Read Jamaican Patois Luuk 8 Bible Online

Luuk 8 - Jamaican Patois bible

Luuk 8

¹ Afta dat, Jiizas chravl fram toun tu toun an dischrik tu dischrik, a priich di gud nyuuz bout Gad kindom. Aal dem taim de, di twelv did a go roun wid im.

² Som uman we Jiizas did ron diiman outa an we did sik an im mek beta, did a go roun wid im tu, dem a: Mieri di wan we dem kaal Magdaliin (Jiizas did ron sevn diiman outa ar),

³ Jowana, Kuuza waif, (Kuuza did inchaaj a aal a di sitn dem we bilang tu Erad), Suuzana, plos nof ada uman. Aal dem uman ya did a yuuz wat-eva dem av fi elp sopuot Jiizas an im speshal falara dem.

⁴ Wan big big kroud a piipl we kom fram difrant difrant toun, gyada op fi ier Jiizas. Im tel dem da tuori ya:

⁵ “Wan faama did go out fi plaant im siid dem. Wen im a skyata di siid, som jrap wich paat piipl waak an dem tep tep op pan dem, an bod kom kom nyam dem.

⁶ Som jrap pan rakstuon, an wen dem staat gruo, dem kudn get no waata so dem jrai op an ded.

⁷ Ada siid jrap mongks makabush, an wen dem pap op, di makabush chuok dem.

⁸ Som a di siid dem jrap pan gud grong. Dem gruo op an bier wan onjrid taim muo dan wa di faama did plaant.” Afta dat Jiizas shout out an se, “Enibadi we av iez fi ier — beta lisn gud!”

⁹ Jiizas speshal falara dem aks im wa di tuori miin.

¹⁰ Jiizas se tu dem se, “Unu get fi andastan di siikrit sopm dem bout Gad kindom, bot fi ada piipl, mi mek wa mi se soun laik rigl. So dat, “ ‘Iivn duo dem kyan si, dem naa si; an iivn duo dem kyan ier, dem naa andastan.’

¹¹ “Di tuori wa mi jos tel unu, dis a wa it miin: Gad wod a di siid.

¹² Di wan dem we jrap wich paat piipl waak, a piipl we ier di wod, an den di devl kom tek di wod outa dem aat, so dem wi no biliiv an get siev.

¹³ Di siid dem we jrap pan di grong we bier rakstuon de, a piipl we glad fi Gad wod, biliiv Gad wod fi likl bit, bot siem laik di plaant dem uufa ruut no go dong diip iina di grong, dem no mek Gad wod go diip iina dem aat. Dem biliiv fi likl bit, bot wen taim kom fi dem get tes, dem ton bak — siem laik ou di plaant jrai op an ded.

¹⁴ Di wan dem we jrap iina makabush, a di piipl we ier Gad wod, bot dem staat fret bout laif an aal dem kyan tingk bout a ou fi mek moni an ou fi enjai demself. Dem mek dem sitn de chuok dem so dem no bier no raip fruut.

¹⁵ Di wan dem we jrap pan gud grong, a di piipl dem uufa aat riili gud. Dem ier di wod an uol aan pan it. Aal wen aad taim kom, dem stil bier fruut.

¹⁶ “Nobadi no lait lamp an kova it wid wan bokit ar put it anda wan bed. Lamp pudong we piipl kyan si di lait wen dem kom iina di ous.

¹⁷ Notn no aid, we nobadi naa go nuo. No siikrit no de we naa go kom out iina di uopm.

¹⁸ Lisn gud! Enibadi we andastan wa mi tiich a-go andastan muor; bot di wan dem we no andastan, iivn di sitn dem we dem tingk dem andastan, dem naa go andastan no muor.”

¹⁹ Jiizas mada an breda dem kom fi si im, bot siek-a di kroud dem kudn get nier im.

²⁰ So sumadi tel Jiizas se, “Yu mada an breda dem tan op outa duor a wiet fi si yu.”

²¹ Jiizas se tu di kroud se, “Fi mi mada an breda, a enibadi we ier Gad wod an du we im se dem fi du.”

²² Wan die, Jiizas an im speshal falara dem did go iina wan buot an im se tu dem, “Mek wi go uova di ada said a di liek.” So dem go.

²³ Wen dem a siel kraas, Jiizas jrap a sliip. Nou wan chrang chrang briiz kom dong pan di liek, an di buot staat ful op a waata so til evribadi did out fi joun.

²⁴ Jiizas speshal falara dem wiek im op an se, “Laad! Laad! Wi a-go joun!” Jiizas get op an aada di briiz an di wiev dem fi sekl dong; an evriting get kaam.

²⁵ “We unu chos iina mi de?” Jiizas aks dem. Dem so fraitn wen dem si wa Jiizas du, dem aks dem wan aneda, “Tap! a wa kain-a man dis? Im taak tu aal briiz an wiev an dem du wa im tel dem fi du?”

²⁶ Dem siel go a di konchri we di Girasiinz piipl dem liv, we de kraas fram Gyalalii.

