Read Jamaican Patois Jan 7 Bible Online

Jan 7 - Jamaican Patois bible

Jan 7

¹ Afta dat, Jiizas go aal bout iina Gyalalii. Im tan we fram Judiya, kaa di Juu liida dem did a luk wan wie fi kil im.

² Nou, a did nieli taim fi di Juu piipl dem Ot Alidie.

³ Jiizas breda dem se tu im, “Muuv out fram ya-so no, an go a Judiya so yu falara dem kyan si di big an powaful sitn dem we yu kyan du.

⁴ Kaa, sumadi we waahn piipl fi nuo bout dem no du we dem a du anda di kwaiyat. So sins yu a du dem sitn ya, shuo aaf yuself tu di worl, mek evribadi si yu an nuo we yu a du.”

⁵ (Kaa no iivn im uona breda dem did biliiv iina im.)

⁶ Bot Jiizas se tu dem se, “Fi unu, enitaim a di rait taim, bot fi mi taim no kom yet.

⁷ Di piipl dem iina di worl kyaahn iet unu, bot dem iet mi kaa mi tel dem se wa dem du wikid an bad.

⁸ Unu gwaan op de go tek paat iina di Ot Alidie. Mi naa go, kaa di rait taim fi mi go no kom yet.”

⁹ So, afta im tel dem dat, im tan wich paat im did de iina Gyalalii.

¹⁰ Afta im breda dem lef fi go tek paat iina di Ot Alidie a Judiya, Jiizas go op de tu, bot im go anda di kwaiyat, so nobadi kuda si im.

¹¹ Nou, di Juu liida dem we did de de did a luk out fi im an did a aks, “A wich paat im de?”

¹² Wan uol iip a piipl did a wispa wispa wa dem tingk bout Jiizas mongks demself. Som did a se, “Im a wan gud man.” An yu did av som we se, “Nuo, sa! A fuul im a fuul op di piipl dem.”

¹³ Bot iina aal we did a gwaan evribadi kiba dem mout, no iivn a suol wuda se notn fi mek tu moch piipl ier wa dem tingk, kaa dem did fried a wa di Juu liida dem wuda du dem.

¹⁴ A no til aaf wie chuu di Ot Alidie dat Jiizas go op we paat Gad ous de an staat tiich.

¹⁵ Di Juu liida dem shak wen dem si ou im tiich, so dem aks, “A ou da man ya nuo so moch an im neehn go a skuul?”

¹⁶ So Jiizas ansa dem an se, “A no mi mek op we mi tiich. A di wan we sen mi kom gi mi it fi tiich.

¹⁷ Ef sumadi mek op dem main fi du wa Gad waahn dem fi du, dem a-go fain out ef a riili Gad gi mi wa fi tiich ar ef a mi jos a taak fi miself.

¹⁸ Sumadi we taak fi imself a luk big op fram piipl, bot sumadi we wok so dat di wan we sen im get big op, a gud sumadi an wa im taak a chuu sitn. Dem no lai.

¹⁹ No chuu se a Muoziz gi unu di Laa? Bot non a unu no kip it. So wa mek unu a chrai fi kil mi?”

²⁰ Di kroud a piipl dem den se tu im se, “Yu av diiman iina yu! A uu a chrai kil yu?”

²¹ So Jiizas se tu dem se, “Mi du onggl wan mirikl an di uol a unu shak.

²² Bot, unu sorkomsaiz unu bwai pikni dem pan di Sabat kaa Muoziz se unu fi dwi’it — duo a no Muoziz staat it op, a unu faada faada dem.

²³ So ef wan pikni kyan get sorkomsaiz pan di Sabat fi mek shuor se Muoziz Laa no get brok, wa mek unu beks wid mi, kaa mi mek sumadi get beta pan di Sabat.

²⁴ Tap joj sitn siek-a ou it luk pan di outsaid, an staat joj dem fi ou dem riili tan.”

²⁵ Nou da taim de som a di piipl we liv a Jeruusilem staat aks, “A no di man dis we dem a chrai fi kil?

²⁶ Bot ku ya! Si’im ya a taak so evribadi kyan ier im, an evribadi a kiba dem mout, dem naa se notn tu im. Yu tingk se di ruula dem riili biliiv se im a di Krais fi chuu?

²⁷ Bot wi nuo wich paat im kom fram. Wen di Krais kom, nobadi naa go nuo wich paat im kom fram.”

