Read Jamaican Patois Luuk 7 Bible Online

Luuk 7 - Jamaican Patois bible

Luuk 7

¹ Afta Jiizas don se aal a dis tu di piipl dem, im go Kyaporniyom.

² Wan ed fi onjrid suoja iina Kyaporniyom did av wan sorvant we did sik an bout fi ded. Di ed suoja did riet da sorvant ya nof,

³ so az im ier bout Jiizas, im sen som Juu liida fi aks im fi kom get im sorvant beta.

⁴ Di liida dem go tu Jiizas an beg im se, “Du elp da man ya, ef nobadi fi get yu elp, a im.

⁵ Kaaz im lov wi piipl an a im bil wan choch fi wi.”

⁶ So Jiizas go wid dem. Wen Jiizas kech nier di ous, di ed suoja sen som a im fren dem fi tel im se, “Laad, no bada yuself, mi no gud inof fi yu kom anda fi mi ruuf.

⁷ A dat mek mi neva tingk mi kuda kom taak tu yu. Bot jos se di wod an mek mi sorvant get beta.

⁸ Kaaz mi tek aada fram dem we uova mi tu, an mi av suoja we mi kanchuol. Mi tel da wan ya, ‘Go de-so,’ an im go, an wan neks wan ‘Kum ya,’ an im kom. An mi tel mi sorvant, ‘Du dis,’ an im dwi’it.”

⁹ Jiizas yai uopm op wen im ier di sitn dem we di ed suoja se. Im ton tu di kroud we did a fala im an se, “Mek mi tel unu sitn, aal nou mi no fain nobadi iina Izrel we chos iina mi so moch!”

¹⁰ Di ed suoja fren dem go baka di ous an fain se di sorvant did get beta.

¹¹ Likl afta dat, Jiizas an im speshal falara dem lef fi go a di toun we dem kaal Nien, an wan big big kroud fala dem.

¹² Wen Jiizas did nier fi riich di toun giet, som piipl did a kyari out wan ded badi fi go beri. Im a did di onggl bwai pikni fi wan uman we ozban ded. Uol iip a piipl fram di toun did a waak wid ar.

¹³ Wen di Laad si ar, im sari fi ar an tel ar se, “Osh! No bada baal!”

¹⁴ Den Jiizas go op go toch di kafn, an di man dem we did a kyari it tap. Jiizas se, “Yuut man, git op!”

¹⁵ Di man get op an staat taak an Jiizas gi im bak tu im mada.

¹⁶ Evribadi fraitn, an dem staat priez Gad. Dem se, “Wan a di prafit dem de ya mongks wi, wan powaful wan! Gad kom fi elp im piipl dem.”

¹⁷ Da nyuuz ya bout Jiizas pred aal uova Judiya an di dischrik dem we de nier it.

¹⁸ Jan falara dem tel im bout aal di sitn dem we Jiizas did a du, so im kaal tuu a dem

¹⁹ an sen dem fi go aks Jiizas, “A yu wi fi a luk fa, ar a sumadi els a-go kom?”

²⁰ Di man dem go tu Jiizas an se, “Jan di Baptis sen wi fi aks ef a yu wi fi a luk fa, ar ef a sumadi els a-go kom.”

²¹ Siem taim Jiizas mek uol iip a piipl we did sik iina aal kain-a wie get beta, im ron diiman outa piipl, an mek nof blain piipl si agen.

²² Den Jiizas tel Jan falara dem se, “Go tel Jan wa unu si an ier. Blain piipl kyan si an kripl kyan waak. Piipl we av siknis we mek dem skin fasi-fasi get beta an def piipl a ier. Ded piipl kom bak alaiv an di gud nyuuz a priich tu puo piipl.

²³ Gad bles di piipl dem we no tap chos iina mi jos kaaz mi no gwaan ou dem tingk di wan we dem a wiet pan fi gwaan.”

²⁴ Afta Jan mesinja dem gaan, Jiizas staat taak tu di kroud bout Jan, “Wa kain-a sumadi unu did go out iina di dezot fi si? Sumadi we kyaahn mek op im main laik taal graas we di briiz a bluo dis ya wie an dat de wie?

