Read Jamaican Patois Jan 8 Bible Online

Jan 8 - Jamaican Patois bible

Jan 8

¹ Bot Jiizas neehn go a fi im yaad. Im go op a Mount Aliv.

² Orli di neda maanin, im go baka di yaad we Gad ous de. Wen im riich de, uol iip a piipl bongl roun im, an im sidong an staat tiich dem.

³ Nou di Laa tiicha dem an di Farisii dem kyari iin wan uman we dem kech a sliip wid wan man we a no ar ozban. An dem mek ar tan op infronta di kroud a piipl.

⁴ Ier dem tu Jiizas, “Tiicha, da uman ya get kech a sliip wid man we a no ar ozban.

⁵ Iina di Laa, Muoziz tel wi se wi fi stuon uman laka dis ya. So, we yu se nou?”

⁶ (Dem aks im dat de kaa dem did waahn fi chrik im, so dat dem kuda av sitn fi lak im op fa.) Jiizas ben dong an staat rait iina di grong wid im fingga.

⁷ Bot wen dem kip aan a push an a push im fi ansa dem, im tan op chriet an se tu dem se, “Eni wan a unu we neva sin yet, fling di fos stuon aafa ar!”

⁸ Den im ben dong wan neks taim an staat rait iina di grong.

⁹ Wen dem ier we Jiizas se, dem lef go we wan afta di ada. Di uolis wan dem go we fos, an dem gwaan lef til a Jiizas wan did tan op de wid di uman.

¹⁰ Jiizas get op an se tu ar se, “Liedi, we dem de? Nobadi neva se yu fi ded siek-a wa yu du?”

¹¹ “No iivn a suol, sar,” shi se. “Den mi naa go se yu fi ded siek-a we yu du niida,” Jiizas se tu ar. “Gwaan nou, an no sin no muor.”

¹² Jiizas staat taak tu di piipl dem agen an se, “Mi a di wan we lait op di worl. Enibadi we fala mi naa go waak iina di daak, bot dem a-go av di lait we gi piipl laif.”

¹³ Di Farisii dem se tu im se, “Si, yu a taak bout yuself an nobadi no de bout fi bak wa yu a se. So we yu a se kyan neva chuu.”

¹⁴ So Jiizas se tu dem se, “Aal ef mi did a taak bout miself, we mi a se chuu, kaa mi nuo we mi kom fram an mi nuo we paat mi a go. Bot unu no nuo we mi kom fram, an unu no nuo we paat mi a go.

¹⁵ Unu joj bies pan we unu kyan si. Mi no dwi’it di wie unu dwi’it.

¹⁶ Bot ef mi did fi joj nobadi, ou mi joj dem wuda rait, kaaz a no mi wan a dwi’it. Mi dwi’it wid mi Faada, di wan we sen mi kom ya.

¹⁷ It rait dong iina fu’unu uona Laa se dat ef tuu sumadi se di siem ting bout sitn, den we dem se a chuu.

¹⁸ Mi a di wan we taak bout miself, an mi faada we sen mi taak bout mi tu.”

¹⁹ “So den, we paat yu Faada de?” di Farisii dem aks im. “Unu no nuo mi ar mi Faada,” Jiizas se tu dem. “Ef unu did nuo mi, unu wuda nuo mi Faada tu.”

²⁰ (Jiizas se dem sitn ya wen im did a tiich iina di yaad we Gad ous de, nier wich paat piipl jrap dem aafrin. An nobadi neehn uol im fi lak im op, kaa im taim neehn kom yet.)

²¹ Den Jiizas se tu dem agen se, “Mi a go we, an unu gweehn luk fi mi, bot unu gweehn ded iina unu sin. Unu kyaahn kom we paat mi a go.”

²² Wa im se mek di Juu liida dem staat aks, “A kil im gweehn kil imself, mek im a se ‘We paat mi a go unu kyaahn kom’?”

²³ Bot Jiizas gwaan taak an im se tu dem se, “Unu kom fram dong a batam ya; mi kom fram evn op a tap. Unu kom fram da worl ya; mi no kom fram ya.

²⁴ A dat mek mi se tu unu se unu gweehn ded iina unu sin dem. Kaa ef unu no biliiv uu mi se mi bi, unu a-go ded iina unu sin dem.”

²⁵ So dem aks, “A uu yu?” “Di siem sumadi mi a tel unu fram di staat,” Jiizas se tu dem.

²⁶ “Mi av nof ada sitn fi se an fi joj unu fa, bot di Faada we sen mi taak di chuut, an a wa mi ier im se mi tel di piipl dem iina di worl.”

²⁷ (Bot dem neehn andastan wa im did a tel dem se bout im Faada.)

²⁸ So Jiizas se, “Wen unu lif op di Man we Gad Pik pan di kraas, a dem taim de unu gweehn nuo se mi a uu mi se mi bi, an dat mi no du notn pan mi uon bot dat mi taak onggl wa mi Faada tiich mi.

