Read Jamaican Patois Jan 2 Bible Online

Jan 2 - Jamaican Patois bible

Jan 2

¹ Tuu die afta dat apm, yu did av wan wedn a wan toun niem Kiena. Kiena did de iina Gyalalii. Jiizas mada did de a di wedn,

² an Jiizas an im falara dem did de de, kaa dem did get invait tu.

³ Di piipl dem a di wedn jringk aaf di wain, an wen it don, Jiizas mada se tu im se, “Dem na’av no muor wain lef.”

⁴ Jiizas se tu ar se, “Mama, wa mek yu de tel mi dat? Fi mi taim no kom yet.”

⁵ So im mada tel di sorvant dem we did de de se, “Eniting im tel unu fi du, dwi’it.”

⁶ Nou siks waata jaar we mek outa stuon did de de. Di Juu piipl dem kip waata iina dem fi wash an mek demself kliin, kaaz a dat fi dem Laa did se dem fi du. Wan a di jaar dem kuda uol bout twenti tu toti gyalan a waata.

⁷ Jiizas se tu di sorvant dem se, “Ful op di jaar dem wid waata.” So dem ful dem op tu di brim.

⁸ Den im se tu dem se, “Nou, chuo out som a wa iina dem an kyari it go gi di fuud manija.” An dem du wa im tel dem fi du.

⁹ Wen taim di manija ties di waata we Jiizas ton iina wain, im kaal fi di man we did a get marid. Nou, di manija neehn nuo we di wain did kom fram. (Bot di sorvant dem we chuo it out kom gi im did nuo duo.)

¹⁰ Di manija kaal di man an se tu im se, “Wen ada piipl a get marid, dem shier out di bes wain fos. An afta di piipl dem jringk an jongk aaf, a dat de taim de dem shier out di chiip wain. Bot yu nou, yu shier out di bes wain laas!”

¹¹ Nou, Jiizas wok uol iip a mirikl an da wan ya a did di fos wan outa aal a dem. Im did du it iina Kiena we de a Gyalalii. Da wie de, im shuo ou im big an powaful. An im falara dem biliiv iina im.

¹² Afta di wedn, im, im mada, im breda dem an im falara dem go a Kyaporniyom, an dem tan de fi kopl die.

¹³ Nou, a did nieli taim fi di Paasuova alidie, so Jiizas go op a Jeruusilem.

¹⁴ Wen im riich de, im si piipl a sel kou an shiip an dov iina di yaad wich paat Gad ous de. An im si di piipl dem we chienj out moni tu a sidong a dem tiebl.

¹⁵ So im get som ruop an tek dem mek wan wip. Den im yuuz di wip an ron out di uol a di sela dem outa di yaad: dem an dem kou an dem shiip an dem dov. Im lik uova di piipl dem we a chienj out moni kain dem, an im ton uova aal a dem tiebl dem.

¹⁶ Im se tu dem we did a sel di dov dem se, “Tek we dem sitn ya outa ya! No tek mi Faada ous ton maakit!”

¹⁷ Sed taim dis ya apm, im falara dem memba ou Gad wod se, “Di wie mi lov yu ous, it de go kaaz mi fi ded.”

¹⁸ So di Juu liida dem aks im se, “Wa kain-a mirikl yu kyan wok fi wi? Wa kain-a sain yu kyan gi fi shuo wi se yu av di rait fi du aal a dem sitn ya?”

¹⁹ So Jiizas se tu dem se, “Tier dong an mash op da ous ya, an mi wi bil it op bak iina chrii die.”

²⁰ Dem ansa im bak an se, “A faati-siks ier it tek fi mek da ous ya, an yu gweehn bil it op bak iina onggl chrii die?”

²¹ Bot a no Gad ous Jiizas did a taak bout. A im badi im did a taak bout.

²² Nou a afta Jiizas ded an kom bak alaiv im falara dem memba se im did se dem sitn de. An dem biliiv wa rait dong iina Gad wod an wa Jiizas did se.

²³ Nou, wen Jiizas did stil de a Jeruusilem pan di Paasuova alidie, nof piipl put dem chos iina im, kaa dem si di mirikl dem we im wok.

²⁴ Bot Jiizas neva chos dem non at aal, kaaz im did don nuo ou piipl tan.

²⁵ Nobadi neehn afi tel im bout ou piipl tan, kaa im did nuo aredi we iina piipl aat.