Read Jamaican Patois Jan 4 Bible Online

Jan 4 - Jamaican Patois bible

Jan 4

¹ Nou, di Farisii dem did ier se Jiizas did a get an baptaiz muo falara dan Jan

² (bot Jiizas neehn a baptaiz a suol, a im falara dem did a du it.)

³ Wen di Laad fain out se di Farisii dem ier bout wa did a gwaan, im lef fram Judiya an go baka Gyalalii.

⁴ Bot im did afi paas chuu Samieriya fos.

⁵ Nou, wen im did a go chuu Samieriya, im en op iina wan toun we dem kaal Saikaar. Saikaar neehn faar fram di lan we Jiekob did gi im bwai, Juozif,

⁶ an Jiekob did dig wan wel de. Wen Jiizas riich di wel, im did so taiyad im sit dong saida it. Dat did bout migl die.

⁷ Nou, wan Samaritan uman kom fi jraa waata fram outa di wel. So Jiizas aks ar se, “Beg yu fi som waata fi jringk?”

⁸ (Da taim de, im falara dem did gaan gaan bai fuud iina di toun.)

⁹ So nou, di Samaritan uman se tu Jiizas se, “Yu a wan Juu an mi a wan Samaritan uman. Ou yu fi de aks mi fi gi yu waata fi jringk?” (Shi se so, kaa di Juu dem neehn miks an minggl wid Samaritan piipl.)

¹⁰ Jiizas ansa ar an se, “Ef yu did nuo bout di speshal sitn we Gad gi — Ef yu did nuo a uu de aks yu fi waata, yu wuda aks im fi waata, an im wuda gi yu it an mek yu liv wan nyuu saat a laif.”

¹¹ So shi se tu im se, “Bot, sar, yu no av no bokit fi tek jraa waata, plos di wel diip. So, a wich paat yu gweehn get da kain-a waata de we yu a taak bout?

¹² Yu biga dan wi faada Jiekob we gi wi da wel ya, an we aal jringk waata fram outa it — im, im Bwai Pikni dem an im animal dem?”

¹³ So, Jiizas tel ar se, “Evribadi we jringk waata fram outa da wel ya gweehn get torsti agen,

¹⁴ bot enibadi we jringk di waata we mi gi’im naa go torsti agen. Yu si, di kain-a waata we mi a-go gi’im gweehn ton wan spring iina im, wan we no tap ron, an we kaaz im fi liv fi eva.”

¹⁵ “Sar,” di uman se agen, “beg yu gi mi som a da waata de, so dat mi kyaahn get torsti agen, an so dat mi no afi kom baka da wel ya fi jraa no muo waata!”

¹⁶ So Jiizas tel ar se, “Gwaan go kaal yu ozban an kom bak.”

¹⁷ “Mi no av no ozban,” shi se tu im. So Jiizas se tu ar, “A chuu yu de taak wen yu se yu na’av no ozban.

¹⁸ Kaa a uol a faiv a dem yu av aredi, an di man yu de wid nou a no fi yu ozban. Wa yu se a chuu.”

¹⁹ “Sar,” shi se tu Jiizas, “mi kyan si se yu a wan prafit.

²⁰ Wi faada faada dem worship Gad pan da mountn ya, bot unu, unu Juu piipl taak bout ou a Jeruusilem piipl fi worship Gad.”

²¹ So, Jiizas se tu ar se, “Liedi, chos mi pan da wan ya: di taim a-go kom wen piipl naa go worship di Faada pan da mountn ya ar iina Jeruusilem.

²² Unu Samaritan piipl worship wa unu no nuo bout. Wi worship wa wi nuo bout, kaa a di Juu piipl dem Gad a-go yuuz fi siev di piipl dem iina di worl.

²³ Bot di die an taim de kom — an it de ya nou — wen di piipl dem we riili worship di Faada gweehn worship im ou di Spirit waahn dem fi worship an fram wie dong iina dem aat. Kaaz a dem de saat a piipl de di Faada a luk fa fi worship im.

²⁴ Kaa, yu si, Gad a spirit an dem we worship im mos worship im ou di Spirit waahn dem fi worship an dem mos dwi’it fram wie dong iina dem aat.”

²⁵ Den di uman se tu im se, “Mi nuo se di Mesaiya, di wan we dem kaal di Krais, a kom. Wen im kom, im a-go tel wi ou evriting go.”

²⁶ Jiizas se tu ar se, “A mi im — mi we de ya a taak tu yu.”

²⁷ Siem taim nou, Jiizas falara dem kom bak an dem shak fi fain im a taak tu wan uman. Bot nobadi neva se tu ar, “A wa yu waahn?” an non a dem neva aks im se, “A wa mek yu a taak tu ar?”