²⁵ Ef a no dat, den a wa unu go out de fi si? Wan man jres op iina a dier kluoz? Nuo man! Piipl we jres op iina dier kluoz an liv big laif, liv iina palis.

²⁶ So a wa unu go out de fi si? Wan prafit? Yes, an mi a tel unu, an im a muor dan jos wan prafit.

²⁷ A Jan it a taak bout wen it rait dong se: “ ‘Luk, mi wi sen mi mesinja fi gwaan til yu kom, im a-go get piipl redi fi yu.’

²⁸ Mek mi tel unu dis, Jan biga dan enibadi we eva baan. Bot iivn di luowis sumadi iina Gad kindom, biga dan im.”

²⁹ (Evribadi we ier we Jiizas se, iivn di taks kalekta dem, tek it se Gad wie rait, kaaz dem did mek Jan baptaiz dem.

³⁰ Bot di Farisii an di Laa tiicha dem ton dem bak pan wa Gad did waahn dem fi du, kaaz dem neva mek Jan Baptaiz dem.)

³¹ “Di piipl we liv iina dem taim ya, a we dem komiin laik? Wa kain-a piipl dem bi?

³² Dem komiin laik pikni we a sidong iina di maakit an a ala tu dem wan aneda: “ ‘Wi plie di fluut fu’unu, an unu no daans: wi sing wan finaral sang, an unu no baal.’

³³ Kaaz Jan di Baptis neva kom a nyam no bred an a jringk no wain, bot unu se, ‘Diiman iina im.’

³⁴ Di Man we Gad Pik kom a nyam an a jringk, an unu se, ‘Luk ya, da man ya krievn an im a wan jongkad. Fi’im fren dem a taks kalekta an sina.’

³⁵ Di piipl we fala di rait wie pruuv se Gad waiz an im wie rait.”

³⁶ Wan Farisii invait Jiizas fi kom kom nyam dina wid im, so Jiizas go a im yaad an sidong fi nyam.

³⁷ Wan sina uman iina di toun ier se Jiizas de a di Farisii yaad, so shi go de wid wan likl stuon jaar a dier porfyuum.

³⁸ Shi go baka im, tan wich paat im chrech out im fut an staat baal. Shi mek ar yai-waata wet op im fut an waip dem aaf wid ar ier, den shi kis dem an chuo out di porfyuum pan dem.

³⁹ Wen di Farisii we invait Jiizas si dis, im se tu imself, “Ef da man ya did a wan prafit, im wuda nuo wa kain-a uman a toch im!”

⁴⁰ So Jiizas se tu im se, “Saiman, mi av sopm fi tel yu.” “Wa dat, tiicha?” Saiman se.

⁴¹ Jiizas tel im se, “Tuu man did uo wan monilenda. Wan uo im faiv onjrid silva kain, an di ada wan did uo fifti.

⁴² Non a dem neva av no moni fi pie im, so im se dem na’afi bada pie im bak notn. Tel mi Saiman, wich a dem a-go lov im muo?”

⁴³ Saiman ansa Jiizas se, “Mosi di wan we did uo im di muos.” “Yu rait,” Jiizas ansa im.

⁴⁴ Im ton tu di uman an se tu Saiman, “Yu si da uman ya? Mi kom a yu yaad an yu no gi mi no waata fi wash mi fut. Bot da uman ya wash mi fut wid ar yai-waata an waip dem wid ar ier.

⁴⁵ Yu no welkom mi wid no kis, bot fram mi kom iin, dis uman no tap kis op mi fut.

⁴⁶ Yu no chuo ail pan mi ed, bot shi put porfyuum pan mi fut.

⁴⁷ So mi a tel yu, shi get paadn fi ar uol iip a sin dem, kaaz shi lov mi nof nof. Piipl we get paadn fi likl bit a sin, onggl av likl bit a lov fi mi.”

⁴⁸ Jiizas se tu di uman se, “Mi paadn aal a yu sin dem.”

⁴⁹ Di ada ges dem staat se tu dem wan aneda, “A uu dis ya we aal a paadn sin?”

⁵⁰ Jiizas tel di uman se, “Kaaz yu chos iina mi, Gad siev yu. Go a yu yaad wid piis iina yu aat.”