Read Jamaican Patois Jan 11 Bible Online

Jan 11 - Jamaican Patois bible

Jan 11

¹ Nou, yu did av wan sik man niem Lazaros. Lazaros did liv a Betani, di sed plies Mieri an ar sista, Maata, did liv.

² (A da Mieri ya did chuo porfyuum ail pan di Laad an waip aaf im fut dem wid ar ier. A fi ar breda Lazaros did sik.)

³ So di sista dem sen mesij tu Jiizas se, “Laad, di sumadi we yu lov sik.”

⁴ Wen Jiizas ier bout it, im se, “Nobadi naa go ded siek-a da siknis ya. It gweehn kaaz piipl fi big op Gad. An dem a-go big op di Man we Gad Pik siek-a it tu.”

⁵ (Nou Jiizas did lov Maata, ar sista an Lazaros.)

⁶ Bot wen im ier se Lazaros did sik, im tan wich paat im did de fi tuu muo die.

⁷ Afta dat, im se tu im falara dem se, “Kom mek wi go baka Judiya.”

⁸ “Bot Tiicha,” dem se, “no jos di ada die di Juu dem did a chrai fi stuon yu kil yu, an yu a go bak de?”

⁹ Jiizas ansa dem se, “No twelv owa iina wan die? Sumadi we waak a die no faal dong, kaa im av di son fi mek im si.

¹⁰ Bot ef sumadi waak a nait, im bok op an chrip uova, kaa im no av no lait iina im fi mek im si.”

¹¹ Afta im se so, im tel dem se, “Wi fren Lazaros jrap asliip; bot mi a-go wiek im op.”

¹² So im falara dem se tu im se, “Laad, ef im jrap asliip, im wi get beta.”

¹³ (Nou, Jiizas did a taak bout ou Lazaros did ded, bot im falara dem did tingk se im miin Lazaros did jos a sliip.)

¹⁴ So im tel dem we im miin plien an chriet, im se, “Lazaros ded,

¹⁵ an fi fu’unu siek, mi glad mi neehn de de, so unu kyan get fi biliiv iina mi nou. Kom mek wi go wich paat im de.”

¹⁶ Den Tamas — uufa pet niem a did “Twin” — se tu di res a Jiizas falara dem se, “Kom mek di uol a wi go wid im, so wi kyan ded wid im tu.”

¹⁷ Wen Jiizas riich, im fain se Lazaros did don iina di griev fi fuo die.

¹⁸ (Betani did de les dan tuu mail fram Jeruusilem,

¹⁹ an nof a di Juu dem we kom fram Jeruusilem said did kom fi osh Maata an Mieri an mek dem fiil beta kaa dem breda did ded.)

²⁰ Nou, wen Maata ier se Jiizas did a kom, shi go fi miit im, bot Mieri tan baka di yaad.

²¹ “Laad,” Maata se tu Jiizas, “ef yu did de ya, mi breda wudn ded.

²² Bot mi nuo se iivn nou Gad wi gi yu eniting yu aks im fa.”

²³ Jiizas se tu ar se, “Yu breda a-go kom bak alaiv.”

²⁴ So Maata ansa im an se, “Mi nuo im gweehn kom bak alaiv pan di die wen di worl en an piipl kom bak alaiv.”

²⁵ Den Jiizas se tu ar se, “Mi a di wan we mek piipl kom bak alaiv; a mi mek piipl liv. Enibadi we biliiv iina mi a-go liv, aal ef dem ded.

²⁶ An dem we alaiv an biliiv iina mi, dem naa go ded. Yu biliiv dis ya?”

²⁷ “Yes, Laad,” shi se, “mi biliiv se a yu a di Krais, yu a Gad Bwai Pikni we kom iina di worl.”

²⁸ Afta Maata se dis ya, shi go we go kaal Mieri ar sista wan said an tel ar se, “Di Tiicha de ya, an im a aks fi yu.”

²⁹ Wen Mieri ier dis ya, shi get op faas faas an go wich paat Jiizas did de.

³⁰ (Nou Jiizas neehn riich iina di toun yet; im did de a di siem plies wich paat Maata did miit im.)

³¹ Wen di Juu dem fram Jeruusilem we did iina di ous a osh Mieri si ou shi get op faas an go we, dem fala baka ar, kaa dem did fiil se shi did a go a di griev go baal fi ar breda.