²⁷ Siem taim Jiizas kom outa di buot, wan man fram di toun kom op tu im. Di man did av iin diiman. Fi wan lang taim, im did a waak niekid an neva did liv iina no ous; a beriyin grong im did liv.

²⁸ Wen di man spat Jiizas, im baal out an jrap imself infronta Jiizas. Im shout out pan tap a im vais, “Lef wi no Jiizas, di Muos Ai Gad Pikni! Du mi a beg yu, no mek mi sofa!”

²⁹ Im se dat kaaz Jiizas did staat fi tel di diiman fi kom outa im. (Uol iip a taim di diiman did tek im uova. So piipl yuus tu chien op im an an fut dem, an gyaad im. Bot im wuda brok outa di chien dem an di diiman wuda kyari im go wich paat nobadi no de.)

³⁰ So Jiizas aks im se, “Wa yu niem?” Im ansa bak, “ ‘Uol-iip’ — a so wi niem.” Im se a so im niem kaaz a nof nof diiman did go iina im.

³¹ Di diiman dem did a beg Jiizas no fi tel dem fi go dong a di diiman prizn — di pit we naa no batam.

³² Nou wan uol iip a ag did a nyam pan di il-said. Di diiman dem beg Jiizas fi mek dem go iina di ag dem. Jiizas mek dem gwaan.

³³ So di diiman dem kom outa di man, an go iina di ag dem, an di uol a di ag dem tek aaf dong di stiip stiip il-said go chriet iina di liek an joun.

³⁴ Wen di man dem we luk aafa di ag dem si wa apm, dem ron go pred di nyuuz iina di toun an di plies dem we de nier di toun tu.

³⁵ So di piipl dem go fi si a wa did apm. Wen dem riich wich paat Jiizas did de, dem si di man we Jiizas ron di diiman dem outa. Im did a sidong a Jiizas fut, im did av aan kluoz an iina im rait main. An di piipl dem kech dem fried.

³⁶ Di wan dem we did si wa apm, tel di ada piipl dem ou Jiizas mek di man we did av iin diiman get beta.

³⁷ Den aal a di Girasiinz piipl dem an evribadi we liv nier dem did wel fried so dem aks Jiizas fi lef dem ieriya. Jiizas go iina di buot an go we.

³⁸ Wen Jiizas did a lef, di man we im ron di diiman dem outa did a beg fi go wid im, bot Jiizas sen im we, an se,

³⁹ “Go a yu yaad go tel evribadi aal wa Gad du fi yu.” Di man lef go pred di nyuuz aal uova di toun an tel dem aal wa Jiizas du fi im.

⁴⁰ Wen Jiizas go baka Gyalalii, wan kroud a piipl di a wiet fi im, so dem did glad fi si im kom.

⁴¹ Siem taim wan man niem Jairos, we inchaaj a di Juu dem choch, kom niil dong infronta Jiizas, an beg im fi kom a im yaad.

⁴² Im did a beg Jiizas kaaz im wan an onggl gyal pikni did a ded. Shi did bout twelv. Wen Jiizas did a chrai fi go a Jairos yaad, di piipl dem did a pres gens im.

⁴³ Wan uman did de de, we a bliid fi twelv ier. Shi spen evriting shi av pan dakta bot non a dem kudn get ar beta.

⁴⁴ Shi kom op baka Jiizas an toch di tiel a im kluoz. Siem taim shi tap bliid!

⁴⁵ “A uu toch mi?” Jiizas aks. Evribadi se a no dem bot Piita se, “Bot Tiicha, wan kroud a piipl roun yu a pres gens yu.”

⁴⁶ Bot Jiizas se, “Sumadi toch mi man. Mi nuo, kaaz mi fiil powa gaan outa mi.”

⁴⁷ Di uman si se shi kudn aid, so shi jrap arself a Jiizas fut a chrimbl. Shi tel Jiizas wa mek shi toch im an ou shi get beta siem taim. Shi tel Jiizas dis infronta evribadi.

⁴⁸ Jiizas tel di uman se, “Daata, kaaz yu biliiv iina mi, yu aarait nou. Gwaan wid piis iina yu aat.”

⁴⁹ Jiizas did stil a taak wen sumadi kom fram Jairos yaad an tel Jairos se, “Yu gyal pikni ded, no bada di tiicha agen.”

⁵⁰ Wen Jiizas ier wa apm, im se tu Jairos, “No bada fried, jos biliiv, an shi wi get beta.”

⁵¹ Jiizas neva mek nobadi go iina di ous wid im, onggl Piita, Jan, Jiemz, an di pikni faada an mada wan.

⁵² Evribadi did a ala an a baal kaaz di pikni did ded. Jiizas se, “Unu no baal! Shi no ded; a sliip shi a sliip.”

⁵³ An di piipl dem staat laaf aafa im, kaaz dem did nuo se shi ded.

⁵⁴ Jiizas tek di pikni an an se, “Git op, mi pikni!”

⁵⁵ Ar spirit kom bak iina ar badi, an shi tan op siem taim. An Jiizas tel dem fi gi ar sitn fi nyam.

⁵⁶ Di pikni mada an faada did shak so til, bot Jiizas aada dem no fi tel nobadi wa apm.