²⁸ So di uman nou, shi lef di waata pan we shi kyari fi put waata iina, an shi ron go bak iina di toun. Wen shi riich de shi se tu di piipl dem,

²⁹ “Unu kom, kom kom luk pan wan man we tel mi bout aal a di sitn dem mi eva du. Unu tingk se im kuda a di Krais?”

³⁰ Den di piipl dem lef outa di toun an mek fi wich paat Jiizas did de.

³¹ Sed taim dat did a gwaan, Jiizas falara dem did a beg im fi nyam sitn. Dem se tu im se, “Tiicha, nyam sitn no!”

³² Bot Jiizas tel dem se, “Mi av fuud fi nyam we unu no nuo notn bout.”

³³ So dem staat se tu dem wan aneda, “Nobadi neehn kyari notn kom gi’im fi nyam, no chuu?”

³⁴ “Fi mi fuud,” Jiizas se tu dem, “a fi du we di wan we sen mi kom ya waahn mi fi du, an fi finish op di wok im gi mi.

³⁵ No unu se, ‘Plaant tide, gyada fuo mont afta’? Bot a de tel unu, uopm op unu yai an luk pan di faam lan dem! Di fuud dem fit an redi fi riip op!

³⁶ Di sumadi we gyada op di fuud a get fi’im pie, an di fuud we im de gyada a piipl we gweehn liv fi eva. So nou, im we plaant an im we gyada, di tuu a dem gweehn glad tugeda.

³⁷ So a chuu sitn piipl a taak bout wen unu ier dem se, ‘Wan sumadi plaant siid, bot sumadi els gyada di fuud.’

³⁸ Mi sen unu out fi gyada op wa unu no wok aad fi plaant. Ada piipl du di aad wok, an unu onggl a go iin an a gyada op wa dem wok aad fi plaant.”

³⁹ Nou, nof a di Samaritan piipl dem we did lef outa di toun did biliiv iina Jiizas. Dem biliiv iina im siek-a wa di uman did tel dem se. Shi se, “Im tel mi bout evriting we mi eva du.”

⁴⁰ So, wen dem fain Jiizas, dem beg an beg im fi no lef bot fi tan de wid dem. So im tan de wid dem tuu muo die,

⁴¹ an uol iip muo a dem chos iina im, siek-a wa im se.

⁴² Dem se tu di uman se, “A no jos chuu yu tel wi bout im mek wi biliiv iina im. A kaa wi si an ier im fi wiself, an siek-a dat wi nuo se a riili da man ya a-go siev di worl, fi chuu.”

⁴³ Afta di tuu die dem kom an gaan, Jiizas lef go a Gyalalii.

⁴⁴ (Nou, a Jiizas siem wan did se dat no prafit no get no rispek iina im uona konchri.)

⁴⁵ So nou, wen im riich Gyalalii di piipl dem we liv de did tek im iin, kaa dem did go a Jeruusilem fi di Paasuova alidie an dem did si aal a wa im did du de.

⁴⁶ Iina Gyalalii, im go a di plies we dem kaal Kiena — di sed plies wich paat im did tek waata an ton it iina wain. Nou, yu did av wan man fram Kyaporniyom we du big wok fi di king, we did av wan bwai pikni we did sik bad.

⁴⁷ Wen im ier se Jiizas kom bak fram Judiya an dat im did de a Gyalalii, im go luk fi im an beg im fi kom wid im a Kyaporniyom fi mek im bwai pikni, we did bout fi ded, beta.

⁴⁸ Bot Jiizas se tu im se, “Ef unu piipl no si som sain an aal saat a powaful mirikl, unu wuda neva biliiv iina mi.”

⁴⁹ Bot di man se tu im se, “Sar, beg yu kom wid mi go dong a Kyaporniyom bifuo mi bwai ded.”

⁵⁰ Den Jiizas se tu im, “Yu kyan gwaan. Yu bwai pikni a-go liv.” Den di man biliiv we Jiizas tel im se, an set out fi go baka im yaad.

⁵¹ Pan im wie bak, im sorvant dem kom miit im an tel im se im bwai pikni did a-go liv.

⁵² So im aks dem wa taim im bwai did staat get beta. Dem se, “Di fiiva brok yeside, bout iina di wan aklak belz.”

⁵³ Wen dem se dat an di man chek it out, it kom tu im se a did di siem taim Jiizas did tel im se, “Yu bwai pikni a-go liv.” So di man an aal a di piipl dem we liv iina im ous staat fi biliiv iina Jiizas.

⁵⁴ Da mirikl ya a did di sekan wan Jiizas wok afta im lef Judiya an go baka Gyalalii.