Read Jamaican Patois Jan 20 Bible Online

Jan 20 - Jamaican Patois bible

Jan 20

¹ Orli Sonde maanin, di fos die a di wiik, wen it did stil daak, Mieri Magdaliin go a di tuum an si se di stuon we did a kova di fronta di tuum did ruol we.

² So shi ron go a Saiman Piita an di ada falara we Jiizas did lov, an se tu dem se, “Dem tek di Laad outa di tuum, an wi no nuo we paat dem put im!”

³ So Piita an di ada falara lef go a di tuum.

⁴ Di tuu a dem did a ron, bot di wan we Jiizas did lov ron lef Piita an riich a di tuum fos.

⁵ Im ben dong an luk iina di tuum an si di linin klaat dem we did rap roun Jiizas badi, bot im neehn go iin de.

⁶ Den Saiman Piita we did a kom baka im, riich an go chriet iina di tuum. Im si di linin klaat dem,

⁷ plos di beriyin klaat we did rap roun Jiizas ed pudong iin de. Di ed klaat did fuol op an put wan said. It neva de we di linin klaat dem did de.

⁸ Afta dat, di ada falara, we riich di tuum fos go iin tu. Im si an im biliiv se Jiizas did riili kom bak alaiv.

⁹ (Yu si, aal nou dem neehn get we Gad wod se bout ou Jiizas did afi kom bak alaiv.)

¹⁰ Afta dat di tuu falara dem go baka dem yaad.

¹¹ Bot Mieri did tan op outa duor siem wie a baal, an ben dong a luk iina di tuum.

¹² Shi si tuu ienjel iina wait kluoz sidong wich paat Jiizas badi did de — wan we im ed did de an di ada wan we im fut did de.

¹³ Dem aks ar se, “Uman, wa mek yu a baal?” “Dem tek we mi Laad,” shi se tu dem, “an mi no nuo we paat dem put im.”

¹⁴ Wen shi se dat de, shi ton roun an si sumadi tan op neks tu ar — a did Jiizas — bot shi neehn si se a im.

¹⁵ “Uman,” im se tu ar, “wa mek yu a baal? A uu yu a luk fa?” Chuu Mieri did tingk se a wan gyaadna a taak tu ar, shi se tu im se, “Sar, ef a yu tek im we, tel mi wich paat im de, so mi kyan go fi’im.”

¹⁶ Den Jiizas se tu ar se, “Mieri!” Shi ton fi fies im an baal out iina di Iibruu langwij, “Rabonai!” (dat miin “Tiicha”).

¹⁷ Jiizas se, “No uol aan pan mi, kaa mi no gaan baka mi Faada yet. Go tel yu breda dem se mi se, ‘Mi a go baka mi Faada an fi unu Faada, mi a go baka mi Gad an fi unu Gad.’”

¹⁸ Mieri Magdaliin fain Jiizas falara dem an tel dem se, “Mi si di Laad!” An shi tel dem aal a wa Jiizas tel ar.

¹⁹ Da sed Sonde de, Jiizas falara dem miit op tugeda iina di iivnin. Dem lak di duor dem kaa dem did fried a di Juu liida dem. Jiizas kom iina di ruum an tan op wid dem an se, “Piis!”

²⁰ Wen taim im se dat de, im shuo dem im an dem an im said. An dem did glad kyaahn don wen dem si di Laad.

²¹ So Jiizas se tu dem wan neks taim se, “Piis! Siem laka ou di Faada sen mi iina di worl, a siem wie so mi a sen unu iin de.”

²² Afta im se dat im bluo pan dem an se, “Mek di Uoli Spirit kom iina unu laif.

²³ Ef unu paadn sumadi fi di rang we dem du, Gad a-go paadn dem; ef unu no paadn dem, Gad naa go paadn dem niida.”

²⁴ Nou, Tamas (we dem kaal Didimos), wan a Jiizas twelv falara dem neehn iina di ruum wid di ada falara dem wen taim Jiizas did kom iin de.

²⁵ So di ada falara dem se tu im se, “Wi si di Laad!” Bot im se tu dem se, “Ef mi no si di niel uol dem iina im an dem an get fi put mi fingga iina dem, an ef mi no get fi put fi mi an iina im said, den mi naa go biliiv se a chuu unu a taak.”

²⁶ Iet die afta dat, Jiizas falara dem did iina di sed ous, an Tamas did de de wid dem da taim ya. Iivn duo di duor dem did lak, Jiizas kom iin kom tan op mongks dem sed wie an se, “Piis!”

²⁷ Den im se tu Tamas se, “Put yu fingga ya-so an luk pan mi an dem. Chrech out yu an an put it iina mi said. Tap if-an-bot, an biliiv wa yu si.”

²⁸ Den Tamas se tu im se, “Yu a mi Laad an mi Gad!”

²⁹ So Jiizas se tu im se, “A chuu yu si mi mek yu biliiv se a mi? Gad bles di piipl dem we no si mi bot biliiv iina mi siem wie.”

³⁰ Jiizas du nof muo powaful sitn infronta im falara dem, we no rait dong iina da buk ya.

³¹ Bot dem ya rait dong so unu mait-a biliiv se Jiizas a di Krais, Gad Bwai Pikni, an dat wen unu biliiv iina im, unu kyan av laif we laas fi eva.