Read Jamaican Patois Aks 13 Bible Online

Aks 13 - Jamaican Patois bible

Aks 13

¹ Nou yu did av som prafit an som tiicha mongks di biliiva dem we did de a Antiyak: man laik Baanabas, Simiyan we dem kaal Naiga, Luushos fram Sairiin, Manoyen (im an Erad di ruula a did gud gud fren fram dem a pikni) an Saal.

² Dem did a sorv di Laad an a kip we fram fuud wen di Uoli Spirit se tu dem se, “Frii op Baanabas an Saal so dem kyan du di wok we mi did pik dem fi du.”

³ So afta dem taim fi kip we fram fuud an prie did don, dem put dem an pan Baanabas an Saal ed, prie fi dem, an sen dem aaf.

⁴ Di Uoli Spirit sen out di tuu a dem an dem lef go dong a Siluukiya an fram de-so dem siel go Saipros.

⁵ Wen dem riich a Salamis, dem staat priich Gad wod iina di Juu dem choch. (Dem did av Jan wid dem fi elp dem wid di wok).

⁶ Afta dem chravl kraas di uol konchri til dem riich wie a Pafos, dem miit wan uobiya man, wan Juu we niem Bar-Jiizas we a did wan faalz prafit.

⁷ Bar-Jiizas an di govana fi di konchri, Sorjiyos Paalos, a did fren. Di govana a did wan man we brait an av nof sens. Im sen kaal Baanabas an Saal, kaaz im did waahn fi ier Gad wod.

⁸ Bot Elimas di uobiya man (iina di Griik langwij a so dem kaal im) tan op chrang gens Baanabas an Saal, a chrai fi mek di govana ton gens di gud nyuuz.

⁹ Bot di Uoli Spirit tek kanchuol a Saal (we dem kaal Paal), an im luk chriet pan Elimas

¹⁰ an se tu im se, “Yu komiin laik Sietan pikni! Yu aalwiez a go gens evriting we rait! Yu ful op a lai an yu a wan uol jinal. Yu naa tap chrai fi mek di Laad chuut komiin laik se it a lai?

¹¹ Rait nou Gad a-go chraik yu dong an blain yu an yu naa go kyan si di son lait fi nou.” Siem taim im yai dem get fag op an daak an im staat fiil im wie roun an a chrai fi fain sumadi fi uol im an an liid im we im waahn fi go.

¹² Wen di govana si evriting wa apm, im biliiv, an wa Paal an Baanabas did a tiich bout di Laad Jiizas did riili kaaz im fi wanda aad aad.

¹³ Paal an di man dem we did a chravl wid im siel fram Pafos go a Porga iina Pamfiliya, bot Jan lef dem an ton bak go a Jeruusilem.

¹⁴ Dem lef Porga an go a Pisidiyan Antiyak. Pan di Sabat dem go iina di Juu dem choch go sidong.

¹⁵ Afta sumadi riid fram di Laa buk an fram di Prafit dem, di liida dem fi di Juu dem choch sen wan mesij tu dem se, “Breda, ef unu av wan mesij we kyan elp bil op di piipl dem unu taak op.”

¹⁶ So Paal get op an mek wan sain wid im an tu di piipl an se, “Aal a unu Izrel piipl an piipl we a no Juu we worship Gad, ier wa mi a se!

¹⁷ Di Gad fi di Izrel piipl pik wi faada faada dem. Im mek im piipl gruo muo an muo an get nof an chrang wen dem did a liv iina Iijip. Den im yuuz im powa an frii dem outa da konchri de.

¹⁸ Fi bout faati ier, out iina di bush we nobadi neva liv, im tek kier a dem an put op wid dem bad brok wie.

¹⁹ Im mek dem kil aaf an mash op di piipl dem fram sevn difrant konchri we did liv iina Kienan an tek fi dem konchri gi fi’im piipl.

²⁰ Aal a dem sopm ya tek bout fuo onjrid an fifti ier fi apm. “Afta dat Gad riez op liida mongks dem, wan afta di ada, til di taim wen im gi dem Samwel di prafit.

²¹ Den di piipl aks Samwel fi pik wan king gi dem. So Gad pik Saal, Kish bwai pikni, we kom fram Benjamin chraib, an im ruul dem fi faati ier.

²² Gad tek we di king pozishan fram Saal an gi Dievid. Gad taak gud bout Dievid, im se, ‘Mi si se Dievid, Jesi bwai pikni a wan man we wi tingk ou mi wuda tingk an we wi du evriting we mi waahn im fi du.’

²³ “Da siem man ya, Dievid, Gad pik wan a im pikni pikni dem, di wan niem Jiizas, an sen im fi kom siev di Izrel piipl, kaaz a dat im did pramis dem faada faada se im wuda du.

²⁴ Bifuo Jiizas did kom Jan priich tu di Izrel Piipl dem se dem fi ton we fram dem sin an get baptaiz.

²⁵ Wen Jan did suun don di wok we Gad gi im fi du im se tu di piipl dem se, ‘Unu tingk se mi a di wan we fi kom, bot mi a no im. Nuo! Bot di wan we fi kom suun kom, an mi no iivn gud inof fi tek aaf im slipaz aafa im fut.’

