Read Jamaican Patois Jan 14 Bible Online

Jan 14 - Jamaican Patois bible

Jan 14

¹ “No wori unuself. Chos iina Gad, an chos iina mi tu.

² A nof ruum iina mi Faada ous. Ef a neehn so it go mi wudn se notn tu unu. Mi a go we fi fiks op wan plies fi unu.

³ An afta mi go we go fiks it op, mi gweehn kom bak kom tek unu kyari go we wid mi, so dat unu kyan de wid mi eniwe mi de.

⁴ Unu nuo di wie fi go wich paat mi a go.”

⁵ Tamas den se tu im se, “Laad, wi no nuo di wie fi go wich paat yu de go. Ou wi kyan get fi nuo di wie fi go de?”

⁶ Jiizas ansa im an se, “Mi a di wie, mi a di chuut, mi a di wan we mek piipl kyan liv. Nobadi kyaahn go tu di Faada ef dem no go chuu mi.

⁷ Nou ef unu nuo mi fi chuu, den unu wuda nuo mi Faada tu. Fram nou aan, unu nuo im an unu si’im.”

⁸ Filip se, “Laad, mek wi si di Faada an wi wi satisfai wid dat.”

⁹ So Jiizas se tu im se: “Yu no nuo mi, Filip, afta mi de mongks unu fi so lang? Enibadi we si mi si di Faada tu. Ou yu fi a aks mi se, ‘Shuo wi di Faada’?

¹⁰ Yu no biliiv se mi liv iina di Faada, an di Faada liv iina mi? Di sitn dem we mi se mi no jos se dem aafa mi uon. A di Faada we liv iina mi a du im wok.

¹¹ Chos mi wen mi se mi liv iina di Faada an dat di Faada liv iina mi. An ef unu kyaahn biliiv mi siek-a wa mi se, den biliiv mi siek-a di mirikl dem we unu si.

¹² Fi chuu chuu mi a tel unu se enibadi we biliiv iina mi a-go wok di powaful mirikl dem we mi a du. Dem aal a-go wok muo powaful mirikl dan wa mi du nou, kaa mi a go baka di Faada.

¹³ An mi wi du eniting unu aks fa kaa unu a mi falara. Mi gweehn dwi’it so dat di Bwai Pikni kyan get fi shuo ou di Faada big an powaful.

¹⁴ Unu kyan aks mi fi eniting kaa unu a mi falara, an mi wi gi’it tu unu.

¹⁵ “Ef unu lov mi fi chuu, unu gweehn du aal a wa mi tel unu fi du.

¹⁶ An mi a-go aks mi Faada fi sen wan neda sumadi fi elp unu an de wid unu aal di taim.

¹⁷ Da sumadi de a di Spirit we shuo piipl di chuu sitn dem bout Gad. Di worliyan dem kyaahn tek im iin an mek im kanchuol dem laif, kaa dem no si im an dem no nuo im. Bot unu nuo im, kaaz im liv wid unu an a-go de insaida unu.

¹⁸ “Mi naa go lef unu laik se unu a pikni widout no mada ar faada. Mi a kom bak tu unu.

¹⁹ Likl muo fram nou, di worliyan dem naa go si mi agen, bot unu gweehn si mi. Kaa mi a liv, unu gweehn liv tu.

²⁰ Wen da die de kom, unu a-go si se mi liv iina mi Faada, dat unu liv iina mi an dat mi liv iina unu.

²¹ Di sumadi we nuo an du wa mi se, a dem lov mi. Mi Faada a-go lov di sumadi we lov mi. Mi a-go lov dem tu, an mi gweehn shuo dem a uu mi bi.”

²² Den Juudas — no Juudas Iskyariyat nou, wan neks man we niem Juudas tu — aks im se, “Bot, Laad, wa mek wi a-go kyan si yu, bot yu naa go mek di worliyan dem si yu?”

²³ Jiizas se tu im se, “Ef sumadi lov mi den da sumadi de a-go du wa mi se dem fi du. Mi Faada a-go lov dem, an di tuu a wi a-go liv wid dem.

²⁴ Sumadi we no lov mi, no du wa mi se. Di sitn dem unu ier mi se, a no mi kom op wid dem; a mi Faada, di wan we sen mi kom ya.

²⁵ “Mi a se dem sitn ya tu unu wail mi de mongks unu.

²⁶ Bot di elpa, di Uoli Spirit, we di Faada gweehn sen kaa unu a mi falara, im a-go tiich unu evriting an im a-go memba unu bout evriting mi tel unu.

²⁷ “Mi a lef go we, bot mi a-go mek unu av piis iina unu aat — di kain-a piis we mi av iina fi mi aat. A no di sed kain-a piis yu get fram di worl. No mek unu aat bada unu, an no kech unu fried.

²⁸ Unu ier mi tel unu se, ‘Mi a go we an mi a kom bak tu unu.’ Ef unu lov mi, unu wuda glad se mi a go a mi Faada, kaa mi Faada biga dan mi.

²⁹ Mi a tel unu bifuo it apm, so dat wen it du apm unu kyan biliiv se a chuu mi did de taak.

³⁰ Mi naa go taak tu unu fi moch langga, kaa di ruula fi da worl ya de pan im wie a kom. Im no av no powa uova mi.

³¹ Mi onggl a du wa mi Faada tel mi fi du, so dat di piipl dem iina di worl kyan nuo se mi lov mi Faada. “Kom! Mek wi lef go we fram da plies ya.”