Read Jamaican Patois Luuk 9 Bible Online

Luuk 9 - Jamaican Patois bible

Luuk 9

¹ Jiizas kaal im twelv apasl dem tugeda an gi dem powa an di rait fi ron out diiman an fi kyuor sik piipl.

² Im sen dem out fi tel piipl bout Gad kindom an fi kyuor di sik.

³ Jiizas tel dem se: “No tek notn wid unu wen unu a go; no kyari no waakn tik, no bag, no bred, no moni ar no kluoz fi chienj.

⁴ Di fos sumadi we tek unu iina dem ous, tan wid dem til unu redi fi lef di toun.

⁵ Ef piipl no waahn unu iina dem toun, shiek aaf di dos aafa unu fut wen unu a lef. Unu fi du dis mek dem nuo se Gad no api wid dem an im a-go joj dem.”

⁶ So Jiizas apasl dem chravl fram dischrik tu dischrik, a priich di Gud Nyuuz an a kyuor piipl.

⁷ Wen Erad we ruul uova Gyalalii, ier bout di sitn dem we Jiizas did du, im staat fret, kaaz som piipl a se Jan di Baptis kom bak alaiv.

⁸ Ada piipl se a Ilaija kom bak. Som se a wan a di prafit dem fram wie bak wen, kom bak alaiv.

⁹ Bot Erad se, “A mi mek dem chap aaf Jan ed, so a uu da man ya mi a ier dem sitn ya bout?” An Erad chrai fi miit op wid Jiizas.

¹⁰ Di apasl dem kom bak an tel Jiizas aal a wa dem du. Den Jiizas tek dem an slip we go a wan toun niem Betsieda.

¹¹ Bot di piipl dem fain out wich paat im a go an fala im. Jiizas neehn ton dem bak, im mek dem kom, im tiich dem bout Gad kindom, an im kyuor di wan dem we sik.

¹² Wen iivnin a kom, Jiizas twelv apasl dem kom tu im an se, “Sen di piipl dem mek dem go iina di toun an dischrik we de nier ya-so, fi go luk fuud an som we fi tan. Kaaz notn no de out ya-so fi dem.”

¹³ Jiizas ansa dem se, “Unu gi dem sitn fi nyam.” Dem ansa Jiizas an se, “Wi av onggl faiv bred an tuu fish. Ef wi fi fiid da kroud a piipl ya, wi afi go bai fuud.”

¹⁴ (Bout faiv touzn man did de de.) Bot Jiizas se tu im speshal falara dem, “Mek di piipl dem gruup op an sidong. Bout fifti sumadi fi de iina wan gruup.”

¹⁵ Jiizas speshal falara dem du wa im tel dem, an evribadi sidong.

¹⁶ Jiizas tek di faiv bred an tuu fish an im luk op iina di skai, gi tangks an brok op di bred dem. Im gi dem tu im falara dem, fi dem gi di piipl dem.

¹⁷ Evribadi nyam til dem beli ful, an Jiizas falara dem ful twelv baaskit wid lef-uova fuud.

¹⁸ Wan taim Jiizas did de wan said a prie. Im speshal falara dem di nier im an im aks dem se, “A uu di piipl se mi bi?”

¹⁹ Dem ansa Jiizas se, “Som se yu a Jan di Baptis, ada piipl se Ilaija, bot yu av di wan dem we se yu a wan a di prafit dem fram wie bak wen, we ded an kom bak.”

²⁰ “Bot wa bout unu?” Jiizas aks dem. “Uu unu tingk mi bi?” Piita ansa, “Di Krais.”

²¹ Jiizas waan dem se dem no fi tel nobadi.

²² Im se, “Di Man we Gad Pik a-go a fi go chuu nof nof sofarieshan, an di elda, ed priis, an Laa tiicha dem a-go ton dem bak pan im, an dem a-go kil im. Bot afta chrii die paas, im a-go kom bak alaiv.”

²³ Den Jiizas se tu aal a dem se: “Ef sumadi waahn fi ton wan a fi mi falara dem, dem afi figet bout wa dem waahn, tek op dem kraas evridie an fala mi.

²⁴ Sumadi we waahn siev dem laif a-go luuz it, bot enibadi we luuz dem laif siek-a mi, dem a-go get fi siev dem laif.

²⁵ Wa gud it a-go du sumadi, ef dem get di uol worl bot dem luuz dem laif.

²⁶ Ef enibadi shiem a mi an wa mi tiich, wen di man we Gad Pik kom, im a-go shiem a dem tu. Wen im kom im lait a-go shain roun im. An di lait we shain roun di Faada an di uoli ienjel dem, a-go shain roun im tu.

²⁷ Mi a tel unu dis, an a chuu mi a taak, som a unu we tan op ya-so naa go ded bifuo di taim kom wen unu si Gad a ruul.”

²⁸ Bout iet die afta Jiizas se dis, im tek Piita, Jan an Jiemz go op iina wan moutn fi prie.

²⁹ Siem taim Jiizas a prie, im fies staat luk difrant, an im kluoz staat shain brait laik wen laitnin flash.

³⁰ Aal av a sodn tuu man, Muoziz an Ilaija, shuo op an a chat wid im.

