Read Jamaican Patois Jan 5 Bible Online

Jan 5 - Jamaican Patois bible

Jan 5

¹ Som taim afta dat, Jiizas go baka Jeruusilem fi wan neda Juu alidie.

² Nou, iina Jeruusilem, yu did av wan puul saida di giet we di shiip dem we go iina di siti waak chuu. Dem kaal di puul Betzata iina di Iibruu langwij, an it did av faiv kova uova waak wie bil neks tu it.

³ Uol iip a sik piipl did a lai dong iina di waak wie dem — blain piipl, piipl we kudn waak an piipl we kudn muuv at aal.

⁵ Nou, yu did av wan sik man we did de de fi toti iet ier.

⁶ Wen Jiizas si im a lai dong de, an si se im did de de sik fi ou lang, im aks im se, “Yu waahn get beta?”

⁷ “Sar,” di man se tu im, “mi no av a suol fi elp put mi iina di puul wen taim di waata staat fi muuv op an dong. Evritaim mi chrai go iin de, sumadi fos mi.”

⁸ Jiizas se tu im se, “Git op! Tek op yu mat an waak!”

⁹ Siem taim Jiizas se so, di man get beta, an tek op im mat an staat waak. Nou, dis ya apm pan di Sabat.

¹⁰ So di Juu liida dem se tu di man we Jiizas mek get beta, “Tide a di Sabat, yu nuo, an di Laa no lou yu fi kyari yu mat pan da die ya.”

¹¹ Bot di man se tu dem se, “Di man we mek mi get beta tel mi se, ‘Tek op yu mat an waak.’ ”

¹² So dem aks im se, “A wich man tel yu fi, tek op mat an waak?”

¹³ Bot di man neehn nuo a uu did mek im get beta kaaz Jiizas did slip we iina di kroud a piipl we did de a di plies.

¹⁴ Afta di liida dem kwestiyan di man, Jiizas fain im iina Gad ous an se tu im, “Si’it de, yu beta nou! Tap sin ar sitn wosa mait-a go apm tu yu.”

¹⁵ Wel, di man lef go we go tel di Juu liida dem se a Jiizas did mek im get beta.

¹⁶ An di Juu liida dem did staat fi mek laif aad fi Jiizas, kaaz im did a du dem sitn ya pan di Sabat.

¹⁷ Bot Jiizas se tu dem se, “Fi mi Faada eva a wok, an mi a wok tu.”

¹⁸ Chuu im go se so, dem chrai aada fi kil im, kaaz a neehn se im did onggl a brok di Sabat, bot pan tap a dat, im did a se Gad a im Faada, an da wie de, im did a put im an Gad pan di siem levl.

¹⁹ So Jiizas tel dem se, “Mi de tel unu di chuut, di Bwai Pikni kyaahn du a ting pan im uon. Im onggl du wa im si’im Faada a du. Wat-eva di Faada du, di Bwai Pikni dwi’it tu.

²⁰ Kaa di Faada lov di Bwai Pikni an di Faada shuo im evriting we im du. Im a-go shuo im iivn biga sitn dan dem ya — tingz we gweehn shak unu.

²¹ Kaa, siem wie laka ou di Faada mek ded piipl kom bak alaiv, a siem wie so di Bwai Pikni gi laif tu enibadi im waahn gi’it tu.

²² Plos, di Faada no rait aaf nobadi. Nuo! Im gi uova aal a dat de tu im Bwai Pikni,

²³ so dat evribadi kyan rispek di Bwai Pikni iina di sed wie dem rispek di Faada. Enibadi we no rispek di Bwai Pikni no rispek di Faada we sen im.

²⁴ “Mi de tel unu fi chuu chuu, enibadi we ier we mi se an chos iina di wan we sen mi, a-go liv fi eva. Dem naa go get sen fi ded. Nuo! Dem get muuv uova fram we paat dem wuda ded, an gaan uova tu we paat dem gweehn liv.

²⁵ “Mi a tel unu fi chuu chuu, di die an taim a kom — matarafak, it de ya aredi — wen ded piipl gweehn ier Gad Bwai Pikni vais an di wan dem we ier an du wa im se gweehn liv fi eva.

²⁶ Kaa di Faada av di powa fi mek piipl liv, an im gi di Bwai Pikni di powa so dat im kyan mek piipl liv tu.

²⁷ An pan tap a dat, di Faada gi di Bwai Pikni di powa fi joj piipl, kaaz a im a di Man we Gad Pik.

²⁸ “No bada get fraitn bout wa mi de se. Kaa di taim a-go kom wen evribadi we ded an iina dem griev gweehn ier Gad Bwai Pikni vais

²⁹ an kom bak alaiv — dem we du gud a-go kom bak fi liv fi eva, an dem we du wikidnis a-go get sen fi ded.

³⁰ Mi kyaahn du a ting pan mi uon. Mi onggl joj piipl di wie mi Faada tel mi fi dwi’it, an mi dwi’it rait, kaa mi naa dwi’it fi mek miself api. Nuo! Mi dwi’it fi mek di wan we sen mi kom ya api.

³¹ “Ef a onggl mi wan a tel piipl bout miself, den wa mi se no wot notn.

³² Bot yu av sumadi els we a se tingz bout mi, an mi nuo se aal a wa im a taak se wot sopm — wa im se a chuu.

³³ Unu sen go aks Jan bout mi an im taak chuut.

³⁴ A no se mi waahn piipl fi taak bout mi. Mi onggl a tel unu bout dis, so Gad kyan siev unu.

³⁵ Jan did komiin laka wan lamp we a bon an gi out lait, an unu did glad fi di lait fi likl bit.

³⁶ “Bot sitn els de de we shuo uu mi bi an it wot muo dan we Jan se bout mi. A di sopm dem we mi Faada gi mi fi du — di siem wan dem we mi a du nou — a dem shuo se a di Faada sen mi kom.

³⁷ An di Faada se tingz bout mi tu. Unu neva ier im vais yet, an unu neva si’im fi nuo ou im luk non at aal.

³⁸ An unu no tek iin wa im se bout mi iina unu aat, kaaz unu no chos iina di wan we im sen kom.

³⁹ Unu stodi an stodi Gad wod aad, kaa unu tingk se a dat a-go mek unu nuo ou unu kyan liv fi eva. Bot di sed wod we unu a stodi, taak bout mi,

⁴⁰ an unu stil naa kom tu mi so unu kyan get fi av riil laif.

⁴¹ “Mi naa luk fi get big op fram piipl.

⁴² Bot mi nuo unu an ou unu tan. Unu na’av no lov fi Gad iina unu aat.

⁴³ Mi kom kaa mi faada sen mi kom, an unu ton unu bak pan mi. Bot ef sumadi els we nobadi no sen eva kom tu unu, unu tek dem iin.

⁴⁴ Ou unu fi biliiv iina mi, wen unu lov fi get big op fram unu wan aneda? Ou unu fi biliiv iina mi, wen unu naa chrai fi mek di wan an onggl Gad big unu op?

⁴⁵ “Bot no tingk se mi gweehn paint fingga pan unu an se unu gilti wen taim unu tan op infronta mi Faada. Nuo! A Muoziz gweehn dwi’it. Di siem wan we unu tingk se wuda elp unu.

⁴⁶ Ef unu did biliiv iina Muoziz, unu wuda biliiv iina mi, kaaz a mi im did rait bout.

⁴⁷ Bot sins unu no biliiv wa im rait se, den a ou unu gweehn biliiv wa mi de tel unu?”