Read Jamaican Patois Jan 17 Bible Online

Jan 17 - Jamaican Patois bible

Jan 17

¹ Afta Jiizas don se dem sitn ya, im luk op iina di skai an prie tu Gad se: “Faada, di taim kom nou. Shuo evribadi ou yu Bwai Pikni big an powaful, so im kyan shuo dem ou yu big an powaful.

² Kaa yu gi yu Bwai Pikni powa uova evribadi, so dat im kyan mek di piipl dem we yu gi tu im liv fi eva.

³ Fi liv fi eva miin se dem nuo yu, di onggl wan we a riili Gad, an dat dem nuo Jiizas Krais, di wan yu sen kom.

⁴ Mi shuo piipl pan ort ou yu big an powaful, wen mi du di wok we yu did gi mi fi du.

⁵ So, Faada, rait we yu de nou, mek mi get nof rispek, di sed kain-a rispek mi did av wen mi did de de wid yu fram bifuo di worl did mek.

⁶ “Di piipl dem fram outa di worl we yu gi mi, mi shuo dem a uu yu bi. Dem did a fi yu bot yu gi mi dem, an dem fala we yu tel dem fi du.

⁷ Nou dem nuo se evriting we mi av kom fram yu,

⁸ kaa mi tel dem bak evriting we yu tel mi an dem biliiv it. Dem nuo fi shuor se a yu mi kom fram an dem biliiv se a yu sen mi kom.

⁹ “Mi a prie fi dem. Mi naa prie fi di worliyan dem. Mi a prie fi dem we yu gi mi, kaa dem a fi yu.

¹⁰ Aal a we mi av a fi yu, an aal a we yu av a fi mi. An dem shuo ou mi big an powaful.

¹¹ “Mi naa go de iina di worl no langga. Mi a kom tu yu, bot dem stil a-go de iina di worl. Faada we uoli, yuuz yu powa an gyaad dem — di powa we yu gi mi — yuuz it an gyaad dem, so dem kyan ton wan, siem laka ou mi an yu a wan.

¹² Wen mi did de mongks dem, mi yuuz yu powa fi gyaad an kip dem sief — di powa we yu did gi mi. Non a dem neehn laas, onggl di wan we did baan fi ded an go a el. An dis ya apm so dat wa Gad wod se wuda kom chuu.

¹³ “Mi a kom a yu nou, bot mi a se aal a dem sitn ya wail mi stil iina di worl, so dat dem kyan api kyaahn don jos laka ou mi api.

¹⁴ Mi tel dem we yu tel mi fi tel dem, an di worliyan dem iet dem, kaa, jos laka mi, dem no worliyan.

¹⁵ Mi naa prie an aks yu fi tek dem outa di worl, bot dat yu fi gyaad dem fram di wikid wan.

¹⁶ Dem no worliyan siem laka ou mi no worliyan.

¹⁷ Yuuz di chuut mek dem liv fi yu. Fi yu mesij a di chuut.

¹⁸ Siem laka ou yu sen mi kom iina di worl, a siem wie so mi sen dem iina di worl.

¹⁹ A siek-a dem mek mi gi op miself fi sorv yu. Mi dwi’it so dem mait-a riili riili gi op demself fi sorv yu tu.

²⁰ “Mi naa prie fi dem falara ya wan. Mi a prie fi dem we a-go biliiv iina mi wen dem ier wa dem falara ya se.

²¹ Faada, mi prie se aal a dem kom tugeda iina wan, siem laka ou yu liv iina mi an mi liv iina yu. An mi prie tu se dem wi liv iina mi an yu, so dat di worliyan dem kyan biliiv se a yu sen mi kom.

²² Mi gi dem di uol iip a rispek yu did gi mi so dat dem kyan kom wan jos laka ou mi an yu a wan:

²³ mi iina dem an yu iina mi — so dem kyan komiin laka wan, an so di piipl dem iina di worl mait-a nuo se a yu sen mi kom, an dat yu lov mi falara dem siem laka ou yu lov mi.

²⁴ “Faada, mi waahn di piipl dem we yu gi mi fi de eniwe mi de, so dat dem kyan si di uol iip a rispek we yu gi mi, kaa yu lov mi fram bifuo di worl did mek.

²⁵ “Faada, we eva du rait, iivn duo di piipl dem iina di worl no nuo yu, mi nuo yu, an dem piipl ya nuo se a yu sen mi kom ya.

²⁶ Mi mek dem nuo yu, an mi a-go gwaan mek dem nuo yu, so dat dem mait-a kyan lov dem wan aneda siem laka ou yu did lov mi, an so mi kyan liv iina dem.”