²⁹ Di wan we sen mi tan wid mi. Im neehn mek mi tan pan mi uon, kaa mi eva a du wa mek im api.”

³⁰ Siem taim im a taak bout dem sitn ya, nof piipl staat biliiv iina im.

³¹ Jiizas se tu di Juu dem we kom fram Jeruusilem an we chos iina im se, “Ef unu gwaan du di sitn dem we mi tiich, unu a mi falara dem fi chuu.

³² Unu gweehn nuo di chuut, an di chuut gweehn frii unu.”

³³ Dem ansa im an se, “Wi a Iebriyam pikni an wi neehn a nobadi sliev bifuo. So, ou kom yu fi a se, ‘Di chuut gweehn frii unu’?”

³⁴ Jiizas ansa dem an se, “Mi a tel unu fi chuu chuu, evribadi we sin, a sin sliev.

³⁵ Wan sliev no tan iina wan fambili fi eva, bot wan bwai pikni a aalwiez paat a im fambili.

³⁶ So ef di Bwai Pikni frii unu, unu frii fi chuu.

³⁷ Mi nuo se unu a Iebriyam pikni. Bot iivn duo unu a Iebriyam pikni, unu stil waahn fi kil mi, kaa wa mi a tiich unu se no toch unu aat.

³⁸ Mi a tel unu we mi si wen mi de roun di Faada; bot unu, du wa unu ier di Faada se!”

³⁹ “Iebriyam a fi wi faada,” dem se tu Jiizas. “Ef unu did a Iebriyam pikni,” Jiizas se, “den unu wuda du wa Iebriyam du.

⁴⁰ Bot nou, unu a chrai fi kil mi, sumadi we taak di chuu sitn dem we im ier Gad taak bout. Iebriyam neehn du notn laka dat de.

⁴¹ Unu a du di sitn dem we unu uona faada du.” “Wi a no baastad pikni,” di piipl dem shout bak an se tu im. “A Gad imself a di onggl faada wi av.”

⁴² Bot Jiizas se tu dem se, “Ef Gad did a unu Faada fi chuu, unu wuda lov mi, kaa mi kom fram Gad an nou mi de ya. Mi no kom ya pan mi uon; a im sen mi ya.

⁴³ Wa mek unu no andastan wa mi a se? A chuu unu kyaahn riili si chuu wa mi a tel unu se.

⁴⁴ Unu bilang tu unu faada, di devl, an unu waahn fi du di sitn dem we unu faada waahn unu fi du. Im did a mordara fram di staat, an na’av notn fi du wid di chuut, kaa im no se ar av notn fi du wid di chuut. Wen im tel lai, im jos a taak ou im tan, kaa im a laiyad an im a di faada fi aal lai.

⁴⁵ Bot chuu mi tel unu di chuut, unu no biliiv iina mi.

⁴⁶ Wich wan outa aal a unu kyan shuo se mi gilti a no sin? Ef mi de tel unu di chuut, wa mek unu no biliiv mi?

⁴⁷ Dem we bilang tu Gad ier wa Gad se. Unu kyaahn si chuu we mi a se, kaa unu no bilang tu Gad.”

⁴⁸ Di Juu piipl dem fram Jeruusilem ansa im se, “No chuut wi a taak wen wi se yu a wan Samaritan an yu av diiman iina yu?”

⁴⁹ “Mi no av no diiman iina mi,” Jiizas se. “Mi rispek mi Faada, bot unu no shuo mi no rispek.

⁵⁰ Mi naa chrai fi mek piipl big big mi op. Bot yu av sumadi we waahn piipl fi big mi op, an im a di joj.

⁵¹ Mi a tel unu fi chuu chuu, enibadi we du wa mi tiich naa go ded.”

⁵² Wen di Juu piipl dem fram Jeruusilem ier dis ya, ier dem, “A nou wi nuo se yu av diiman iina yu! Iebriyam an di prafit dem ded, an yu a se, ‘Enibadi we du wa mi tiich naa go ded’!

⁵³ Yu no biga dan wi faada Iebriyam we ded? Di prafit dem ded tu. A uu yu se yu bi?”

⁵⁴ Jiizas ansa dem se, “Ef mi big op miself, dat de big op de no wot wan ting. Fi mi Faada, di wan we unu se a fu’unu Gad, a im a di wan we big mi op.

⁵⁵ Unu no nuo im, bot mi nuo im. Ef mi did fi se mi no nuo im, mi wuda lai laik unu. Bot mi nuo im, an mi du wa im se.

⁵⁶ Unu faada Iebriyam did glad wen im si fi mi die an iej. Im si’it an did glad bout wa im si.”

⁵⁷ “Yu no iivn riich fifti yet,” di Juu dem se tu im, “an yu a taak bout yu si Iebriyam!”

⁵⁸ So Jiizas se tu dem se, “Mi de tel unu fi chuu chuu se bifuo Iebriyam did baan, mi de bout!”

⁵⁹ Wen dem ier dis, dem pik op rakstuon fi fling aafa im, bot im aid we an go we fram we Gad ous did de.