Read Jamaican Patois Jan 9 Bible Online

Jan 9 - Jamaican Patois bible

Jan 9

¹ Nou, wen Jiizas did a waak, im si wan man we did blain fram di die im baan.

² So im falara dem aks im se, “Tiicha, a uu sin mek da man ya baan blain, im ar im mada an faada?”

³ “Da man ya neehn sin,” Jiizas se tu dem, “Im mada an faada neehn sin niida. Im baan blain so piipl kyan si Gad du som powaful sitn iina im laif.

⁴ Fi az lang az di son a shain, wi mos du di powaful sitn dem we di wan we sen mi waahn wi fi du. Nait a kom wen nobadi kyaahn go du notn.

⁵ Fi az lang az mi iina di worl, mi a di wan we lait op di worl.”

⁶ Afta im se dis, im pit pan di grong, miks op di pit iina di dot mek mod an put it pan di man yai dem.

⁷ Den im tel di man se, “Gwaan go wash yu fies iina di Sailuom Puul” (Sailuom miin Sen.) So di man go we go wash im fies an go baka im yaad a si!

⁸ So nou, im nieba dem an dem we yuus fi si im a beg staat aks, “No di man dis ya we yuus tu sidong a beg?”

⁹ Som se, “A im siem wan.” Ada piipl se, “No sa, im onggl fieva im.” Bot di man kip aan se, “A mi, man. Mi a di man we yuus tu beg.”

¹⁰ “Den a ou kom yu get fi kyan si?” dem aks im.

¹¹ So im se tu dem se, “Di man we dem kaal Jiizas mek som mod an put it pan mi yai dem an tel mi fi go wash mi fies a Sailuom Puul. So mi go wash mi fies, an den mi kuda si.”

¹² “Wich paat da man ya de?” dem aks im. “Mi no nuo,” im se.

¹³ So dem tek di man we did blain kyari go a di Farisii dem.

¹⁴ (Nou a pan di Sabat Jiizas did tek mod an mek di man get fi si.)

¹⁵ So di Farisii dem aks di man ou kom im get fi kyan si. Di man tel dem se, “Im put mod pan mi yai dem, an mi go wash aaf mi fies an nou mi kyan si.”

¹⁶ Den som a di Farisii dem se, “Di man we du da sitn ya no kom fram Gad, kaa im no kip di Sabat.” Bot som ada piipl aks, “Bot a ou sina man fi du dem powaful mirikl ya?” So aal a dem neehn grii wid dem wan aneda.

¹⁷ Dem ton tu di man we did blain wan neks taim an aks im se, “A fi yu yai dem im mek get beta. Wa yu afi se bout im?” So di man se tu dem se, “Im a wan prafit.”

¹⁸ Di Juu liida dem stil neehn biliiv se di man did blain fi chuu an kuda si nou, so dem sen fi im mada an faada.

¹⁹ “A fu’unu bwai pikni dis ya, we unu se baan blain?” dem aks im mada an faada. “Den tel wi ou kom im get fi kyan si nou?”

²⁰ “Wi nuo se im a fi wi pikni,” di man mada an faada se, “an wi nuo se im did baan blain.

²¹ Bot wi no nuo ou kom im get fi kyan si nou, an wi no nuo a uu mek im beta. Unu aks im. Im a big man. Im wi taak fi imself.”

²² (Di man mada an faada se so chuu dem did fried a di Juu liida dem, kaa di liida dem did don mek op dem main se enibadi we biliiv an se dat Jiizas a di Krais wuda get put outa di Juu dem choch.

²³ A dat mek im mada an faada se, “Im a big man. Unu aks im.”)

²⁴ So di Juu liida dem kaal di man we did blain wan muo taim. “Taak di chuut an shiem di devl,” dem se. “Wi nuo se di man we mek yu get beta a sina man.”

²⁵ Bot im se tu dem se, “Sina ar no sina, mi no nuo im a wich wan a dem. Wan ting mi nuo se a dat mi did blain, an nou mi kyan si!”

²⁶ Den dem aks im se, “A wa im du tu yu? A ou im mek yu get fi kyan si?”

²⁷ Bot di man ansa dem an se, “Mi tel unu aredi an unu neehn lisn. Wa mek unu waahn ier wan neda taim? A ton unu waahn ton im falara dem tu?”

²⁸ Den dem staat kos im aaf an se, “A yu a fi’im falara! A Muoziz wi fala!

²⁹ Wi nuo se Gad taak tu Muoziz, bot di man yu a taak bout, wi no iivn nuo wich paat im kom fram.”

³⁰ So, ier di man tu dem, “Bot wat a piis a sopm, iihn! Im mek mi kyan si, bot siem taim unu no nuo wich paat im kom fram!

³¹ Wi nuo se Gad no lisn tu piipl we a sina. Im lisn tu dem we rispek im, an du we im se.

³² Fram di taim di worl mek nobadi neehn ier bout sumadi we baan blain an we get fi kyan si afta dat.

³³ Ef da man ya neehn kom fram Gad, im kudn du wan ting.”

³⁴ Wen dem ier dat, dem se tu im se, “Yu ful op a sin fram yu baan. A uu yu tingk yu bi fi a chrai a tiich wi notn?” An dem kik im outa di Juu choch.

³⁵ Jiizas ier se di Juu liida dem kik di man we did blain outa dem choch. Wen Jiizas fain im, im aks im se, “Yu biliiv iina di Man we Gad Pik?”

³⁶ “A uu im, sar?” di man aks Jiizas. “Tel mi so mi kyan biliiv iina im.”

³⁷ Jiizas se tu im se, “Yu a si im nou. A im a taak tu yu.”

³⁸ So di man se, “Laad, mi biliiv,” an im worship Jiizas.

³⁹ Jiizas se, “Mi kom iina di worl fi joj piipl, so blain piipl kyan si an di wan dem we tingk se dem kyan si get blain.”

⁴⁰ Som a di Farisii dem we did de roun im ier wen im se dis an aks, “A blain yu a se wi blain tu?”

⁴¹ So Jiizas tel dem se, “Ef unu did blain, unu wudn gilti a no sin, bot chuu unu se unu kyan si, unu gilti.”