Read Jamaican Patois Jan 3 Bible Online

Jan 3 - Jamaican Patois bible

Jan 3

¹ Yu did av wan Farisii man niem Nikodiimos, wan a di Juu liida dem.

² Im go luk fi Jiizas wan nait an se tu im se, “Tiicha, wi nuo se a Gad sen yu fi kom tiich, kaa nobadi kyaahn wok di mirikl dem we yu wok, ef a no Gad a kaaz dem fi dwi’it.”

³ So, Jiizas se tu im se, “Fi chuu chuu, mi a tel yu se nobadi kyaahn tek paat iina Gad kindom ef dem no baan agen.”

⁴ So Nikodiimos aks im se, “Den a ou sumadi we oul fi baan agen? Sumadi kyan go bak iina im mada beli an baan wan neda taim?”

⁵ Jiizas ansa im an se, “Fi chuu chuu, mi a tel yu se nobadi kyaahn tek paat iina Gad kindom ef dem no baan uova da taim ya iina waata an iina di Spirit.

⁶ Wen biebi baan, a piipl a av piipl, bot Gad, im mek piipl baan iina di Spirit.

⁷ So no fraitn wen yu ier mi tel yu se, ‘Yu afi baan wan neks taim.’

⁸ Briiz bluo go wich paat it waahn fi go. Yu onggl ier di soun we it mek, bot yu kyaahn si a we it de kom fram an yu kyaahn si wich paat it de go. Nou, a siem so it go wid evribadi we di Spirit mek baan.”

⁹ “Ou dat?”, Nikodiimos aks.

¹⁰ Bot, Jiizas se tu im se, “A yu a tap tiicha iina Izrel, an yu no andastan dem sitn ya we mi a taak bout?

¹¹ Fi chuu chuu, mi a tel yu: wi taak bout di sitn dem we wi nuo bout, an wi taak bout di sitn dem we wi si fi wiself, bot unu piipl no tek wa wi se.

¹² Ef mi taak tu unu bout di sitn dem we tek plies pan di ort an unu no biliiv, ou unu a-go biliiv mi ef mi taak tu unu bout wa gwaan iina evn?

¹³ Nobadi neva go a evn yet — onggl di wan we kom dong fram out de. An dat a di Man we Gad Pik.

¹⁴ Jos laka ou Muoziz did lif op di siniek iina di dezot, a sed wie so di Man we Gad Pik mos get lif op,

¹⁵ so aal a dem we chos iina im kyan liv fi eva.

¹⁶ “Kaa, yu si, Gad lov di worl so moch dat im gi op im wan dege-dege Bwai Pikni, so enibadi we chos iina im naa go ded bot a-go liv fi eva.

¹⁷ Kaa yu si, Gad neehn sen im Bwai Pikni iina di worl fi rait aaf di piipl iina di worl. Nuo! Gad sen im fi siev dem.

¹⁸ Enibadi we chos iina Gad Bwai Pikni no get rait aaf, bot di piipl dem we no chos iina im, dem don rait aaf aredi, kaa dem no chos iina Gad wan dege-dege Bwai Pikni; dem no chos iina im niem.

¹⁹ “Nou, a dis ya mek piipl get rait aaf: di wan we a di lait kom iina di worl, bot di piipl dem we liv iina di worl lov daaknis insted-a lait. Dem lov di daak, kaa a bier wikidnis dem du.

²⁰ Kaa evribadi we du rang iet lait an dem no waahn fi waak out iina di lait, kaa dem fried se di lait gweehn shuo op di bad sitn dem we dem a du.

²¹ Bot di sumadi we a du wa Gad se a di rait ting fi du, waak out iina di lait, so dat evribadi kyan si se a riili Gad mek im du we im a du.”

²² Afta dat, Jiizas an im falara dem lef an go out iina di konchri paat a Judiya. Im spen som taim de wid dem an im did a baptaiz piipl.

²³ Jan did a baptaiz piipl tu a wan plies no tuu faar fram Sielem we dem kaal Ienan. Im did a baptaiz de, kaa nof waata did de de, an piipl did a go de fi get baptaiz.

²⁴ (Dis a bifuo dem did lak op Jan iina prizn.)

²⁵ Nou, Jan falara dem an wan neda Juu get iina wan piis a aagiment bout wa dem rilijan se bout ou piipl fi wash an mek demself kliin.

²⁶ Dem go uova tu Jan an se tu im se, “Tiicha, di man we did de de wid yu pan di ada said a Riva Jaadn — di wan we yu did a taak bout — luk, si’im de a baptaiz tu, an evribadi a go tu im.”

²⁷ Bot Jan se tu dem se, “Sumadi kyan onggl av wa Gad gi dem.

²⁸ Unu nuo fi unuself an kyan tel enibadi se mi did se, ‘Mi a no di Krais. Gad onggl sen mi kom bifuo im.’

²⁹ Yu si, di braid a fi di braidgruum. Di braidgruum brejrin we saat out di sitn dem fi’im wedn an we tan op an lisn out fi’im, im glad-bag bos wen taim im ier di braidgruum vais. Rait ya nou, a siem wie so mi fiil wel wel api bout wa a gwaan.

³⁰ Da man de we a baptaiz piipl, im afi get biga an biga. Mi, mi afi get sumaala an sumaala.

³¹ “Di sumadi we kom fram op a tap, biga an beta dan evribadi. Di sumadi we kom fram ort bilang tu di ort, an im taak bout wa gwaan pan di ort. Di sumadi we kom fram op a tap, biga an beta dan evribadi.

³² Im taak bout we im si an ier, bot nobadi no biliiv wa im se.

³³ Di sumadi we tek iin an fala wa im se shuo klier klier se wa Gad se a chuu sitn.

³⁴ Kaa, di wan we Gad sen kom se aal a wa Gad tel im fi se, kaa yu si, Gad gi’im evri singgl bit a im Spirit.

³⁵ Di Faada lov im Bwai Pikni, an im gi im powa uova evriting.

³⁶ Di sumadi we chos iina im Bwai Pikni a-go liv fi eva, bot di wan we no waahn fi av notn fi du wid im naa go liv, an Gad eva a-go ponish im.”