Read Jamaican Patois Jan 12 Bible Online

Jan 12 - Jamaican Patois bible

Jan 12

¹ Siks die bifuo di Paasuova Alidie, Jiizas go a Betani, di plies we Lazaros, di wan we im did mek kom bak alaiv, did liv.

² So dem chuo big nyaminz fi im de. Maata did a sorv, an Lazaros did de de wid di wan dem we did a sidong wid Jiizas roun di tiebl.

³ Mieri den nou tek wan bakl wid twelv paint a dier porfyuum ail we mek outa riil naad. Shi tek taim chuo it out pan Jiizas fut dem an den shi waip dem aaf wid ar ier. (An di porfyuum did sumel op iina di ous chrang chrang.)

⁴ Bot wan a Jiizas falara dem, Juudas Iskyariyat, di wan we a-go sel im out se,

⁵ “Wa mek sumadi neehn sel da porfyuum ya fi chrii onjrid silva kain an gi di moni tu puo piipl?”

⁶ (Nou, im neehn a se so kaaz im did kieta bout puo piipl; a chuu im a did tiif. A im did a luk aafa di chred bag, an im yuus tu tiif out wa dem put iin de.)

⁷ “Lef ar,” Jiizas se, “shi kip it fi di die wen mi a-go beri.

⁸ Unu eva a-go av puo piipl roun unu, bot unu naa go av mi roun ya wid unu fi eva.”

⁹ Nou wan big kroud a Juu piipl fram Judiya ier se Jiizas did de de-so, so dem go de. Dem go, no onggl kaaz im did de de, bot so dat dem kuda si Lazaros, di wan we im did mek kom bak alaiv.

¹⁰ So di ed priis dem mek plan fi kil Lazaros tu,

¹¹ kaa siek-a Jiizas mek im kom bak alaiv nof a di Judiya Juu piipl dem did a-go tu Jiizas an staat chos iina im.

¹² Di neks die di big kroud we did kom fi di Paasuova Alidie ier se Jiizas did de pan im wie a go a Jeruusilem.

¹³ So dem tek som paam chrii branch an go fi miit im, an dem shout out loud loud se, “Priez Gad!” “Gad bles di wan we im sen kom! im sen im wid fi’im powa!” “Gad bles di wan we a king iina Izrel!”

¹⁴ Jiizas fain wan yong dangki an sidong pan it. Nou wa apm, apm siem laka ou it rait dong iina Gad wod. It se,

¹⁵ “No fried, piipl we liv a Zaiyan; ku de, yu King a kom, im sidong pan wan yong dangki.”

¹⁶ (Nou Jiizas falara dem neehn andastan dem sopm ya fos aaf. A onggl afta Jiizas ded an kom bak alaiv an Gad shuo ou im big an powaful dem memba se dem sitn ya did rait dong bout im an dat dem did apm tu im.)

¹⁷ So nou, di kroud a piipl we did de roun Jiizas wen im did kaal Lazaros outa di griev an mek im kom bak alaiv did a tel ada piipl bout wa did apm tu Lazaros.

¹⁸ So di kroud a piipl go out fi miit Jiizas, kaa dem ier bout di big mirikl we im did du.

¹⁹ So di Farisii dem se tu dem wan aneda se, “Unu si se unu kyaahn du wan ting. Ku de, di uol worl a ron aafa im!”

²⁰ Nou yu did av som Griik piipl we di de mongks dem we did a go a Jeruusilem fi di Paasuova Alidie fi priez Gad.

²¹ Dem go tu Filip, we did kom fram Betsieda iina Gyalalii, an dem se tu im se, “Wi wuda laik ef wi kuda si Jiizas, sar.”

²² Filip den go tel Anju, an di tuu a dem go tel Jiizas.

²³ Jiizas se tu dem se, “Di taim kom fi Gad shuo ou di Man we Gad pik big an powaful.

²⁴ Mi a tel unu fi chuu chuu, ef wan wiit siid no jrap a grong an ded an ratn, it eva a-go tan wan wiit siid. Bot ef it get fi ded an ratn, it gruo an bier nof ada siid.

²⁵ “Di sumadi we lov im laif tu moch a-go luuz it, bot di wan we no eng aan pan dem laif iina da worl ya a-go get fi kip it fi eva.

