Read Jamaican Patois Jan 13 Bible Online

Jan 13 - Jamaican Patois bible

Jan 13

¹ Nou a did jos bifuo di Paasuova Alidie, an Jiizas did nuo se di taim wen im wuda lef di worl an go we tu im Faada did kom. Im did lov dem we did a fi im iina di worl, an da taim ya im shuo dem ou im did riili riili lov dem.

² Sopa did a sorv, an di devl did don put it iina Juudas, Saiman bwai pikni, aat fi sel out Jiizas.

³ Nou, Jiizas did nuo se di Faada did gi im powa uova evriting, dat a Gad im kom fram, an dat a Gad im a go bak tu,

⁴ so im get op fram roun di tiebl, tek aaf im ruob an rap wan towil roun im wies.

⁵ Afta im du dat de, im chuo waata iina wan biesn an staat fi wash im falara dem fut. Im den jrai dem aaf wid di towil we im did rap roun im wies.

⁶ Wen im kech a Saiman Piita, Saiman Piita tel im se, “Laad, yu a go wash fi mi fut dem?”

⁷ So Jiizas se tu im se, “Yu no get wa mi a du rait ya nou, bot yu wi andastan afta dem sitn ya apm.”

⁸ Piita se, “Nuo sa! Yu no gweehn wash mi fut dem!” Bot Jiizas ansa im se, “Ef mi no wash yu, yu na’av no lat an paat wid mi.”

⁹ So Saiman Piita se, “Laad, no onggl wash mi fut dem! Wash mi ed an mi an dem tu!”

¹⁰ Jiizas ansa an se, “Sumadi we bied aredi onggl afi wash im fut, kaa im uol badi wuda kliin aredi. Unu kliin, bot a no aal a unu kliin.”

¹¹ (Im se so, kaa im did don nuo di wan we did a go sel im out. A dat mek im se, “A no aal a unu kliin”.)

¹² Wen Jiizas don wash im falara dem fut, im put aan bak im ruob an go bak go sidong roun di tiebl. Im den aks dem se, “Unu get we mi dis du tu unu?

¹³ Unu kaal mi ‘Tiicha’ an unu kaal mi ‘Laad,’ an unu rait, kaa mi a dat fi chuu.

¹⁴ Nou, ef mi, we a unu Laad an unu Tiicha, wash unu fut, unu mos wash unu wan aneda fut tu.

¹⁵ Mi a set egzampl fi unu fala. Wa mi du fu’unu, unu fi du fu’unu wan aneda.

¹⁶ Mi a tel unu fi chuu chuu, no sorvant no biga dan im maasta, an no mesinja no biga dan di sumadi we sen im.

¹⁷ Ef unu andastan an du dem sopm ya wa mi a se, Gad a-go bles unu.

¹⁸ “Wa mi a se a no bout aal a unu. Mi don nuo wich wan a unu mi pik aredi. Bot wa Gad wod se afi kom chuu. It se dat, ‘Di sumadi we nyam fi mi uona bred ton gens mi.’

¹⁹ Mi a tel unu dem sitn ya nou bifuo dem apm, so dat wen dem du apm, unu wi biliiv se mi a uu mi se mi bi.

²⁰ Fi chuu chuu mi a tel unu se, enibadi we tek iin di sumadi mi sen tek mi iin tu, an enibadi we tek mi iin tek iin di wan we sen mi kom.”

²¹ Wen Jiizas don se dis ya, im aat get evi an im se, “Fi chuu chuu mi a tel unu se, wan a unu gweehn sel mi out.”

²² So im falara dem staat luk pan dem wan aneda kaa wa Jiizas se tu dem did a bada dem ed.

²³ Wan a dem, di wan we Jiizas did wel lov, did de a di tiebl a sidong saida im.

²⁴ So Saiman Piita mek sain tu di falara we Jiizas lov an tel im fi aks Jiizas a wich wan a dem im a taak bout.

²⁵ Di falara liin bak pan Jiizas ches, an aks im se, “Laad, a uu?”

²⁶ So Jiizas ansa an se, “A di wan we mi gweehn gi da piis a bred ya afta mi dip it iina di boul.” Den, wen im dip di bred iina di boul im gi it tu Juudas Iskyariyat, Saiman bwai pikni.

²⁷ An siem taim Juudas tek di bred so, Sietan tek uova im aat. “Mikies an du we yu bout fi du,” Jiizas se tu im.

²⁸ Bot non a dem we did sidong a di tiebl did nuo wa mek Jiizas did tel Juudas dat de.

²⁹ Bot chuu Juudas did inchaaj a di chred bag, som a dem did tingk se Jiizas did a tel im fi go bai aal a wa dem did fi get fi di Bred Widout Yiis Alidie, ar fi go gi sitn outa it tu puo piipl.

³⁰ Juudas tek di bred an im go we sed taim. (Nou, a did nait.)

³¹ Afta wen Juudas lef go we, Jiizas se, “Gad gweehn shuo ou di Man we im Pik big an powaful, an Gad gweehn yuuz im fi shuo ou im Gad big an powaful.

³² Ef di Man we Gad Pik shuo piipl ou Gad big an powaful, den suun suun Gad imself gweehn shuo dem ou di Man we im Pik big an powaful.

³³ “Mi pikni, mi a-go de ya wid unu fi onggl likl bit langga. Unu gweehn luk fi mi, bot jos laik wa mi did se tu di Juu liida dem mi a tel unu di sed ting, ‘Wich paat mi de go, unu kyaahn kom de.’

³⁴ “Mi a tel unu fi du sopm nyuu — lov unu wan aneda. Sed wie mi lov unu, a so unu fi lov unu wan aneda.

³⁵ Wen unu lov unu wan aneda, a so piipl gweehn nuo se unu a fi mi falara.”

³⁶ Saiman Piita aks im se, “Laad, a we yu a go?” Jiizas ansa im se, “Yu kyaahn fala mi go wich paat mi a go rait ya nou, bot yu wi kom likl muo.”

³⁷ So Piita aks im se, “Laad, wa mek mi kyaahn fala yu nou? Mi wuda ded fi yu.”

³⁸ Bot Jiizas se tu im se, “Yu wuda ded fi mi fi chuu? Mi naa lai yu, bot bifuo di ruusta kruo, yu gweehn se yu no nuo mi chrii taim!”