Read Jamaican Patois Jan 10 Bible Online

Jan 10 - Jamaican Patois bible

Jan 10

¹ Jiizas se, “Mi a tel unu fi chuu chuu se di sumadi we no kom iina di shiip pen chuu di giet, bot we klaim go iin de wan neks wie, da sumadi de a tiif an raba.

² Di wan we go iina di pen chuu di giet, a im a di shiip dem shepad.

³ Di wan we wach uova di shiip giet uopm di giet fi di shepad, an di shiip dem ier di shepad vais. Di shepad kaal fi’im uona shiip dem bai dem niem an im liid dem out.

⁴ Wen im tek out aal a fi’im shiip, im go infronta dem, an di shiip dem fala im kaa dem pik op im vais.

⁵ Dem naa go fala baka chrienja. Dem ron we fram im kaa dem no pik op chrienja vais.”

⁶ Jiizas did a tel dem wan tuori bot dem neehn andastan wa im did a se tu dem.

⁷ So im se tu dem agen se, “Mi a tel unu fi chuu chuu se dat mi a di giet we di shiip dem go chuu.

⁸ Enibadi els we kom bifuo mi a tiif an raba, bot di shiip dem neva lisn tu dem.

⁹ Mi a di giet. Ef enibadi kom iin chuu mi, dem a-go siev. Dem a-go waak iin an waak out, an dem a-go fain plies wid nais griin graas fi nyam.

¹⁰ Di tiif kom onggl fi tiif, fi kil an fi mash op. Mi kom so dat dem kyan liv laif an no waahn notn at aal.

¹¹ “Mi a di gud shepad. Di gud shepad wi gi op im laif fi di shiip dem.

¹² Di sumadi we a get pie fi luk aafa dem a no di shepad. Dem no uon di shiip dem. So wen taim da sumadi de si wulf a kom, im ron go we lef di shiip dem. Den di wulf kom op pan di shiip dem an mek dem skyata.

¹³ Di sumadi we get pie fi luk aafa di shiip dem ron we kaaz im onggl bizniz bout di moni. Im no kieta bout di shiip dem.

¹⁴ Mi a di gud shepad. Mi nuo mi uona shiip dem an mi shiip dem nuo mi

¹⁵ — siem laka ou di Faada nuo mi an mi nuo di Faada. An mi gi op mi laif fi mi shiip dem.

¹⁶ Mi av ada shiip we no iina da shiip pen ya. Mi afi kyari dem iina di pen tu. Dem a-go lisn tu mi vais tu, so den, yu a-go av onggl wan gruup a shiip an onggl wan shepad.

¹⁷ Mi Faada lov mi kaa mi gi op mi laif, so dat mi kyan kom bak alaiv.

¹⁸ Nobadi no tek we mi laif fram mi. A mi gi it op miself. Mi av di powa fi gi it we an mi av di powa fi tek it bak. A dis ya mi Faada tel mi fi du.”

¹⁹ Wen di Juu liida dem ier wa Jiizas se, dem staat aagyu wid dem wan aneda agen.

²⁰ Nof a dem se, “Im av wan diiman iina im an im tif stuon mad. Wa unu a lisn tu im fa?”

²¹ Bot som ada wan se, “Dis ya kain-a tiichin ya no kom fram sumadi we av diiman iina dem. Diiman kyaahn mek blain piipl si?”

²² Di alidie wen di Juu piipl dem memba di taim wen Gad ous did dedikiet bak tu im did kom a Jeruusilem. A did di kuol siizn,

²³ an Jiizas did a waak roun Gad ous ieriya pan Salaman Puoch.

²⁴ Di Juu liida dem bongl roun im an se, “Ou lang yu plan fi kip tingz fram wi an av wi a wanda? Ef yu a di Krais, jos se it plien an chriet.”

²⁵ So Jiizas se tu dem se, “Mi tel unu aredi, bot unu no biliiv. Di sopm dem we mi du kaa mi Faada tel mi fi du dem, dem shuo unu uu mi bi.

²⁶ Bot unu mek op unu main fi no biliiv kaa unu a no fi mi shiip.

²⁷ Fi mi shiip dem lisn tu we mi se. Mi nuo dem, an dem fala baka mi.

²⁸ Mi mek dem kyan liv fi eva, an dem naa go ded. Nobadi naa go grab an tek dem outa mi an.

²⁹ Mi Faada we gi mi aal a dem, im biga dan evribadi. Nobadi kyaahn grab an tek dem outa mi Faada an.

³⁰ Mi an di Faada a wan an di siem.”

³¹ So di Juu liida dem pik op rakstuon fi stuon im wan neda taim,

³² bot Jiizas se tu dem se, “Mi du nof powaful sitn we mi Faada tel mi fi du infronta unu yai. A wich wan a dem unu a stuon mi fa?”

³³ “Wi naa stuon yu fi non a dem sitn de,” dem se tu im. “Wi gweehn stuon yu kaaz a ou yu a disrispek Gad. Yu a onggl wan man, an yu a taak bout se yu a Gad.”

³⁴ So Jiizas ansa dem an se, “A no iina fu’unu Laa buk it rait dong se Gad se, ‘Mi tel unu se unu a gad’?

³⁵ Nou, wi nuo se wa rait dong iina Gad wod aalwiez chuu. So nou, ef Gad did se di piipl dem we im did a taak tu dem taim de a ‘gad,’

³⁶ wa mek unu se, ‘Yu a disrispek Gad’ tu di wan we Gad pik an sen iina di worl? Wa mek unu a se mi disrispek Gad kaa mi se, ‘Mi a Gad Bwai Pikni’?

³⁷ Ef mi naa du we mi Faada waahn mi fi du, den no biliiv mi.

³⁸ Bot ef mi du wa im tel mi fi du, duo unu no biliiv mi siek-a wa mi tel unu, at liis biliiv mi siek-a di mirikl dem we mi du, so dat unu kyan nuo an andastan se di Faada iina mi, an mi iina di Faada.”

³⁹ Den, dem chrai fi uol im an lak im op wan muo taim, bot im get we fram dem.

⁴⁰ Im go bak kraas Jaadn Riva fi go a di plies we Jan did a baptaiz piipl iina di orliya die dem. Im tan de an no go no we afta im riich de.

⁴¹ Uol iip a piipl kom tu im, an dem se, “Duo Jan neehn du no iivn wan mirikl, aal a we im did se bout da man ya a did chuu.”

⁴² An uol iip a piipl we did de kraas Jaadn Riva biliiv iina im.