Read Jamaican Patois Aks 10 Bible Online

Aks 10 - Jamaican Patois bible

Aks 10

¹ Nou yu did av wan man dong a Sesuriiya niem Kaaniiliyos. Im a did paat a wan big gruup a suoja we kom fram Itali, an im a did ed fi onjrid a dem.

² Im an im uol fambili aalwiez worship Gad. Nof taim im wuda elp puo piipl an im aalwiez a prie tu Gad.

³ Wan die roun chrii aklak, Kaaniiliyos get wan vijan. Iina im vijan im si wan a Gad ienjel kom tu im. Di ienjel se tu im se, “Kaaniiliyos!”

⁴ Kaaniiliyos faasn im yai pan di ienjel an staat kech im fried. Im aks, “A wa Laad?” Di ienjel ansa im se, “Gad ier yu prieya dem, an im si di gud sitn dem we yu du fi puo piipl. Gad memba di sitn dem we yu du, an tu im dem komiin laik wan sakrifais.

⁵ Nou sen som man go a Japa an tel dem fi bring bak wan man niem Saiman, an we dem kaal Piita tu.

⁶ Im a stie a Saiman ous, di wan we mek leda an we liv a di sii-said.”

⁷ Afta di ienjel we taak tu im lef, Kaaniiliyos kaal tuu a im speshal sorvant dem an wan a im suoja we sorv im an we aalwiez worship Gad.

⁸ Im tel dem evriting we di ienjel tel im an sen dem go a Japa.

⁹ Di neks die, roun twelv aklak, wen dem did riich nier di siti, Piita go op pan di ous tap fi prie.

¹⁰ Piita did get onggri an waahn sopm fi iit, an wail im did a wiet fi di fuud im get wan vijan.

¹¹ Iina im vijan im si evn uopm op an sitn laik wan big big shiit a kom dong tu ort, laik se piipl did a uol di fuo kaana dem an a let it dong.

¹² Iina di shiit im si aal kain-a animal: animal we av fuo fut, animal we kraal pan dem beli an av kuol blod, an som wail bod.

¹³ Den im ier wan vais se tu im se, “Piita, git op, kil som a dem animal ya an nyam dem.”

¹⁴ Piita se, “Uu mi? Nuo Laad, ou mi fi du dat? Mi neva nyam non a dem sitn de we di Laa se no fi nyam kaaz dem no kliin.”

¹⁵ Den di vais se tu Piita di sekan taim se, “No tek notn we Gad mek kliin an se it doti an no gud fi iit.”

¹⁶ Im ier di vais se di siem ting chrii taim, an den di shiit get tek op bak iina evn.

¹⁷ Siem taim Piita de de a chrai fi figa out wa di vijan miin, di man dem we Kaaniiliyos did sen, fain Saiman ous an did tan op a di giet.

¹⁸ Dem kaal out loud an aks ef Saiman Piita de de.

¹⁹ Piita did stil a tingk bout di vijan wen di Uoli Spirit se tu im se, “Luk Piita, chrii man a luk fi yu.

²⁰ So git op an go dongstiez tu dem. No fried fi go wid dem, kaaz a mi mek dem kom fi yu.”

²¹ So Piita go dongstiez tu dem an se tu dem se, “Si mi ya, a mi unu a luk fa. Wa unu a luk fi mi fa?”

²² Di man dem ansa im se, “A Kaaniiliyos, wan ed man fi onjrid suoja sen wi. Aal a di Juu dem tingk im a gud sumadi an dem shuo im nof rispek. Wan a Gad ienjel tel im fi sen fi yu so im kyan ier wa yu av fi se.”

²³ Den Piita tek dem iina a di ous an put dem op fi di nait. Di neks die Piita, di man dem we did kom fi im, an som a di breda dem fram Japa ed out fi Kaaniiliyos yaad.

²⁴ Di die afta dat Piita riich a Sesuriiya. Kaaniiliyos did a wiet pan dem, so im gyada op aal a im fambili an fren dem iina im ous til dem kom.

²⁵ Wen Piita go iina di ous, Kaaniiliyos miit im a di duor an jrap a im fut fi worship im.

