Read Jamaican Patois Aks 11 Bible Online

Aks 11 - Jamaican Patois bible

Aks 11

¹ Di apasl dem an di ada breda an sista dem aal uova Judiya we biliiv iina Jiizas ier se di piipl we a no Juu biliiv Gad wod tu.

² So wen Piita go baka Jeruusilem, di biliiva dem we sorkomsaiz did tingk im rang an staat aagyu wid im.

³ Dem se tu im se, “Yu go a di ous a piipl we a no Juu an iit wid dem?”

⁴ So Piita tel dem evri singgl ting we apm fram staat tu finish. Im se,

⁵ “Mi did de iina di siti dong a Japa a prie an get wan vijan. Iina mi vijan mi si sitn laik wan big big shiit get let dong fram di skai. It did komiin laik piipl did uol di fuo kaana dem an a let it dong tu we mi did de.

⁶ Wen mi luk iina di shiit mi si aal kain-a animal: animal we av fuo fut, animal we kraal pan dem beli an av kuol blod, an som wail bod.

⁷ Den mi ier wan sumadi se tu mi, ‘Piita, git op. Kil som a dem animal ya an nyam dem.’

⁸ “An mi ansa im se, ‘Uu mi? Nuo Laad, ou mi fi du dat? Mi neva nyam non a dem de sitn de we di Laa se yu no fi nyam kaaz dem no kliin.’

⁹ “Den di vais fram evn se tu mi di sekan taim se, ‘No tek notn we Gad mek kliin an se it doti an no gud fi iit.’

¹⁰ Chrii taim di siem ting apm, an den di shiit get tek op bak iina evn.

¹¹ “Siem taim dat apm chrii man we kom fram Sesuriiya riich a di ous we wi did a stie.

¹² Di Uoli Spirit tel mi fi go wid dem an no ich. Dem siks breda ya did go a Sesuriiya wid mi an aal a wi go iina Kaaniiliyos ous.

¹³ Im tel wi ou im did si wan ienjel kom tu im iina im ous an tel im fi, ‘Sen som man go a Japa go kaal Saiman Piita.

¹⁴ Im wi priich wan mesij tu yu. Da mesij de wi tel yu an evribadi iina yu ous ou unu kyan get siev.’

¹⁵ “Den siem taim mi staat taak tu dem, di Uoli Spirit tek kanchuol a dem siem laik ou im did tek kanchuol a wi di fos taim.

¹⁶ A da taim de mi memba ou di Laad did se: ‘Jan baptaiz piipl wid waata, bot Gad a-go baptaiz unu wid di Uoli Spirit.’

¹⁷ So ef Gad gi di Uoli Spirit tu di piipl we a no Juu siem laik ou im did gi wi di Uoli Spirit kaaz wi biliiv iina Jiizas, a uu mi fi go fait gens Gad?”

¹⁸ Wen dem ier aal we Piita se dem tap aagyu wid im. Insted-a dat dem staat priez Gad an se, “So den Gad gi di piipl we a no Juu di chaans fi ton we fram dem sin an get siev so dem kyan liv fi eva an eva.”

¹⁹ Afta di Juu dem kil Stiivn, sofarieshan tek di piipl dem we biliiv iina Jiizas an kaaz som a dem fi get skyata skyata. Dem skyata go klier a Foniisiya, Saipros, an Antiyak, an evriwe dem go dem priich di gud nyuuz, bot a onggl di Juu dem wan dem did a priich tu.

²⁰ Bot yu did av som man we kom fram Saipros an Sairiin we did mongks dem piipl de we kom a Antiyak. Dem man de staat tu priich di gud nyuuz bout di Laad Jiizas tu di piipl we a no Juu tu.

²¹ Di Laad Gad did de wid dem an im gi dem powa fi priich an wan uol iip a piipl biliiv an ton tu di Laad.

²² Nyuuz bout wa did a apm iina Antiyak riich di piipl dem iina Jeruusilem we biliiv iina di Laad, so di liida dem sen Baanabas go a Antiyak.

²³ Wen im riich an si ou Gad did gud tu dem iivn duo dem neva dizorv it, im did wel api an elp push aal a dem fi gwaan chos iina di Laad wid aal a dem aat.

²⁴ Baanabas a did wan gud man. Di Uoli Spirit did tek kanchuol a im laif an im did biliiv nof nof. Siek-a im, uol iip muor piipl ton tu di Laad an get siev.

²⁵ Den Baanabas lef go a Taasos fi go luk fi Saal,

²⁶ an wen im fain im, im kyari im baka Antiyak wid im. So fi wan uol ier Baanabas an Saal miit op wid di choch piipl an tiich kroud an kroud a piipl. An dong a Antiyak a di fos plies we di biliiva dem get di niem Kristiyan.

²⁷ Roun dem siem taim de som prafit fram Jeruusilem kom dong a Antiyak.

²⁸ Wan a dem we niem Agabos tan op fi priich. Di Uoli Spirit tek kanchuol a im an mek im taak bout ou wan torbl staavieshan a-go tek di uol worl. (Wa Agabos se apm wen taim Klaadiyos did a ruul uova Ruom.)

²⁹ So di piipl dem we biliiv iina Jiizas mek op dem main fi elp Gad piipl we de iina Judiya. Evribadi gi wa dem kuda gi an dem gi bies pan wa dem av.

³⁰ Dem sen di moni wid Baanabas an Saal go gi di choch liida dem a Jeruusilem.