Read Jamaican Patois Aks 1 Bible Online

Aks 1 - Jamaican Patois bible

Aks 1

¹ Tiyafilas sa, iina mi fos buk mi rait bout aal a di sitn dem we Jiizas du an we im tiich fram di staat

² til di die im get tek op iina evn. Dat a did afta Jiizas yuuz di Uoli Spirit fi tel im apasl dem we im did pik, wa im waahn dem fi du.

³ Afta im did sofa an ded pan di kraas, im kom bak alaiv an shuo imself tu im apasl dem. Im pruuv tu dem iina nof difrant wie se im alaiv. Fi bout faati die im kip aan a shuo op mongks dem taim afta taim an taak tu dem bout Gad kindom.

⁴ Wan a di taim wen im did a iit wid dem im tel dem se, “Tan a Jeruusilem an wiet fi wa mi Faada pramis fi gi unu, di siem sitn we mi did tel unu bout.

⁵ Kaaz Jan baptaiz piipl wid waata, bot kopl die fram nou Gad a-go baptaiz unu wid di Uoli Spirit.”

⁶ So wen dem kom tugeda, dem aks im se, “Laad, a nou yu a-go kaaz di Izrelait dem fi ruul agen?”

⁷ Im se tu dem se, “A onggl mi Faada wan av di powa fi disaid wen dat a-go apm. An im no lou unu fi nuo dat.

⁸ Bot di Uoli Spirit a-go kom pan unu an ful unu op wid powa an unu wi tel piipl iina Jeruusilem, Judiya, Samieriya an aal uova di worl bout mi.”

⁹ Az im don se dis tu dem, Gad tek im op iina evn rait infronta dem yai, an wen im did a go op, wan kloud aid im so dem kudn si im no muor.

¹⁰ Dem did stil a luk iina di skai wen Jiizas did a go op, wen aal av a sodn tuu man we jres iina wait kluoz kom tan op saida dem

¹¹ an se tu dem se, “Unu man we kom fram Gyalalii, wa mek unu tan op ya-so wid unu yai faasn pan di skai? Da siem Jiizas ya we unu si get tek op fram unu iina evn, im a-go kom bak di siem wie, jos laik ou unu si im go op iina evn.”

¹² Di apasl dem lef di il niem Mount Aliv an go baka Jeruusilem, bout aaf mail waak fram di mountn.

¹³ Wen dem kech a Jeruusilem, dem go opstiez go a di ruum we dem did a stie. Piita, Jan, Jiemz an Anju; Filip an Tamas, Bartalimyuu an Matyu; Jiemz, Alfiyos bwai pikni, Saiman we niem Zelat, an Juudas, Jiemz bwai pikni, aal a dem did de de.

¹⁴ Di uol a dem did eva a miit tugeda fi prie: dem, di uman dem, Mieri, Jiizas mada, an Jiizas breda dem.

¹⁵ Iina dem die de, wen di biliiva dem gyada op fi wan a dem miitn, (bout onjrid an twenti a dem did de de), Piita tan op

¹⁶ an se tu dem se, “Breda an sista, wa rait dong iina Gad wod did afi apm. Lang bifuo it apm, di Uoli Spirit did mek Dievid taak bout Juudas, di wan we sel out Jiizas an mek di piipl dem ares im.

¹⁷ Jiizas did pik Juudas fi bi wan a im apasl an so im a did wan a wi.”

¹⁸ (Im yuuz di moni we im did get fi sel out Jiizas an bai wan piis a lan. Pan da siem piis a lan de, im faal dong ed wie an im beli bos an im chraip an evriting iina im flai out.

¹⁹ Evribadi iina Jeruusilem ier bout wa apm tu im, so iina fi dem langwij dem kaal di piis a lan Akeldama, dat miin blod fiil.)

²⁰ “Kaaz it rait dong iina di buk we niem Saamz se, “‘Mek im ous emti out an nobadi no liv de,’ an, “‘Mek sumadi els tek fi’im plies an du di wok we im shuda du.’

²¹ So wan a di man dem we did de de wid wi aal di taim wen di Laad Jiizas did a muuv mongks wi,

²² fram wen Jan did staat baptaiz tu di taim wen Gad tek im op a evn, wi niid wan a dem man de fi jain op wid wi an tel piipl se Jiizas kom bak alaiv.”

²³ So di biliiva dem kaal out tuu sumadi niem, wan a did Juozif we dem kaal Baasabas ar Jostos, an di ada wan niem Mataiyas.

²⁴ Den dem prie, “Laad, yu nuo wa iina evribadi aat. So shuo wi wich wan a dem yu pik

²⁵ fi tek uova di apasl wok we Juudas did av. Kaaz Juudas get wa im dizorv.”

²⁶ Den dem jraa schraa an Mataiyas get pik, so im jain di gruup a ilevn apasl.