Read Jamaican Patois Aks 18 Bible Online

Aks 18 - Jamaican Patois bible

Aks 18

¹ Afta dat Paal lef Atenz an go a Korint.

² Iina Korint Paal miit wan Juu niem Akwila we did baan iina Pontos. Im an im waif Prisila did no tuu lang muuv fram Itali kaaz Klaadiyos did gi aada se aal a di Juu dem fi lef Ruom. Paal jain op wid dem,

³ an kaaz im an dem du di siem kain-a wok, im tan wid dem an wok wid dem (fi dem wok a did fi mek tent).

⁴ Evri Sabat Paal go a di Juu dem choch an go aagyu wid di Juu dem an wid di Griik piipl dem fi chrai win dem uova.

⁵ Nou wen Sailas an Timoti kom fram Masiduoniya, Paal tap mek tent an yuuz aal a im taim fi priich di mesij an tel di Juu dem se Jiizas a di wan we Gad sen fi siev piipl.

⁶ Wen dem go gens im an kos im out, im tan op tu dem, shiek di dos aafa im kluoz fi mek dem nuo se Gad no api wid dem an im a-go joj dem. Den im tel dem se, “Fram nou aan, ef Gad joj an ponish unu a fu’unu faalt! Mi no rispans! Fram nou aan mi wi go tu di piipl we a no Juu.”

⁷ Den Paal lef di Juu dem choch an go a Taitos Jostos ous. Jostos a did wan man we a no Juu, bot im worship Gad an im ous did de rait saida di Juu dem choch.

⁸ Krispos uu a di liida fi di Juu dem choch an evribadi iina im ous biliiv iina di Laad. An nof a di Korintiyan piipl dem we ier biliiv tu an get baptaiz.

⁹ An iina di nait di Laad se tu Paal iina wan vijan, “No fried, taak op an no kip kwaiyat,

¹⁰ kaaz mi de ya wid yu, an nobadi kyaahn du notn fi ort yu, kaaz mi av nof piipl iina da siti ya.”

¹¹ So im tan de fi wan ier an siks mont an tiich dem bout Gad mesij.

¹² Nou afta Gyaliyo did ton govana fi Akaiya di Juu dem gyada op an grab Paal an jrag im infronta di joj,

¹³ dem se, “Da man ya a chrai fi get piipl fi worship Gad iina wan wie we go gens di Laa!”

¹⁴ Bot jos az Paal did bout fi se sopm, Gyaliyo se tu di Juu dem se, “Ef a did sopm bad ar sopm wikid im did du, it wuda rait fi mi lisn tu unu.

¹⁵ Bot sins unu a aagyu bout wod, an niem an fi unu Laa, unu diil wid dat unuself. Mi naa go joj dem sitn de.”

¹⁶ So im aada som suoja fi ron dem outa di kuot ous.

¹⁷ So dem grab Sostoniiz, di ruula fi di Juu dem choch, an staat biit im infronta di kuot ous. Bot Gyaliyo neva pie dem no main.

¹⁸ Afta Paal tan wid dem iina Korint fi wan lang taim, im tel di breda an sista dem ba-bai. Den im an Prisila an Akwila tek wan ship wa did a siel go a Siriya. Wen dem riich a Senkriya Paal get im ier kot aaf fi kip wan pramis we im did mek tu Gad.

¹⁹ Wen dem riich a Efisos Paal lef Prisila an Akwila an im go iina di Juu dem choch go taak tu dem.

²⁰ So wen dem aks im fi tan likl langga, Paal se nuo.

²¹ So im tel dem ba-bai an se, “Ef Gad waahn mi fi kom bak tu unu agen, mi wi kom bak.” Den im go pan wan ship an lef fram Efisos,

²² an wen im riich a Sesuriiya, im go op a Jeruusilem go tel di choch piipl oudi. Den im lef go dong a Antiyak.

²³ Afta im tan de fi a likl wail, Paal lef an chravl chuu Gyaliesha an Frijiya a tel di choch dem fi tan op chrang fi wa dem biliiv.

²⁴ Roun dem siem taim de wan Juu niem Apalos, we did baan iina Aligzanjriya kom a Efisos. Im a did wan man we wel brait, kyan taak gud, an we nuo Gad wod gud.

²⁵ Im did lorn bout di Laad Jiizas, an taak op chrang an tiich di sitn dem we rait bout Jiizas. Bot im onggl di nuo bout ou Jan baptaiz piipl, im neva nuo bout ou Jiizas se piipl fi get baptaiz.

²⁶ An im neva fried, so im staat fi taak chrang chrang iina di Juu dem choch, bot wen Prisila an Akwila ier im, dem tek im wan said an tiich im so im kuda andastan Gad wod beta.

²⁷ Wen Apalos did waahn kraas uova go a Akaiya, di breda an sista dem push im fi gwaan. Dem rait wan leta tu di breda an sista dem uova de an tel dem fi tek im iin an chriit im gud. Di wan dem we did biliiv kaaz Gad did so gud tu dem, wen Apalos riich im du uol iip fi elp dem.

²⁸ Im aagyu aad aad wid di Juu dem infronta evribadi, an shuo dem klier klier fram Gad wod se Jiizas a di wan we Gad sen fi siev piipl.