³² Wen Mieri kech we paat Jiizas did de, shi jrap arself a im fut an se, “Laad, ef yu did onggl de ya, mi breda wudn ded.”

³³ Wen Jiizas si ar a ala an a baal, an si di Juu dem we did kom wid ar a baal tu, im aat muuv.

³⁴ “Wich paat unu put im?” Jiizas aks dem. “Kom, Laad, kom an si,” dem se tu im.

³⁵ Jiizas baal.

³⁶ Den di Juu dem se, “Ku de, unu si umoch im did lov im!”

³⁷ Bot som a dem se, “Da man ya mek di blain man kyan si. So, im kudn du sopm fi mek Lazaros no ded?”

³⁸ Wa Jiizas si toch im aat wan muo taim, an im go wich paat di griev did de. (Nou, di griev a did wan kiev wid wan stuon infronta it.)

³⁹ “Tek we di stuon,” Jiizas se. “Bot Laad,” di ded man sista, Maata, se, “bai nou di plies mos sumel bad bad, kaaz a fuo die im iin de fa.”

⁴⁰ Den Jiizas se, “Duohn mi tel yu se ef yu biliiv, yu wuda si ou Gad big an powaful?”

⁴¹ So dem muuv we di stuon. Den Jiizas luk op iina di skai an se, “Faada, mi tangk yu fi lisn mi.

⁴² Mi nuo se yu eva lisn tu mi, bot mi a se dem sitn ya fi di siek-a di kroud a piipl we de ya-so, so dat dem kyan biliiv se a yu sen mi kom.”

⁴³ Afta Jiizas don se dat, im baal out loud loud se, “Lazaros, kum out!”

⁴⁴ Di ded man kom out wid im an an fut dem tai op wid piis piis a klaat. Piis a klaat did rap roun im fies. Den Jiizas se tu dem se, “Tek di griev kluoz aafa im an mek im gwaan.”

⁴⁵ So nou, nof a di Juu dem we did kom luk fi Mieri biliiv iina Jiizas wen dem si we im du.

⁴⁶ Bot som a dem go tu di Farisii dem an tel dem we Jiizas du.

⁴⁷ Den di ed priis dem an di Farisii dem kaal wan miitn fi di liida dem. “Wa wi a du?” dem aks. “Kaa da man ya a wok som powaful mirikl.

⁴⁸ Ef wi mek im gwaan siem wie, evribadi a-go biliiv iina im, an di Ruoman ruula dem a-go kom an tek we Gad ous fram wi an ron wi piipl dem fram outa wi konchri.”

⁴⁹ Den wan a di liida dem we niem Kaiyafas, an we did a di liida fi di priis dem da ier de, taak op an se, “Unu no nuo a ting!

⁵⁰ Unu no si se it beta fi wan man ded fi di piipl dem dan fi mek di uol konchri ded aaf?”

⁵¹ (Nou, Kaiyafas neehn se dat pan im uon so, bot chuu im did a di liida fi di priis dem da ier de, im se Jiizas wuda ded fi di Juu piipl dem bifuo it iivn apm.

⁵² Bot no fi dem wan, bot fi mek aal a Gad pikni dem we skyata skyata aal uova di plies kom tugeda iina wan.)

⁵³ So fram da die de, dem mek plan wid dem wan aneda fi kil Jiizas.

⁵⁴ Siek-a dat nou, Jiizas kip we fram di Juu piipl dem we kom fram Judiya. Im lef go a wan plies nier di dezot, wan toun niem Iifriem. An im tan de wid im falara dem.

⁵⁵ Wen a did nieli taim fi di Juu piipl dem Paasuova Alidie, uol iip a dem lef konchri an go op a Jeruusilem so dem kuda get demself kliin an redi fi di alidie.

⁵⁶ Dem did a luk aad fi Jiizas, an did a se tu dem wan aneda wen dem did a tan op iina Gad ous se, “Wa yu tingk? Yu tingk se im naa kom a Paasuova?”

⁵⁷ (Nou, di ed priis dem an di Farisii dem did gi out aada se ef nobadi fain out we Jiizas de, dem fi tel dem so dem kyan get fi lak im op.)