²⁸ Da taim de, Jiizas did stil a tiich iina di yaad we Gad ous de. Im ier we di piipl dem did a se, so im baal out loud loud pan tap a im vais an se, “Unu nuo mi an unu nuo we paat mi kom fram! Mi no sen miself kom ya, bot unu kyan chos di wan we sen mi kom. Unu no nuo im,

²⁹ bot mi nuo im, kaa mi kom fram im an a im sen mi kom ya.”

³⁰ Wen dem ier dis ya dem chrai fi grab im, bot nobadi no toch im, kaaz a neehn fi im taim fi dem kil im yet.

³¹ Stil, nof piipl iina di kroud biliiv iina im. Ier wa dem se, “Wen di Krais kom, yu tingk im a-go wok nof muo mirikl dan wa da man ya a du?”

³² Di Farisii dem ier di kroud a piipl a wispa dem sitn ya bout Jiizas. So di ed priis dem an di Farisii dem sen dem we gyaad Gad ous fi lak im op.

³³ So Jiizas se, “A onggl likl bit muo taim mi gweehn de ya wid unu, an afta dat mi a-go bak tu di wan we sen mi kom ya.

³⁴ Unu gweehn luk fi mi, bot unu naa go fain mi. An unu kyaahn go kom wich paat mi a-go de.”

³⁵ Di Juu liida dem den se tu dem wan aneda se, “A we da man ya plan fi go so, dat wi naa go kyan fain im? A go im a-go go tu di Juu piipl dem we skyata skyata mongks di Griik piipl dem, so dat im kyan tiich di Griik piipl dem?

³⁶ A wa im miin wen im se, ‘Unu gweehn luk fi mi, bot unu naa go kyan fain mi. An unu kyaahn go kom wich paat mi a-go de’?”

³⁷ Pan di laas an bigis die a di Ot Alidie, Jiizas get op an baal out pan tap a im vais, “Ef nobadi torsti, mek dem kom tu mi fi sitn fi jringk.

³⁸ Wa Gad wod se gweehn apm tu di piipl we biliiv iina mi. It se, ‘Som riva wid waata we gi laif a-go ron outa dem.’ ”

³⁹ (Nou, wen im se dat de, im did a taak bout di Spirit we di piipl dem we chos iina im wuda get lietaraan. Kaa op tu da taim de, nobadi neva get di Spirit, kaa Jiizas neehn get big op yet.)

⁴⁰ Wen som a di piipl dem iina di kroud ier we Jiizas se, dem se, “Fi riil, da man ya a di Prafit.”

⁴¹ Som ada wan se, “A di Krais dis ya.” Bot yu did stil av som we did a aks, “Nuo sa, kaa di Krais no kom fram Gyalalii, no chuu?

⁴² Gad wod no se dat di Krais gweehn kom fram Dievid fambili an fram outa Betliyem, di toun we Dievid did liv?”

⁴³ So di piipl dem did plit op uova wa dem tingk bout Jiizas.

⁴⁴ Som a dem did waahn fi uol im fi lak im op, bot nobadi neehn put dem an pan im.

⁴⁵ Wen dem we gyaad Gad ous go bak tu di ed priis dem an di Farisii dem, di ed priis dem an di Farisii dem aks dem se, “Wa mek unu no kyari im kom?”

⁴⁶ Di gyaad dem se, “Nobadi neva eva taak laik ou da man ya taak.”

⁴⁷ So, di Farisii dem se, “Yu miin se a chrik im chrik unu tu?

⁴⁸ Non a di Juu ruula ar Farisii dem biliiv iina im, iihn?

⁴⁹ Nuo! Bot da fu-fuul kroud a piipl ya we no nuo notn bout di Laa — bad blesn de pan dem.”

⁵⁰ Den Nikodiimos, di wan we did go a Jiizas bifuo da taim ya an we did iina dem gruup aks dem se,

⁵¹ “Wi Laa lou wi fi joj nobadi an se dat dem gilti bifuo wi ier fram dem fos fi fain out wa dem a du?”

⁵² Bot dem se tu im se, “Yu no kom fram Gyalalii tu? Go chuu Gad wod an si fi yuself — no prafit neva eva kom outa Gyalalii yet!”

⁵³ Afta dat, aal a dem go a dem yaad.