Read Jamaican Patois Aks 16 Bible Online

Aks 16 - Jamaican Patois bible

Aks 16

¹ Den Paal go a Dorbi an Lischra. Nou yu did av wan choch breda de niem Timoti. Im mada a did wan Juu we biliiv iina Jiizas, bot im faada a did Griik.

² Di choch piipl iina Lischra an Aikoniyom taak gud bout im.

³ Paal did waahn Timoti fi go wid im, so im mek Timoti get sorkomsaiz. Im du dis kaaz di Juu dem we did liv iina di ieriya did nuo se Timoti faada a did Griik. Dat miin se Timoti neva did sorkomsaiz.

⁴ An iina evri toun we dem go, dem gi di piipl dem we biliiv iina Jiizas di ruul dem we di apasl an di elda dem iina Jeruusilem did se di piipl we a no Juu fi fala.

⁵ So di choch piipl dem get chrangga an chrangga iina wa dem biliiv an evridie muor an muor piipl jain dem gruup.

⁶ Di Uoli Spirit wudn lou dem fi priich di gud nyuuz iina Iezha, so dem muuv chuu Frijiya an Gyaliesha.

⁷ Wen dem riich a Misiya, dem chrai fi go iina Bitiniya, bot di Uoli Spirit neva lou dem.

⁸ So dem paas chuu Misiya an go dong a Chuowas.

⁹ Iina di nait Paal get wan vijan. Im si wan man fram Masiduoniya tan op an a beg im aad aad se, “Kom uova Masiduoniya kom elp wi!”

¹⁰ Afta Paal get di vijan, wi mek op wi main se Gad did waahn wi fi go priich di Gud Nyuuz tu dem, so wi chrai siem taim fi go a Masiduoniya.

¹¹ Den wi tek wan buot fram Chuowas an fala wan chriet lain go a Samachries. Di neks die wi siel go a Niyapolis.

¹² Fram de-so wi siel go a Filipai. Filipai a did wan big impuotant siti iina da ieriya a Masiduoniya de we a did wan Ruoman parish.

¹³ Pan di Sabat die wi go chuu di siti giet go a di rivasaid. Wi go de kaaz wi did uop fi fain wan plies we piipl gyada op fi prie tu Gad. So wi sidong an staat fi taak tu di uman dem we did gyada op de.

¹⁴ Yu did av wan uman mongks dem fram Taiyataira niem Lidiya we yuus tu sel som dier porpl klaat. Shi did lov Gad so moch dat shi aalwiez a du di sitn dem we shi nuo Gad waahn ar fi du. Di Laad toch ar aat mek shi andastan an biliiv wa Paal did a se.

¹⁵ Afta shi an di piipl we liv a ar ous get baptaiz, shi beg wi fi kom a ar yaad. Shi se, “Ef unu tek mi fi wan a di Laad piipl we riili biliiv iina im, kom tan a mi yaad.” Shi win wi uova, so wi go wid ar.

¹⁶ Wen wi did a go a di plies we piipl prie tu Gad, wan gyal we dem tek ton sliev miit wi. Shi did av wan diiman iina ar we mek shi kuda tel piipl we a-go apm iina di fyuucha. Shi yuus tu mek nof moni fi ar maasta dem we shi wok fa laik wan riida uman.

¹⁷ Shi kip aan a fala baka wi an Paal an a baal out, “Dem man ya a di Muos ai Gad sorvant dem. Dem a priich an a tel unu di wie ou unu fi get siev.”

¹⁸ Die afta die shi kip aan a du di siem ting. Bot Paal get riili riili beks. So im ton roun an se tu di spirit we did iina di gyal se, “Iina Jiizas Krais niem. Kom outa ar!” An di spirit kom out siem taim.

¹⁹ Bot wen ar maasta dem si se dem naa go kyaahn mek no muor moni aafa ar, dem grab Paal an Sailas an jrag dem go a di maakit plies infronta di joj dem.

²⁰ Wen dem put dem infronta di joj dem, dem se, “Yu si dem man ya, a bier chobl dem a kaaz iina wi toun. Dem a Juu

²¹ an dem a tiich an a tel wi fi du som sitn we fi wi laa no lou wi fi du kaaz wi a Ruoman piipl.”

²² Di piipl iina di kroud jain iin an staat fi biit Paal an Sailas. So di joj dem tier aaf Paal an Sailas dem kluoz an gi aada fi biit dem wid tik.

²³ Afta dem don biit dem bad bad, dem put dem iina prizn an gi aada fi di waadn lak dem dong tait tait fi mek shuor se dem kyaahn get we.

²⁴ Di waadn put dem iina wan lak op we de faar faar anda di grong iina di prizn. Den im faasn dem fut iina som evi wud.

²⁵ Roun migl nait Paal an Sailas did a prie an a sing priez tu Gad, an di ada prizna dem did a lisn.

²⁶ Aal av a sodn wan powaful ortkwiek apm we shiek dong tu di prizn grong. Aal di prizn duor dem flai uopm, an di prizna dem chien bos aaf.

²⁷ Wen di waadn wiek op an si di prizn duor dem uopm op, im did bout fi tek im suod an kil imself, kaaz im did shuor se a brok di prizna dem did brok out.

²⁸ Bot Paal baal out tu im se, “No kil yuself kaaz aal a wi stil de ya!”

²⁹ So di waadn kaal tu sumadi fi gi im wan lamp. Im buolt iina di prizn, fling dong imself a Paal an Sailas fut a chrimbl.

³⁰ Den im tek dem outa duor an aks dem se, “Sa, wa mi afi du fi get siev?”

³¹ Dem se tu im se, “Biliiv iina di Laad Jiizas an yu wi get siev, yu an aal uu liv iina yu ous.”

³² Den Paal an Sailas priich Gad mesij tu im an tu aal uu liv iina im ous.

³³ An siem taim da nait de, di waadn tek dem an luk aafa dem kot. An rait afta dat im an evribadi iina im ous get baptaiz.

³⁴ Di waadn kyari dem go a im yaad an gi dem som fuud fi iit. An im an im uol fambili did wel api se dem ton tu Gad an biliiv iina im.

³⁵ Di neks maanin di Ruoman ruula dem sen di poliis fi go tel di waadn fi let go di man dem.

³⁶ Di waadn tel Paal se, “Di ruula dem sen aada fi mi let unu go. So unu frii fi go nou, so gwaan iina piis.”

³⁷ Bot Paal se tu di poliis man dem se, “Dem biit wi op iina di uopm infronta evribadi wen dem neva iivn chrai wi fi si ef wi did du notn rang — iivn duo a Ruom wi kom fram an dem lak wi op iina prizn. An nou dem waahn fi aid an sen wi we. Dem mosi mad! Dem afi kom liid wi out demself!”

³⁸ Di poliis man dem go tel di ruula dem wa Paal an Sailas se. An wen dem fain out se a Ruom Paal an Sailas did kom fram, dem fraitn so til.

³⁹ So di ruula dem kom beg dem paadn an tel dem ou dem sari fi wa dem du tu dem. Afta dem liid dem out, dem beg dem uova an uova fi lef di siti.

⁴⁰ Wen dem lef di prizn, dem go a Lidiya yaad. Dem taak tu di breda an sista dem an tel dem no fi tap biliiv iina Jiizas. Afta dat dem lef di siti.