Read Jamaican Patois Jan 15 Bible Online

Jan 15 - Jamaican Patois bible

Jan 15

¹ “Mi a wan chrii, di riil chrii we gud fruut gruo pan, an mi Faada a di gyaadna we luk aafa di chrii.

² Im brok aaf aafa mi aal a di lim dem we no bier fruut. An im chrim op di lim dem we bier fruut so dat dem kyan bier muo.

³ Unu get chrim op aredi, an a di sitn dem we mi tel unu mek dat apm.

⁴ Tan wid mi, an mi wi tan wid unu. Wan branch kyaahn bier fruut pan it uon; it afi tan pan di chrii. A siem wie unu naa go kyan bier fruut ef unu no tan wid mi.

⁵ “Mi a di chrii; unu a di lim dem. Evri lim we a paat a mi — an we mi a paat a — dem bier nof fruut. Unu kyaahn du wan ting widout mi.

⁶ Ef sumadi no tan pan mi, dem komiin laka di lim dem we get fling we an den jrai op. Piipl pik op dem lim de, fling dem iina faiya an bon dem op.

⁷ Ef unu tan pan mi an ef wa mi se tan iina unu, aks fi eniting unu waahn, an unu wi get it.

⁸ Wen unu bier nof fruut an shuo se unu a fi mi falara, da wie de mi Faada get nof rispek.

⁹ Mi lov unu jos laka ou mi Faada lov mi. No ton we fram di lov we mi av fi unu.

¹⁰ Ef unu du wa mi tel unu fi du den unu naa go ton we fram di lov mi av fi unu, siem laka ou mi du wa mi Faada tel mi fi du an no ton we fram di lov we im av fi mi.

¹¹ Mi a tel unu aal a dem sitn ya, so unu wi glad iina unu aat siem laka ou mi glad iina fi mi.

¹² “Dis ya a wa mi waahn unu fi du: lov unu wan aneda siem laka ou mi lov unu.

¹³ Di bes wie sumadi kyan shuo se dem lov dem fren a fi gi op dem laif fi dem.

¹⁴ Ef unu du wa mi tel unu fi du den mi an unu a fren.

¹⁵ Mi naa kaal unu sorvant no muo, kaa sorvant no nuo dem maasta bizniz. Mi a kaal unu mi fren, kaa mi mek unu nuo bout evriting mi Faada tiich mi.

¹⁶ “A no unu pik mi, a mi pik unu an put unu wan said fi bier nof fruut — di kain-a fruut we a-go laas fi eva. Wen dat apm, mi Faada gweehn gu’unu eniting unu aks im fa kaa unu a mi falara.

¹⁷ A da sopm ya mi a tel unu fi du: lov unu wan aneda.

¹⁸ “Ef di piipl dem iina di worl iet unu, memba se dem did iet mi fos.

¹⁹ Ef unu did komiin laka di piipl dem iina di worl, dem wuda lov unu laka ou dem lov dem uona piipl. Bot unu no komiin laka di piipl iina di worl, kaa mi pik unu out fram mongks dem. A it mek dem iet unu.

²⁰ Memba we mi did tel unu se, ‘No sorvant no biga dan im maasta.’ Ef dem mek mi sofa den dem mos a-go mek unu sofa tu. Ef dem du wa mi tiich dem fi du, dem a-go du wa unu tiich dem fi du tu.

²¹ Bot dem a-go du aal a dem sitn ya tu unu chuu unu a fi mi, an kaa dem no nuo di wan we sen mi kom ya.

²² Ef mi neehn kom an taak tu dem, dem wudn gilti a notn rang. Bot rait ya nou, dem na’av notn fi yuuz an se dem no gilti.

²³ Enibadi we iet mi, iet mi Faada tu.

²⁴ Dem wudn gilti ef mi neehn du di powaful sitn dem we dem neva si nobadi els du. Bot nou dem si dem powaful sitn ya, an dem iet mi an mi Faada siem wie.

²⁵ Bot dis ya apm so dat wa rait dong iina Gad wod wuda kom chuu. It se, ‘Dem iet mi fi notn at aal.’

²⁶ “Mi a-go sen di Elpa fram di Faada tu unu. Im a di Spirit we shuo piipl di chuu sitn dem bout Gad, an im a di wan we kom fram di Faada. Wen im kom, im gweehn tel piipl bout mi.

²⁷ An unu fi tel piipl bout mi tu, kaa unu did de wid mi fram di staat.