidnis dem we im du,

²⁰ Erad du wan wosa sitn, im lak op Jan iina prizn.

²¹ Wen aal a di piipl dem did a get baptaiz, Jiizas kom fi get baptaiz tu. Wen im did a get baptaiz an a prie evn uopm op,

²² an di Uoli Spirit kom dong pan Jiizas iina di shiep a wan dov. An wan vais fram evn se, “Yu a fi mi wan dege-dege bwai, mi lov yu an yu mek mi aat glad.”

²³ Nou, Jiizas did bout toti wen im staat priich. Piipl did tingk se Jiizas a fi Juozif bwai. Juozif a did Eli pikni,

²⁴ Eli faada a did Matat, Matat a did Liivai pikni, Liivai faada a did Melki, Melki a did Janai pikni, Janai faada a did Juozif,

²⁵ Juozif a did Matataiyas pikni, Matataiyas faada a did Iemos, Iemos faada a did Nieyom, Nieyom a did Eslai pikni, Eslai faada a did Nagai,

²⁶ Nagai a did Maat pikni, Maat faada a did Matataiyas, Matataiyas a did Semiyen pikni, Semiyen faada a did Jozek, Jozek a did Juoda pikni

²⁷ Juoda faada a did Juonan, Juonan a did Resa pikni, Resa faada a did Zeruubabel, Zeruubabel a did Shiyaltiyel pikni, Shiyaltiyel faada a did Neri,

²⁸ Neri a did Melki pikni, Melki faada a Adi, Adi a did Kosam pikni, Kosam faada a did Elmadam, Elmadam a did Or pikni,

²⁹ Or faada a did Jashwa, Jashwa a did Eliyiiza pikni, Eliyiiza faada a did Jorim, Jorim a did Matat pikni, Mata faada a did Liivai

³⁰ Liivai a did Simiyan pikni, Simiyan faada a did Juuda, Juuda a did Juozif pikni, Juozif faada a did Juonam, Juonam a did Elaiyakim pikni,

³¹ Elaiyakim faada a did Miliya, Miliya a did Mena pikni, Mena faada a did Matata, Matata a did Nietan pikni, Nietan faada a did Dievid,

³² Dievid a did Jesi pikni, Jesi faada a did Obed, Obed a did Buowaz pikni, Buowaz faada a did Siela pikni, Siela a did Nieshan pikni,

³³ Nieshan faada a did Aminadab, Aminadab a did Ram pikni, Ram faada a did Ezran, Ezran a did Perez pikni, Perez faada a did Juuda,

³⁴ Juuda a did Jiekob pikni, Jiekob faada a did Aizak, Aizak a did Iebriyam pikni, Iebriyam faada a did Tera, Tera a did Nieyar pikni,

³⁵ Nieyar faada a did Serog, Serog a did Ruu pikni, Ruu faada a did Peleg, Peleg a did Eba pikni, Eba faada a did Shiila,

³⁶ Shiila faada a did Kienan, Kienan a did Arfaksad pikni, Arfaksad faada a did Shem, Shem a did Nowa pikni, Nowa faada a did Lamek,

³⁷ Lamek a did Metyuuzila pikni, Metyuuzila faada a did Iinok, Iinok a did Jared pikni, Jared faada a did Mayalalel, Mayalalel a did Kienan pikni,

³⁸ Kienan faada a did Iinos, Iinos a did Set pikni, Set faada a did Adam. Adam a did Gad pikni.