Read Jamaican Patois Aks 12 Bible Online

Aks 12 - Jamaican Patois bible

Aks 12

¹ Roun dem taim de, King Erad gi aada fi ares som a di choch piipl dem. Im du dat kaaz im did plan fi mek dem sofa aad aad.

² Im mek dem kil Jiemz, Jan breda, wid wan suod.

³ Wen im si se wa im did du tu Jiemz mek di Juu dem api, im gi aada fi ares Piita tu. Dis apm wen di Paasuova alidie did a gwaan.

⁴ Afta Erad mek im suoja dem ares Piita im put im iina prizn. Im put fuo gruup a suoja fi gyaad im an iich gruup did av fuo suoja. Erad did plan fi joj Piita infronta evribadi wen di Paasuova alidie don.

⁵ So dem kip Piita lak op iina prizn, bot di choch piipl dem did a prie tu Gad wid aal a dem aat fi im.

⁶ Pan da siem nait de, di nait bifuo Erad did plan fi joj Piita infronta evribadi, Piita did a sliip bitwiin tuu suoja. Dem did tai im op wid tuu chien an dem did av tuu suoja infronta di duor a gyaad di prizn.

⁷ Aal av a sodn wan a di Laad ienjel dem tan op infronta Piita an wan brait brait lait shain iina di prizn. Im lik Piita iina im said an wiek im op. Im se, “Git op, kwik!” Siem taim di chien jrap aafa Piita an.

⁸ Di ienjel se tu Piita se, “Bokl yu belt an put aan yu slipaz.” So Piita du dat. Den di ienjel se tu im se, “Put aan yu lang jakit an fala mi.”

⁹ Piita fala di ienjel outa di prizn, bot im neva tingk se wa di ienjel did a du did riili a apm. Im did tingk se a wan vijan.

¹⁰ Afta di tuu a dem paas di fos an di sekan gyaad, dem riich di aiyan giet we liid iina di siti. Di giet uopm itself fi dem an dem go chuu di giet an waak dong wan naro chriit. Aal av a sodn di ienjel disapier lef Piita.

¹¹ A da taim de Piita kom tu imself an se, “Nou mi nuo fi riil se di Laad sen im ienjel an frii mi fram Erad an di sitn dem we di Juu dem did tingk Erad did a-go du tu mi.”

¹² Wen Piita si wa riili apm, im go a Mieri ous, dat a Jan Maak mada. Nof piipl did gyada op an did a prie.

¹³ Wen im nak a di giet, wan sliev gyal niem Ruoda go tu im.

¹⁴ Wen shi ier di vais an fain out se a did Piita, di wie ou shi did so api shi ron bak iina di ous an no uopm di giet. Shi tel evribadi se a Piita outa duor.

¹⁵ Bot dem se tu ar se, “Yu ed a tek yu!” Bot shi kip aan a tel dem se a im out de fi riil, an dem kip aan a se tu ar se, “A mosi im ienjel!”

¹⁶ Aal da taim de Piita did stil a di giet a nak. Wen dem uopm di duor an si im, dem did wel shak.

¹⁷ So Piita mek wan sain wid im an an se, “Shhh, tap unu naiz!” Den im tel dem ou di Laad Gad sen wan a im ienjel an frii im outa prizn. Im se, “Tel Jiemz an di ada breda dem bout wa apm.” Afta dat im lef an go a wan neda plies.

¹⁸ Wen die lait di suoja dem did fried an wel kanfyuuz, kaaz non a dem kudn tel wa apm tu Piita.

¹⁹ Afta Erad sorch fi Piita an kudn fain im, im kwestiyan di gyaad dem an gi aada fi tek dem an kil dem. Den Erad lef Judiya an go a Sesuriiya go stie.

²⁰ Erad did riili riili beks wid di piipl dem fram Taiya an Saidan. So di piipl dem jain op tugeda iina wan gruup an go fi miit di King. Bot fos dem manij fi get Blastos, we di inchaaj a di king palis, fi elp dem. Den dem go beg di king paadn an mek piis wid im, kaaz dem get fi dem fuud fram di king konchri.

²¹ Wen di die kom we Erad did set fi miit wid dem, im put aan im speshal king kluoz, sidong pan im speshal siit fi joj an taak tu di piipl dem.

²² Wen di piipl dem ier di king dem staat fi shout out an a se, “A no jos wan naamal man dis a taak, im soun laik im a wan gad.”

²³ Siem taim wan a di Laad ienjel chraik dong Erad kaaz im tek di priez fi imself insted-a mek di piipl dem priez Gad. Di siknis we im get mek worm staat nyam im til im ded.

²⁴ Bot muor an muor piipl ier Gad wod an staat biliiv iina Jiizas.

²⁵ Afta Baanabas an Saal don wa dem did go a Jeruusilem fi du, dem lef an tek Jan Maak wid dem.