²⁶ Enibadi we waahn sorv mi afi fala mi. Eniwe mi de, dem a-go de de tu, an mi Faada a-go big dem op.

²⁷ “Mi aat evi, rait ya nou. An wa mi fi se? ‘Faada, no mek mi go chuu da sofarieshan ya?’ Nuo! A fi da sed riizn ya mi kom iina di worl — fi go chuu di sofarieshan we a kom.

²⁸ Faada, big op yuself an yu niem!” Den wan vais fram outa di skai se, “Mi big it op aredi, an mi gweehn big it op wan neda taim.”

²⁹ Di kroud a piipl we did de de an ier di vais se a ruol tonda did ruol. Ada piipl se a ienjel did a taak tu im.

³⁰ Jiizas se, “A no fi mi, bot a fi fu’unu uona gud mek unu get fi ier di vais.

³¹ A di taim nou wen Gad gweehn joj di piipl dem we iina di worl; a nou di ruula fi da worl ya gweehn get fling out.

³² An mi, wen mi get lif op aafa di ort, mi gweehn mek evribadi kom tu mi.”

³³ (Im se dis ya fi mek dem nuo ou im did a-go ded.)

³⁴ So di kroud se tu im se, “Di Laa tel wi se di Krais gweehn stie fi eva, so ou yu a taak bout, ‘Di Man we Gad Pik a-go get lif op’? A uu a dis ya ‘Man we Gad Pik’?”

³⁵ Den Jiizas se tu dem se, “Unu a-go av di lait wid unu fi onggl likl bit langga. Waak wen unu av di lait, bifuo daaknis tek unu uova. Sumadi we a waak iina daaknis no nuo wich paat im a go.

³⁶ Chos iina di wan we gi lait wail unu av im wid unu, chos iina im so unu kyan bi piipl we bilang tu di lait.” Afta Jiizas don taak, im lef go we go aid imself fram di kroud.

³⁷ Aal afta wen Jiizas du di uol a dem powaful sitn de infronta di piipl dem, dem stil mek op dem main fi no chos iina im.

³⁸ Dis ya apm fi mek we Aizaiya di prafit did se kom chuu. Im se, “Laad, uu biliiv wa wi tel dem se? A uu di Laad shuo im powa tu?”

³⁹ An dem kudn chos iina im kaaz jos laik wa Aizaiya se a wan neks plies,

⁴⁰ “Gad blain dem an im mek dem aat tof, so dem kyan niida si wid dem yai, ar andastan iina dem main, ar ton tu mi, Gad, an chienj dem wiez so mi go mek dem get beta.”

⁴¹ Aizaiya se dem sitn ya, kaaz im did si ou Krais big an powaful. Im did si an taak bout im.

⁴² A di sed taim stil, uol iip a piipl, aal som a di Juu liida dem, chos iina im. Bot dem wudn se dem biliiv se Jiizas a di Krais, kaa dem did fried a di Farisii dem we wuda chuo dem outa di Juu choch.

⁴³ Yu si, dem did rada big op fram piipl muo dan fram Gad.

⁴⁴ Den Jiizas shout out pan tap a im vais an se, “Di sumadi we chos iina mi no chos iina mi wan, im chos iina di wan we sen mi kom ya tu.

⁴⁵ Dem we si mi, si di wan we sen mi kom ya tu.

⁴⁶ Mi kom iina di worl laka wan lait, so dat dem we chos iina mi no gweehn tan iina daaknis.

⁴⁷ “Ef enibadi ier wa mi se bot no du wa mi tel dem fi du, mi naa go rait dem aaf, kaa mi neehn kom ya fi rait aaf di piipl dem iina di worl; mi kom ya fi siev dem.

⁴⁸ Yu av wan joj fi di piipl dem we ton dem bak pan mi, an no lisn tu wa mi se. Di sopm dem we mi se gweehn joj dem pan di laas die.

⁴⁹ Kaa di sopm dem we mi se, mi no se pan mi uon, a di faada we sen mi kom ya, a im tel mi we mi fi se an ou fi se it.

⁵⁰ An mi nuo se we im tel mi fi du gweehn mek piipl liv fi eva. So wa mi se a jos wa di Faada tel mi fi se.”