Read Jamaican Patois Jan 21 Bible Online

Jan 21 - Jamaican Patois bible

Jan 21

¹ Afta dis ya Jiizas shuo imself tu im falara dem wan muo taim. Da taim ya, im du it a di Taibiiriyos Sii. Dis a wa apm:

² Saiman Piita, Tamas (we dem kaal Didimos), Nataniyel (we kom fram Kiena iina Gyalalii), Zebidii bwai pikni dem, an tuu a Jiizas ada falara dem did de tugeda.

³ “Mi a go kech fish,” Saiman Piita se tu dem. So dem ansa im se, “Wi a kom wid yu.” Dem go iina di buot, bot da nait de, dem no kech a ting.

⁴ Orli iina di maanin, Jiizas did a tan op a di sii-said, bot im falara dem neehn si se a im.

⁵ Im kaal out tu dem an se, “Brejrin, unu na’av no fish?” “Nuo,” dem ansa.

⁶ So im tel dem se, “Fling uova unu net pan di rait-an-said a di buot an unu wi fain som.” So dem du dat, an dem kudn pul op bak di net, siek-a di uol iip a fish we dem kech wid it.

⁷ Den di falara we Jiizas did lov tel Piita se, “A di Laad!” Sed taim Saiman Piita ier dat de, im rap di likl kluoz we im did av aan roun im (kaa im neehn av aan notn anda it) an im jomp iina di waata.

⁸ Di ada falara dem fala baka Piita. Dem did a aal iin di net ful-a fish kaa dem neehn de faar fram shuor — onggl bout onjrid yaad.

⁹ Wen dem riich iin, dem si kuol faiya wid fish an bred pan it.

¹⁰ Jiizas se tu dem se, “Kyari som a di fish we unu kech kom.”

¹¹ Saiman Piita klaim iina di buot an aal iin di net. It did ful-a big fish, wan onjrid an fifti chrii a dem, bot wid aal dem mount a fish de, di net neehn bos op.

¹² “Kom nyam brekfas,” Jiizas se tu dem. Bot non a dem neehn bier fies inof fi aks im se, “A uu yu?” kaa dem did nuo se a did di Laad.

¹³ So Jiizas kom, tek di bred an gi dem, an im du di sed ting wid di fish.

¹⁴ Nou dat mek chrii taim Jiizas shuo imself tu im falara dem afta im kom bak alaiv.

¹⁵ Afta dem don nyam, Jiizas aks Saiman Piita se, “Saiman, Jan bwai pikni, yu lov mi muo dan ou yu lov dem ya?” “Yes, Laad,” Saiman se, “Yu nuo se mi lov yu.” So Jiizas se, “Fiid mi biebi shiip dem.”

¹⁶ Jiizas aks im agen se, “Saiman, Jan bwai pikni, yu lov mi fi chuu?” Im ansa, “Yes, Laad, yu nuo se mi lov yu.” Jiizas se tu im se, “Tek kier a mi shiip dem.”

¹⁷ Fi di tord taim Jiizas aks im se, “Saiman, Jan bwai pikni, yu lov mi?” Piita did fiil a wie, kaaz a chrii taim nou Jiizas aks se, “Yu lov mi?” So im se, “Laad, yu nuo evriting. Yu nuo se mi lov yu.” Den Jiizas se tu im se, “Fiid mi shiip dem.

¹⁸ Mi a tel yu fi chuu chuu, wen yu did sumaala yu put aan yu uona kluoz an yu go eniwe yu waahn fi go, bot wen yu get uol yu gweehn chrech out yu an dem, an ada piipl gweehn put aan yu kluoz an tek yu go wich paat yu no waahn go.”

¹⁹ (Nou Jiizas did a taak bout di wie ou Piita did a-go ded, an ou im did a-go mek Gad get big op kaaz a di wie im ded.) Den Jiizas se tu im se, “Fala mi!”

²⁰ Piita ton roun an si di falara we Jiizas did lov. (Di sed wan we did sidong saida Jiizas wen taim dem did a nyam di laas sopa. A im siem wan did aks Jiizas se, “Laad, a uu a-go sel yu out?”)

²¹ Wen Piita si im, im se tu Jiizas se, “Laad, wa gweehn apm tu im?”

²² Jiizas se tu im se, “Ef mi waahn im fi liv til mi kom bak, wa mek dat a bada yu? Yu jos fala mi.”

²³ So siek-a Jiizas se so, it did a go roun mongks di breda an sista dem se da falara ya neehn a-go ded. Bot a no dat Jiizas did se, im se, “Ef mi waahn im fi liv til mi kom bak, wa mek dat a bada yu?”

²⁴ A dis a di falara we si di uol a dem sitn ya fi imself an tel piipl bout dem. A im rait dem dong an aal a wi nuo se a chuu im a taak.

²⁵ Jiizas du uol iip a ada sitn. Ef evriting did fi rait dong iina buk, spies wudn de iina di worl fi uol aal a di buk dem we piipl wuda rait.