Read Jamaican Patois Luuk 5 Bible Online

Luuk 5 - Jamaican Patois bible

Luuk 5

¹ Wan die, Jiizas did tan op a liek Genesaret an piipl did a kroud roun im fi lisn we Gad wod se.

² Wen im luk im si tuu buot pan di liek-said. Di fishaman dem did lef dem de an did a wash dem net.

³ So Jiizas go iina Saiman buot, an aks im fi kyari di buot go out likl muo iina di waata. Den Jiizas sidong an tiich di piipl dem.

⁴ Afta Jiizas don taak, im se tu Saiman, “Go out iina diip waata, an chuo out di net fi kech fish.”

⁵ Saiman ansa, “Tiicha, wi wok aad uol nait an wi no kech notn. Bot sins yu se so, mi wi du wa yu se.”

⁶ Wen di fishaman dem we did a wok wid Saiman du we Jiizas se, dem kech so moch fish dem net staat bos op.

⁷ So di fishaman dem kaal dem brejrin dem iina di ada buot fi kom elp dem, an di tuu buot dem ful so til dem staat singk.

⁸ Wen taim Saiman Piita si aal a dis, im jrap dong a Jiizas fut an se, “Kip we fram mi Laad kaaz mi a wan man we du nof rang!”

⁹ Saiman an aal a di man dem we did de de wid im shak wen dem si di iip a fish we dem kech.

¹⁰ Tuu a Saiman brejrin dem we did fraitn tu, a Jiemz an Jan, Zebidii bwai dem. Den Jiizas se tu Saiman, “No fried, fram nou aan, yu naa go kech fish, yu a-go kech piipl.”

¹¹ So dem pul dem buot pan di liek-said, lef evriting an fala Jiizas.

¹² Wan taim wen Jiizas did iina wan toun, wan man kom tu im we av wan siknis we mek im skin fasi-fasi. Wen im si Jiizas, im go dong pan im nii, put im fies a grong an beg im se, “Laad, ef yu waahn fi kyuor mi an mek mi kliin, yu av di powa fi dwi’it.”

¹³ Jiizas put out im an toch di man an se, “Mi waahn yu fi get kliin. Gwaan yu beta nou!” An siem taim di man skin get beta.

¹⁴ Jiizas tel im no fi tel nobadi, im se, “Jos gwaan go shuo yuself tu di priis an kyari di sakrifais we Muoziz Laa se yu fi gi wen yu skin get beta. Dat wi shuo evribadi se yu get kliin.”

¹⁵ Bot nyuuz bout Jiizas pred muo, an kroud an kroud a piipl kom fi ier im an fi get kyuor fram dem siknis.

¹⁶ Bot uol iip a taim Jiizas go we a wan plies we im kuda tan bai imself an prie.

¹⁷ Wan die wen Jiizas did a tiich, som Farisii an som a di Laa tiicha dem did sidong a lisn tu im. Dem kom fram evri dischrik iina Gyalalii, Judiya an Jeruusilem. Pan da die de Gad gi Jiizas di powa fi mek di sik piipl dem beta.

¹⁸ Jiizas did a tiich wen som man kom de wid dem kripl fren pan wan chrecha. Dem chrai fi kyari im iina di ous, fi put im infronta Jiizas.

¹⁹ Siek-a di kroud, dem kudn du it, so dem klaim op pan di ous tap an let im dong chuu di ruuf. Dem put im rait iina di migl a di kroud, infronta Jiizas.

²⁰ Wen Jiizas si ou dem biliiv iina im, im tel di kripl man se, “Fren, mi paadn yu fram aal a yu sin dem.”

²¹ Di Farisii an di Laa tiicha dem staat se tu demself se, “A uu im tingk im bi, kom a disrispek Gad! No Gad wan kyan paadn sin?”

²² Jiizas did nuo wa dem did a tingk an so im aks dem se, “Wa mek unu tingk dem sitn de iina unu aat?

²³ Wich wan iiziya fi se, ‘Mi paadn yu sin dem,’ ar, ‘Get op an waak?’

²⁴ Bot fi mek unu nuo, mi a-go shuo unu se di Man we Gad Pik av di rait an di powa fi paadn sin pan ort,” so Jiizas se tu di kripl man se, “Git op, tek op yu chrecha an go a yu yaad.”

²⁵ Siem taim, di kripl man tan op infronta dem, pik op im chrecha, an ed fi im yaad a gi Gad di priez.

²⁶ Evribadi fraitn bout wa dem si an staat fi priez Gad. Dem se, “Wi si som big mirikl tide.”

²⁷ Afta Jiizas mek di man beta, im lef di toun an im si wan taks kalekta niem Liivai, a sidong a di staal we im kalek taks. Jiizas se tu im, “Fala mi.”

²⁸ An Liivai get op, lef evriting an fala Jiizas.

²⁹ Den Liivai chuo wan big dina fi Jiizas iina im ous, an wan big kroud a taks kalekta an ada piipl did a nyam wid dem roun di tiebl.

³⁰ Bot di Farisii an di Laa tiicha dem, komplien tu Jiizas speshal falara dem se, “Wa mek unu a nyam an jringk wid di taks kalekta an rang-duwa dem?”

³¹ Jiizas ansa dem an se, “Piipl we no sik no niid no dakta, a onggl sik piipl niid dakta.

³² Mi no kom ya fi tel piipl we du rait fi ton fram dem sin, a piipl we du rang mi kom ya fa.”

³³ Dem tel Jiizas se, “Uol iip a taim, Jan falara dem kip we fram fuud an prie. Di Farisii dem dwi’it tu. Bot fi yu dem a nyam an jringk.”

³⁴ Jiizas ansa dem bak se, “Yu tingk se di piipl dem we di braidgruum invait a im wedn fi kip we fram fuud wen im mongks dem?

³⁵ Di taim a-go kom wen di braidgruum a-go gaan fram dem. A da taim de, dem wi kip we fram fuud.”

³⁶ Den Jiizas tel dem se, “Nobadi no tier nyuu kluoz fi pach op uol kluoz, kaaz di pach fram di nyuu wan naa go mach di uol wan.

³⁷ Nobadi no put nyuu wain iina uol wain bakl. Kaaz di nyuu wain wi bos op di bakl, an di wain a-go dash we.

³⁸ Nyuu wain mos put iina nyuu bakl.

³⁹ An nobadi, afta dem jringk uol wain, no waahn nyuu wain, kaaz dem se, ‘Di uol wan beta.’ ”