Read Jamaican Patois Luuk 4 Bible Online

Luuk 4 - Jamaican Patois bible

Luuk 4

¹ Afta Jiizas get baptaiz, di Uoli Spirit tek kanchuol a im an mek im go iina di dezot.

² Im did de de fi faati die an fi di uol taim, di devl chrai aad aad fi mek im du rang. Nou, Jiizas did onggri bad kaaz fi di faati die im neehn nyam notn.

³ Di devl se tu Jiizas, “Ef yu a Gad Bwai Pikni, tel da rakstuon ya fi ton bred.”

⁴ Jiizas ansa, “It rait dong iina Gad wod se, ‘Man no liv pan bred wan.’”

⁵ Di devl kyari Jiizas op a wan taal taal plies an bifuo im kuda kwint so, im shuo im aal di konchri dem iina di worl.

⁶ Im tel Jiizas se, “Mi wi gi yu powa uova aal a dem konchri ya an aal a di nais sitn we kom wid dem, kaaz mi get dem an mi kyan gi enibadi mi waahn.

⁷ Ef yu worship mi, aal a it a fi yu.”

⁸ An Jiizas ansa im, “It rait dong se, ‘Yu fi worship di Laad we a yu Gad, an a im wan yu fi sorv.’ ”

⁹ Den di devl kyari Jiizas go a Jeruusilem an mek im tan op pan di taalis paat a Gad ous. “Ef yu a Gad Bwai Pikni,” di devl se, “jomp aafa ya-so.

¹⁰ Kaaz it rait dong se, ‘Gad wi tel im ienjel dem fi tek gud kier a yu,’ an dat

¹¹ ‘dem wi kech yu, so yu no lik op yu fut pan rakstuon.’”

¹² Jiizas ansa im se, “It rait dong se, ‘No tes di Laad we a yu Gad.’”

¹³ Afta di devl don chrai aad aad fi mek Jiizas du rang, im lef im til im get wan neks chaans.

¹⁴ Jiizas go baka Gyalalii anda di Spirit powa, an nyuuz bout im staat fi pred so til piipl we liv nier Gyalalii ier bout im.

¹⁵ Im tiich iina di Juu dem choch, an evribadi taak gud bout im.

¹⁶ Wen Jiizas riich a Nazaret, di plies we paat im gruo op, im go iina di Juu dem choch pan di Sabat, laik im aalwiez du. Im tan op fi riid

¹⁷ an dem gi im di ruol op buk we di prafit Aizaiya rait. Im ruol it out an fain di paat we se:

¹⁸ “Di Spirit a di Laad de pan mi, kaaz im pik mi out fi kyari gud nyuuz go gi puo piipl. Im sen mi fi mek di prizna dem nuo se dem a-go frii, fi mek blain piipl nuo se dem a-go si agen, fi mek piipl we a sofa nuo se dem naa go sofa fi eva.

¹⁹ An im pik mi out fi mek piipl nuo se dis a di taim wen di Laad a-go siev im piipl dem.”

²⁰ Wen Jiizas don, im ruol op bak di buk gi dem an sidong. Evribadi we iina di Juu dem choch yai did faasn pan im,

²¹ an Jiizas staat fi tel dem se, “Tide tide, aal a we unu jos ier, kom chuu.”

²² Evribadi taak gud bout im an dem fraitn fi ier di nais sitn dem we im se. “Wiet! No Juozif bwai dis?” dem se.

²³ Jiizas se tu dem, “Uol taim piipl yuus tu se, ‘Dakta, kyuor yuself.’ Mi nuo se no tuu lang fram nou unu a-go tel mi di siem sitn. Unu a-go tel mi se, ‘Di siem sitn dem we wi ier se yu du iina Kyaporniyom du dem rait ya-so wich paat yu kom fram.’ ”

²⁴ “Mek mi tel unu dis.” Jiizas se, “Non a di prafit dem neva get rispek fram di piipl dem we dem baan an gruo mongks.

²⁵ A chuu ting se, nof uman we ozban ded did de a Izrel iina Ilaija taim. Dem taim de no rien neehn faal fi chrii an a aaf ier an bad bad staavieshan did de aal uova di konchri.

²⁶ Bot Gad neva sen Ilaija go a non a dem. Gad onggl sen im go wan plies niem Zarifat iina Saidan tu wan uman we ozban ded.

²⁷ Siem ting did apm a Izrel iina di taim a Ilaisha, di prafit. Uol iip a piipl did av wan siknis we mek dem skin fasi-fasi, bot a onggl di Siriyan we niem Nieman get iil.”

²⁸ Aal di piipl dem iina di Juu dem choch beks wen dem ier dis.

²⁹ Dem get op, ron Jiizas outa di toun, an kyari im go a di ej a di il wich paat di toun de fi fling im uova it.

³⁰ Bot Jiizas jos slip chuu di kroud an go bout im bizniz.

³¹ Den Jiizas go dong a Kyaporniyom, wan toun iina Gyalalii, an staat fi tiich di piipl pan di Sabat.

³² Di wie ou im tiich shak dem, kaaz im mesij shuo se im nuo we im a taak bout.

³³ Wan man wid wan diiman iina im, did de iina di Juu dem choch. Im baal out pan di tap a im vais.

³⁴ “Cho! Jiizas a Nazaret we yu waahn wid wi? A kom yu kom fi kil wi aaf? Mi nuo uu yu bi. Yu a di Uoli Wan we kom fram Gad!”

³⁵ “Kiba yu mout!” Jiizas se iina wan siiros vais. “Kom outa di man!” Di diiman fling dong di man fronta evribadi an kom out bot neva ort di man.

³⁶ Aal a di piipl dem shak an se tu dem wan aneda, “Bot a wa dis ya? Im av di rait an di powa fi aada diiman fi kom outa piipl an dem kom out!”

³⁷ An di nyuuz bout Jiizas pred aal bout di plies.

³⁸ Wen Jiizas lef di Juu dem choch an go a Saiman yaad, Saiman mada-in-laa did av ai fiiva, so dem aks Jiizas fi elp ar.

³⁹ So Jiizas tan op an tel di fiiva fi tap, an di fiiva brok. Shi get op siem taim an staat luk aafa dem.

⁴⁰ Wen di son did a go dong, di piipl dem we av sumadi we sik, kyari dem kom a Jiizas. Im put im an pan evri wan a dem an mek dem beta, no mata wa dem did sik wid.

⁴¹ Diiman kom outa nof piipl an a shout, “Yu a Gad pikni!” Dem did nuo se im a di Krais, so Jiizas mek dem kyaahn se notn.

⁴² Di neks maanin Jiizas go wan plies wich paat nobadi neehn de. Aal dem taim de, di piipl did a luk fi im aad aad an wen dem du fain im, dem chrai fi mek im no go we.

⁴³ Bot Jiizas tel dem se, “Mi afi go gi di gud nyuuz bout Gad kindom tu di ada toun dem, kaaz a dat Gad sen mi fi du.”

⁴⁴ An so Jiizas gwaan priich iina di Juu dem choch dem we de iina Judiya.