²⁶ “Breda an sista we a Iebriyam pikni, an aal a unu we a no Juu we rispek Gad, a wi di mesij kom tu bout ou Gad siev piipl.

²⁷ Bot di piipl dem we liv iina Jeruusilem an dem ruula dem neva andastan se Jiizas a di wan we did kom fi siev dem. Di sitn dem we di prafit rait an we di piipl an dem liida dem riid bout iina dem choch evri Sabat, dem mek aal a dem sitn de kom chuu wen dem ton dem bak pan Jiizas an sen im fi go ded.

²⁸ Iivn duo dem neva fain notn fi chaaj im fa, dem beg Pailat fi kil im pan di kraas.

²⁹ Afta di Izrel piipl dem du aal we di prafit dem se dem wuda du tu Jiizas, dem tek im badi aafa di kraas an beri it iina wan griev.

³⁰ Bot Gad mek im kom bak alaiv,

³¹ an difrant difrant taim fi kopl die wel Jiizas shuo imself tu di piipl dem we did kom wid im fram Gyalalii tu Jeruusilem. A dem siem piipl de a tel piipl bout im nou.

³² “Gad did mek wan pramis tu wi faada faada dem. An wi de ya fi tel unu di gud nyuuz bout di pramis.

³³ Im kip im pramis we im did mek tu wi faada faada dem wen im mek Jiizas kom bak alaiv. Kaaz it rait dong iina Saam tuu se, “ ‘Yu a fi mi bwai pikni; tide tide mi ton yu faada.’

³⁴ Gad mek Krais Jiizas ded an kom bak alaiv, an im kyaahn ded agen. An dis a wa Gad did se bout dat: “ ‘Mi a-go elp yu an gi yu di siem speshal pramis we mi did gi Dievid.’

³⁵ An it rait dong wan neks plies se: “ ‘Yu naa go mek yu sorvant we aalwiez du we yu waahn im fi du ded an ratn.’

³⁶ “Kaaz afta Dievid du we Gad did waahn im fi du mongks fi’im piipl we im gruo op wid, im ded an dem beri im mongks im faada faada dem griev an im badi ratn.

³⁷ Bot di wan we Gad mek ded an kom bak alaiv, fi’im badi neva ratn.

³⁸ “So mi breda an sista, mi waahn unu fi nuo dis, so wi a tel unu se, siek-a wa Jiizas du, Gad waahn unu fi nuo se unu kyan get paadn fu’unu sin dem.

³⁹ Siek-a wa Jiizas du, evribadi we biliiv iina im, Gad mek dem no gilti no muor an frii dem fram dem sin wen Muoziz Laa kudn du dat.

⁴⁰ Main wa di prafit dem se kech unu: dem se,

⁴¹ “ ‘Luk ya, aal a unu we a bad chat we Gad se, unu a-go get joj. Kaaz mi a-go du som sopm iina da taim ya dat unu wuda neva biliiv, iivn ef sumadi tel unu.’ ”

⁴² Wen Paal an Baanabas did a lef di Juu dem choch, di piipl dem beg dem fi kom taak tu dem agen bout dem sitn ya di neks Sabat.

⁴³ Afta di Juu dem choch uova, nof a di Juu dem an di piipl dem we did ton Juu fala Paal an Baanabas. Paal an Baanabas did a taak tu dem an a tel dem no fi tap chos Gad fi shuo dem lov iivn duo dem neva dizorv it.

⁴⁴ Di neks Sabat, nieli di uol toun gyada op fi ier Gad wod.

⁴⁵ Wen di Juu dem si di kroud, dem get red yai an staat bad main Paal, an staat chat bout se wa im a se bout Jiizas a lai, an chat bad sitn bout Paal tu.

⁴⁶ Bot Paal an Baanabas neva fried fi tel dem di chuut. Dem se, “Wi did afi priich Gad wod tu unu fos bifuo wi kuda priich tu di piipl we a no Juu, kaaz a dat Gad tel wi fi du. Bot unu ton unu bak pan Gad mesij an se a lai wi a tel. Da wie de unu ton unu bak pan Gad. An unu tingk se unu neva gud inof fi liv wid im fi eva an eva laik wa im did pramis. So fram nou aan, wi a lef unu an go priich Gad mesij tu di piipl dem we a no Juu.

⁴⁷ Dis a wa di Laad Gad aada wi fi du, im se: “ ‘Mi pik yu laik wan lait fi mek di piipl we a no Juu nuo bout mi, fi tel piipl aal uova di worl bout di wan we kom fi siev dem.’ ”

⁴⁸ Wen di piipl we a no Juu ier dis, dem api so til. Dem gi tangks an priez fi Gad mesij. An aal a di wan dem we Gad did pik fi liv fi eva, biliiv di mesij an get siev.

⁴⁹ So Gad wod did a pred aal uova di konchri.

⁵⁰ Bot di Juu dem rail op di uman dem we rich an we worship Gad, an di big impuotant man dem iina di toun. Dem du som torbl sitn gens Paal an Baanabas an mek dem sofa an ron dem outa dem toun.

⁵¹ So Paal an Baanabas shiek aaf di dos aafa dem fut fi mek dem nuo se Gad no api wid dem an im a-go joj dem. Den dem go we go a Aikoniyom.

⁵² An di choch piipl dem did wel api an di Uoli Spirit did tek kanchuol a dem.