Read Jamaican Patois Luuk 6 Bible Online

Luuk 6 - Jamaican Patois bible

Luuk 6

¹ Wan Sabat, Jiizas did a waak chuu wan wiit fiil, an im speshal falara dem staat pik som a di wiit, rob aaf di chrash iina dem an an nyam di grien.

² Som Farisii si dem an aks, “Wa mek unu a du wa di Laa se wi no fi du pan di Sabat?”

³ Jiizas ansa dem se, “Unu neva riid wa Dievid did du wen im an im fren dem did onggri?

⁴ Ou im go iina Gad ous, tek di uoli bred an nyam wa di Laa se onggl di priis dem fi get, an aal gi im fren dem som?”

⁵ Jiizas se tu dem se, “Di Man we Gad Pik, a im ruul uova di Sabat.”

⁶ Wan neks Sabat, Jiizas go iina di Juu dem choch an did a tiich di piipl dem. Wan man uufa rait an did kripl, did de de.

⁷ Nou di Farisii an di Laa tiicha dem did a luk fi wan riizn fi se sitn bad bout Jiizas. So, dem wach im laik aak fi si ef im a-go mek nobadi beta pan di Sabat.

⁸ Jiizas nuo wa dem a tingk, so im se tu di man we did av di kripl an se, “Git op an tan op infronta dem.” So im get op an tan op infronta evribadi.

⁹ Den Jiizas tel dem se, “Mek mi aks unu wan kwestiyan, wich wan di Laa se wi kyan du pan di Sabat: fi du gud ar fi du bad, fi siev sumadi laif ar fi kaaz sumadi fi ded?”

¹⁰ Jiizas luk roun pan aal a dem, an den se tu di man, “Chrech out yu an.” Di man chrech out im an, an it get beta.

¹¹ Bot di Farisii an di Laa tiicha dem did beks beks an staat fi taak mongks dem wan aneda bout wa dem fi du wid Jiizas.

¹² Wan die roun dem taim de, Jiizas go op pan wan il, an im spen di uol nait op de a prie tu Gad.

¹³ Wen die lait, Jiizas kaal im falara dem an pik out twelv a dem. Im kaal dem twelv de im apasl.

¹⁴ Im di pik: Saiman (we Jiizas kaal Piita), im breda Anju, Jiemz an Jan, Filip, Bartalimyuu,

¹⁵ Matyu, Tamas, Jiemz (dat a Alfiyos bwai pikni), Saiman we dem kaal Zelat,

¹⁶ Juudas (Jiemz bwai pikni), an Juudas Iskyariyat, di wan we sel out Jiizas.

¹⁷ Jiizas an im apasl dem kom dong aafa di il an go dong pan di flat. Wan big big kroud a Jiizas falara dem did de de an uol iip a piipl fram aal uova Judiya, Jeruusilem, an nier di sii-said a Taiya an Saidan.

¹⁸ Dem kom fi ier Jiizas priich an fi mek im kyuor dem fram dem siknis. An Jiizas ron out diiman outa piipl.

¹⁹ Evribadi did a chrai fi toch Jiizas, kaaz di powa fi kyuor dem did a kom fram im.

²⁰ Jiizas luk pan im falara dem an tel dem se, “Aal a unu we puor, Gad bles unu kaaz di kindom a fu’unu uon.

²¹ Aal a unu we onggri nou, Gad bles unu kaaz unu beli a-go ful. Aal a unu we a baal nou, Gad bles unu kaaz di taim a-go kom, wen unu a-go laaf.

²² Gad bles aal a unu we piipl iet, we dem lef out, disrispek an kaal aal saat a niem an se unu wikid, kaaz unu fala di Man we Gad Pik.

²³ “Mek unuself api wen dem sitn de apm tu unu, an jomp op an dong wid jai iina unu aat, kaaz nof gud sitn pudong iina evn fi unu. Di piipl dem we a chriit unu bad, a siem so fi dem piipl yuus tu chriit Gad prafit dem.

²⁴ “Bot aal a unu we rich — chobl fi unu, kaaz unu get unu iizi laif aredi.

²⁵ Chobl fi aal a unu we beli ful nou, kaaz unu a-go onggri. Aal a unu we a laaf nou — chobl fi unu, kaaz unu a-go ala an baal.