³¹ Wan brait brait lait did a shain roun dem an dem did a taak bout ou Jiizas a-go ded iina Jeruusilem.

³² Aal dem taim ya, Piita an Jiizas ada tuu falara dem did faas asliip. Wen dem wiek op, dem si di tuu man dem a tan op wid Jiizas an wan lait a shain roun im.

³³ Wen di man dem mek fi lef, Piita se tu Jiizas, “Tiicha, a gud ting se wi did de ya! Mek wi bil op chrii shed, wan fi yu, wan fi Muoziz an di neks wan fi Ilaija.” (Piita neehn riili nuo wa im a taak bout.)

³⁴ Siem taim Piita a chat, wan kloud kom dong kom kova dem op, an dem kech dem fried.

³⁵ Den dem ier wan vais iina di kloud se, “Dis a mi bwai pikni, a im mi pik, unu fi lisn we im se.”

³⁶ Az di vais don taak, dem si se a Jiizas wan did de de. Jiizas speshal falara dem no tel nobadi wa dem si an ier da taim de, dem jos kip it mongks demself.

³⁷ Di neks die, wen dem kom dong fram di mountn, wan big kroud kom miit dem.

³⁸ Wan man iina di kroud baal out, “Tiicha, beg yu luk pan mi bwai. Im a mi wan an onggl pikni.

³⁹ Somtaim wan spirit wi tek im uova an im wi staat fi baal out; it mek im flata flata til im mout fraat op. Di spirit aadli lef im. It a mash im op.

⁴⁰ Mi beg yu speshal falara dem fi ron out di spirit bot dem kudn dwi’it.”

⁴¹ Jiizas se, “Unu piipl we liv iina da taim ya! Unu no biliiv an unu no du we unu fi du. Umoch langga mi fi tan ya wid unu, an put op wid unu? Kyari yu bwai kom,” im se tu di man.

⁴² Wen di bwai did a kom tu Jiizas, di diiman fling im a grong an di bwai staat flata. Bot Jiizas aada di diiman fi kom out an im kyuor di bwai an gi im bak tu im faada.

⁴³ Evribadi jaa jrap wen dem si di powa we Gad av. Wen dem a luk an a wanda bout wa dem si, Jiizas se tu im speshal falara dem,

⁴⁴ “Ier wa mi a se an unu lisn mi gud! Dem a-go tek di Man we Gad Pik an gi im uova tu piipl we iet im.”

⁴⁵ Bot Jiizas falara dem neva get we im se an dem di fried fi aks im wa im riili a taak bout. Gad did aid wa it miin so dem kudn andastan it.

⁴⁶ Jiizas speshal falara dem did a aagyu bout wich wan a dem mait-a av di tap pozishan iina di gruup.

⁴⁷ Jiizas did nuo wa dem did a tingk, so im mek wan pikni tan op saida im.

⁴⁸ Jiizas se tu dem se, “Enibadi we welkom da likl pikni ya, kaa im chos iina mi, welkom mi tu. An enibadi we tek mi iin, tek iin di wan we sen mi tu. Di wan mongks unu we de a di batam, a im av di tap a tap pozishan.”

⁴⁹ “Laad,” Jan se, “Wi si wan man a yuuz yu niem ron out diiman outa piipl an wi chrai fi tap im, kaaz im a no wan a wi.”

⁵⁰ Jiizas se tu im se, “No tap im, kaaz uu naa fait gens yu de pan yu said.”

⁵¹ Wen a did nier taim fi Jiizas go op iina evn, im set iina im main se im a go a Jeruusilem.

⁵² Jiizas sen som mesinja fi gwaan bifuo im an get tingz redi. Wen dem riich a wan Samaritan dischrik,

⁵³ di piipl we liv de neva waahn Jiizas kom de kaaz a Jeruusilem im did mek op im main fi go.

⁵⁴ Wen Jiemz an Jan, tuu a Jiizas falara dem, si wa a gwaan, dem aks im se, “Laad, Yu no waahn wi kaal dong faiya fram evn fi bon dem op?”

⁵⁵ Bot Jiizas ton roun an taak tu dem chrang chrang mek dem nuo se dat no rait,

⁵⁶ an so dem go a wan neda dischrik.

⁵⁷ Wen dem a waak pan di ruod, wan man se tu Jiizas, “Mi wi ton wan a yu falara dem an go wid yu eniwe yu go.”

⁵⁸ Jiizas se tu im se, “Faks av uol an di bod dem av nes, bot di Man we Gad Pik no av no we fi pudong im ed.”

⁵⁹ Jiizas se tu wan neda man, “Fala mi.” Bot di man se, “Laad, mek mi go beri mi faada fos.”

⁶⁰ Bot Jiizas tel im se, “Mek di ded galang go beri uu ded fi dem, bot yu, yu fi go tel piipl bout Gad kindom.”

⁶¹ Den sumadi els se tu Jiizas, “Mi wi fala yu Laad, bot mek mi go tel mi fambili ba-bai fos.”

⁶² Jiizas ansa an se, “Enibadi we staat plou an luk bak no fit fi Gad kindom.”