²⁶ Bot Piita elp im fi get op. Im se, “Tan op man, mi a jos wan man siem laik yu.”

²⁷ Piita did stil a taak tu Kaaniiliyos wen im go iina di ous an fain wan uol iip a piipl a wiet pan im.

²⁸ So Piita se tu dem, “Aal a unu nuo se azkaadn tu di Juu dem Laa, it no rait fi wan Juu av notn fi du wid piipl we a no Juu, ar fi go a dem yaad. Bot Gad shuo mi se mi no fi luk pan nobadi an tingk se dem no kliin ar se it rang fi mi kip kompni wid dem.

²⁹ So wen yu sen kom kaal mi, mi neva aks no kwestiyan, mi jos kom. So nou dat mi de ya, tel mi wa mek yu sen fi mi?”

³⁰ Kaaniiliyos se tu im se, “Fuo die ago, siem chrii aklak iina di die ya, mi did de iina mi ous a prie. Aal av a sodn mi si wan man iina som brait brait kluoz a tan op infronta mi.

³¹ Im se tu mi se, ‘Kaaniiliyos, Gad ier yu prieya an im memba wa yu du fi puo piipl.

³² Nou sen som man go a Japa fi wan man niem Saiman, we dem kaal Piita. Im a stie a Saiman yaad, di wan we mek leda an we liv a di sii-said.’

³³ So mi sen fi yu siem taim, an mi riili api se yu nais inof fi kom. Gad de ya wid wi an aal a wi wel waahn fi ier evriting we Gad tel yu fi tel wi.”

³⁴ Den Piita staat taak tu dem. Im se, “Nou mi riili andastan se Gad no paashal,

³⁵ bot enibadi, no mata wich konchri dem kom fram, ef dem worship im an aalwiez du we rait, im wi tek dem fi’im piipl.

³⁶ Unu nuo di mesij we Gad sen kom tu di Izrel piipl. Di mesij we se dat Gad a-go yuuz Jiizas we a Laad fi evribadi fi mek tingz rait wid im an piipl.

³⁷ Unu nuo bout di big impuotant sitn dem we apm aal uova Judiya. It staat iina Gyalalii afta Jan priich tu di piipl an tel dem fi ton we fram dem sin an get baptaiz.

³⁸ Unu nuo ou Gad did gi Jiizas we kom fram Nazaret im Uoli Spirit an powa. Jiizas go aal bout a du gud sitn, an aal a di piipl we di devl did kanchuol, Jiizas frii dem kaaz Gad did de wid im.

³⁹ “Wi did si evriting we im du iina Jeruusilem an di res a Juu konchri dem. Dem niel im pan di kraas an kil im.

⁴⁰ Bot Gad mek im kom bak alaiv chrii die lieta an kaaz piipl fi si im.

⁴¹ A no evribadi did si im, onggl wi, di wan dem we Gad did pik fram wie bak wen — wi we iit an jringk wid im afta im kom bak alaiv.

⁴² Jiizas aada wi fi priich tu di piipl an fi mek dem nuo se a im a di wan we Gad pik fi joj piipl we a liv an piipl we ded.

⁴³ Aal a di prafit dem taak bout im an se Gad wi paadn enibadi we biliiv iina Jiizas fi aal a dem sin kaaz dem chos iina Jiizas.”

⁴⁴ Piita did stil a priich wen aal av a sodn di Uoli Spirit kom dong an tek kanchuol a aal a di piipl we did a lisn tu di mesij.

⁴⁵ Di Juu dem we biliiv iina Jiizas an we did kom wid Piita did shak. Dem did shak fi si se Gad gi di Uoli Spirit iivn tu di piipl we a no Juu.

⁴⁶ Dem nuo se dem get di Uoli Spirit kaaz dem did ier di piipl we a no Juu a taak iina tongz an a priez Gad. Den Piita se,

⁴⁷ “Gad gi di Uoli Spirit tu dem piipl ya siem laik wi, so enibadi kyan tap dem fram get baptaiz?”

⁴⁸ So Piita gi aada fi dem get baptaiz iina Jiizas Krais niem. Den di piipl a Kaaniiliyos ous aks im fi stie wid dem fi a likl wail.