²⁶ Chobl fi aal a unu we piipl chat gud bout, a siem so fi dem piipl yuus tu chat gud bout di faalz prafit dem.

²⁷ “Aal a unu we a lisn mi, unu fi lov unu enimi dem an chriit di piipl dem we iet unu gud.

²⁸ Enibadi we kos unu, bles dem, an prie fi di wan dem we no diil wid unu gud.

²⁹ Ef sumadi baks unu pan wan saida unu fies, ton di neks said gi dem. Ef sumadi tek unu jakit, no tap im fram tek unu shot tu.

³⁰ Ef enibadi we beg unu fi sitn we unu av, gi dem. An ef nobadi tek we fi yu sitn dem, no aks dem bak fi it.

³¹ Diil wid piipl di wie unu waahn dem diil wid unu.

³² “Ef unu lov onggl di piipl dem we lov unu, wa big iina dat? Iivn di rang-duwa dem lov piipl we lov dem.

³³ An iivn ef unu du gud fi di piipl dem we gud tu unu, wa big iina dat? Aal di rang-duwa dem du dat tu!

³⁴ Ef unu len tu piipl we unu tingk kyan pie unu bak, wa big iina dat? Aal rang-duwa len tu dem wan aneda an ekspek fi get bak aal a wa dem len.

³⁵ Unu fi lov di piipl dem we iet unu. Du gud tu piipl, len an no ekspek fi get bak notn. Kaaz Gad a-go pie unu bak big taim. Gad kain tu di piipl dem we wikid an we no gi tangks. So wen unu du dis, dat shuo se unu a riili di Muos Ai Gad pikni.

³⁶ Unu fi gud tu piipl aal ef dem no dizorv it, jos laik ou yu faada gud tu piipl.

³⁷ “No joj piipl laik se Gad kyaahn paadn dem. Ef unu du dat di siem ting a-go riich unu. An no bada se nobadi gilti an rait dem aaf, kaaz dat wi riich unu tu. Paadn piipl, an unu wi get paadn tu.

³⁸ Gi an unu wi get uol iip wid aal braata. Unu kop a-go ful — ful so til it aal a ron uova. Di wie unu diil wid ada piipl, siem wie dem a-go diil wid unu.”

³⁹ An Jiizas se dis fi tiich dem sitn: “Blain man kyan liid blain man? Di tuu a dem no wi jrap iina wan uol?

⁴⁰ Nobadi we a lorn no aiya dan dem tiicha. Bot wen dem don lorn, dem a-go komiin laik dem tiicha.

⁴¹ “Wa mek unu a luk pan di saados iina unu breda yai an unu naa wach di big piis a plangk iina fu’unu uon?

⁴² Ou unu fi se, ‘Mi breda, mek mi tek di saados outa yu yai,’ Wen siem taim unu no si di big piis a plangk iina fu’unu uon? Ipokrit! Tek di plangk outa fu’unu yai fos, den unu wi si beta fi tek di saados outa unu breda yai.

⁴³ “Gud chrii no bier bad fruut, an bad chrii no bier gud fruut.

⁴⁴ Unu kyan nuo wan chrii siek-a di kain-a fruut we it bier. Piipl no pik prangganat aafa maka chrii an griep aafa makabush.

⁴⁵ Di gud man du gud sitn siek-a di gud we stuor op iina im. An di wikid man du wikid sitn siek-a di wikidnis we stuor op iina im. Kaaz wa kom outa im mout a wa de iina im aat.

⁴⁶ “Wa mek unu a kaal mi, ‘Laad, Laad,’ an naa du wa mi se?

⁴⁷ Di wan we kom tu mi, ier we mi se an du wa mi se, mek mi tel yu sitn bout im.

⁴⁸ Im komiin laik wan man we bil op wan ous — im dig dong diip iina di grong so im kuda bil di ous pan rakstuon. Di plies flod out an di riva kom dong an biit gens di ous, bot kudn mash it dong, kaaz di ous did bil op chrang chrang.

⁴⁹ Bot di wan we ier mi wod an no du wa mi se, im komiin laik sumadi we bil wan ous we naa no foundieshan. Di plies flod out an di riva kom dong an biit gens di ous an it jrap dong an mash op.”