Read Jamaican Patois Aks 15 Bible Online

Aks 15 - Jamaican Patois bible

Aks 15

¹ Den som man kom fram Judiya kom a Antiyak. Dem staat fi tiich di piipl we biliiv iina Jiizas se, “Ef unu no get sorkomsaiz azkaadn tu we Muoziz Laa se, unu kyaahn get siev.”

² Paal an Baanabas aagyu chrang chrang gens wa dem man de did a tiich, an tan op tu dem an mek dem nuo se dem rang. So di choch pik Paal an Baanabas, an som ada biliiva fi go wid dem a Jeruusilem fi go taak tu di apasl an elda dem bout di mata.

³ Di choch sen dem aaf, an wen dem did a go chuu Foniisiya an Samieriya dem tel di piipl dem we biliiv iina Jiizas ou nof a di piipl we a no Juu iina Antiyak biliiv di gud nyuuz. Dat mek di biliiva dem wel api.

⁴ Wen dem riich a Jeruusilem, di choch, di apasl dem, an di elda dem tek dem iin. Den Paal an Baanabas tel dem evriting we Gad mek dem du mongks di piipl we a no Juu.

⁵ Den som a di choch piipl dem we a paat a di Farisii gruup tan op an se, “Di piipl we a no Juu afi get sorkomsaiz an wi afi aada dem fi kip Muoziz Laa tu.”

⁶ Di apasl an di elda dem mek op dem main fi miit an diil wid di prablem.

⁷ Afta dem did a aagyu fi wan gud wail, Piita get op an taak tu dem. Im se, “Mi breda, unu nuo ou lang taim a-go Gad pik mi fram mongks unu an yuuz mi fi tel di piipl we a no Juu di Gud Nyuuz so dem wuda biliiv iina Jiizas.

⁸ Gad, di wan we nuo evribadi aat, gi dem im Uoli Spirit, an dat shuo se im tek dem fi im piipl siem laik ou im did du wid wi.

⁹ Gad shuo se wi no difrant fram dem. Im paadn dem fi dem sin kaaz dem biliiv iina im.

¹⁰ So tel mi nou, wa mek unu waahn flai iina Gad fies fi go presha im piipl fi du wa Gad neva aada dem fi du, sitn we no iivn wi ar fi wi faada faada dem kuda du?

¹¹ Nuo man! Wi biliiv a chuu wi Laad Jiizas lov wi iivn duo wi no dizorv it wai im siev wi jos laik ou im siev dem.”

¹² Evribadi iina di miitn kip kwaiyat an lisn tu Paal an Baanabas wail dem tel dem bout di mirikl an di powaful sitn dem wa Gad gi dem powa fi du mongks di piipl we a no Juu.

¹³ Wen dem don taak, Jiemz taak op an se, “Breda unu lisn tu mi.

¹⁴ Simiyan jos tel wi ou Gad shuo se im kier fi di piipl we a no Juu wen im tek som a dem fi bi im uona piipl.

¹⁵ Wa di prafit dem se grii wid dis, kaaz it rait dong se:

¹⁶ “‘Lieta aan mi a-go kom bak kom bil op bak Dievid kindom we did get mash dong. Mi a-go bil it bak op, an mek it chrang agen,

¹⁷ so dat aal di piipl we a no Juu we bilang tu mi, an di res a piipl iina di worl wi ton tu di Laad. A di Laad se dem sitn ya’

¹⁸ an piipl nuo dem sitn de fram wie bak wen.”

¹⁹ So Jiemz se tu dem se, “Ier mi nou, mi fiil se wi fi lef di piipl we a no Juu an no chrai fi mek it aad fi dem ton tu Gad.

²⁰ Insted-a dat, wa wi fi du a rait an tel dem se dem no fi nyam no fuud we piipl tek bon sakrifais gi faalz gad, ton we fram aal saat a seks sin, no nyam miit fram animal we eng ar we dem blod neva bliid out wen dem get kil, an no nyam ar jringk blod.

²¹ Kaaz fi wan lang lang taim, evri Sabat dem riid Muoziz Laa iina di Juu dem choch an dem priich evriting we rait dong iina da Laa de iina evri toun.”

²² Den di apasl dem, di elda dem an aal a di choch piipl dem mek op dem main fi sen som man fram di choch go a Antiyak. So dem pik tuu a dem liida, Juudas (we niem Baasabas) an Sailas an sen dem wid Paal an Baanabas.

²³ Dis a di leta we dem gi dem fi gi di choch: Wi, di apasl an elda dem, we a unu breda, a rait an a sen oudi tu aal a unu we de a Antiyak, Siriya, an Silisiya we biliiv iina Jiizas.

²⁴ Wi ier se som man fram wi gruup kom a mek chobl fi unu an a chrai fi mes op unu ed wid di sitn dem we dem a tiich, bot wi neva sen dem, ar wi neva gi dem no rait fi du wa dem a du.

²⁵ So aal a wi mek op wi main fi pik som man an sen dem tu unu wid wi gud gud fren dem, Baanabas an Paal.

²⁶ Dem tuu man ya nieli ded a du di wok we wi Laad Jiizas Krais gi dem fi du.

²⁷ So wi a sen Juudas an Sailas wid dem fi tel unu wid dem uona mout di siem sitn wa wi rait iina da leta ya.

²⁸ Di Uoli Spirit tingk se it bes fi wi no put no muo presha pan unu dan wa wi bout fi tel unu nou, an wi tingk so tu.

²⁹ Unu no fi nyam no fuud we piipl tek bon sakrifais gi faalz gad, no nyam ar jringk no blod, no nyam miit fram animal we eng ar we blod neva bliid out wen dem ded. Unu fi kip we fram aal saat a seks sin. Ef unu kip we fram aal a dem sitn de, unu a du di rait ting. Unu tek kier.

³⁰ So afta dem sen aaf di man dem, dem go a Antiyak, gyada op aal a di piipl we biliiv iina Jiizas, an gi dem di leta.

³¹ Wen dem riid out di leta loud, di piipl did api kaaz it elp bil dem op iina wa dem biliiv.

³² Juudas an Sailas a did prafit tu so dem taak nof sopm we elp fi mek di piipl we biliiv iina Jiizas get chrang iina wa dem biliiv.

³³ Afta Juudas an Sailas spen kopl wiik wid dem, di choch piipl dem prie fi Gad bles dem an mek im piis protek dem an sen dem bak tu di liida dem iina Jeruusilem we did sen dem kom Antiyak.

³⁵ Bot Paal an Baanabas tan a Antiyak an tiich an priich Gad wod. An nof muor tiicha an priicha did iina di choch.

³⁶ Som taim afta dat Paal se tu Baanabas se, “Mek wi go bak go luk fi di breda an sista dem iina aal a di toun dem we wi did priich Gad wod go si ou dem a du.”

³⁷ Baanabas did waahn kyari Jan, we dem kaal Maak, wid dem tu.

³⁸ Bot Paal neva tingk it rait fi tek im wid dem. Im tan op chrang gens it, kaaz di fos taim wen dem did a pred di Gud Nyuuz, wen dem riich a Pamfiliya, Jan Maak did ton bak bifuo dem don di wok.

³⁹ Paal an Baanabas kech op an tingz get so bad dat dem kudn sekl it. So Baanabas tek Maak wid im an siel go a Saipros,

⁴⁰ bot Paal pik Sailas an lef out afta di biliiva dem prie an aks di Laad fi tek kier a dem.

⁴¹ So dem paas chuu Siriya an Silisiya an elp di piipl dem we biliiv iina Jiizas fi tan op chrang iina wa dem biliiv.