Read Jamaican Patois Aks 19 Bible Online

Aks 19 - Jamaican Patois bible

Aks 19

¹ Apalos did de a Korint wen Paal did a chravl chuu di ili paat a di konchri an riich a Efisos. Im si som a di piipl dem we biliiv iina Jiizas de,

² an se tu dem se, “Unu did get di Uoli Spirit wen unu biliiv iina Jiizas?” Dem se, “Nuo, wi neva iivn ier se Uoli Spirit de.”

³ So Paal aks dem agen se, “Wen unu did get baptaiz, wa dat did miin?” Dem se, “Wi get baptaiz kaaz wi biliiv wa Jan tiich.”

⁴ Paal se, “Jan baptaiz piipl we ton we fram dem sin an shuo se dem sari fi wa dem du. An im tel di Izrel piipl fi biliiv iina di wan we did fi kom afta im, dat a Jiizas.”

⁵ Wen dem ier wa Paal se, dem get baptaiz iina Jiizas niem.

⁶ An wen Paal put im an pan dem, di Uoli Spirit tek kanchuol a dem, an dem staat taak iina wan chrienj wie we nobadi no nuo ar andastan, an gi out mesij we kom fram Gad.

⁷ A did bout twelv man did de de.

⁸ So die afta die, fi bout chrii mont, Paal go iina di Juu dem choch an im neva fried fi aagyu wid dem an chrai fi get dem fi biliiv se wa im did a se bout Gad kindom a chuu.

⁹ Bot wen som a dem we did aad-iez mek op dem main no fi biliiv di mesij, an infronta evribadi, chat som torbl sitn gens di Wie ou di Laad se piipl fi liv, Paal lef dem an tek di piipl dem we biliiv iina Jiizas wid im. An evridie Paal tiich dem iina di big ruum we Tairanos yuuz fi taak tu nof piipl.

¹⁰ Paal kip dis op fi tuu ier, so dat evribadi we liv iina Iezha ier di Laad wod, weda dem a Juu ar Griik.

¹¹ Gad gi Paal powa fi du som powaful mirikl

¹² so dat aal korchiv an iepran we im did yuuz fi waip im fies an jrai im an, piipl kyari go gi di sik piipl dem an dem get beta, an di piipl dem we did av diiman — di diiman kom outa dem.

¹³ An yu did av som Juu we did a go roun an a chrai fi aada diiman fi kom outa piipl. Dem did a yuuz di Laad Jiizas niem fi du it, so dem wuda se, “Iina di niem a Jiizas Krais we Paal priich, mi a aada yu fi kum outa da sumadi ya.”

¹⁴ Wan man niem Siiva, we a did di liida fi di Juu priis dem did av sevn bwai pikni we did a du dem sitn de.

¹⁵ Bot di diiman ansa dem bak an se, “Mi nuo Jiizas, an mi nuo bout Paal. Bot yu, a uu yu bi?”

¹⁶ Den di man we di diiman did kanchuol jomp pan dem an biit dem op bad bad. Im biit dem an tier aaf dem kluoz dat dem ron outa di ous niekid an kot op kot op.

¹⁷ Evribadi we liv iina Efisos ier bout dis, weda dem a Juu ar Griik an wen dem ier bout it, dem kech dem fried, an dem priez di Laad Jiizas.

¹⁸ Uol iip a di wan dem we did biliiv tan op infronta evribadi an tel dem bout di rang sitn dem we dem did a du.

¹⁹ An uol iip a dem we yuus tu wok aal kain-a uobiya gyada op dem uobiya buk dem an bon dem op infronta evribadi. An wen dem kount op umoch di buk dem wot, dem fain out se dem did wot fifti touzn dala.

²⁰ An siek-a aal wa did apm muor an muor piipl get fi ier bout di Laad mesij an biliiv it.

²¹ Afta aal a dem sitn ya apm, Paal mek op im main fi go op a Jeruusilem, so im chravl chuu Masiduoniya an Akaiya. An im se, “Afta mi spen som taim op de, mi afi go a Ruom fi a likl wail.”

²² So afta im sen tuu a di piipl we wok wid im, Timoti an Irastos, go a Masiduoniya, im tan iina Iezha fi wan likl wail.

²³ Roun dem siem taim de, som siiros chobl staat op. Piipl did a se aal saat a sopm bout di Wie ou di Laad se piipl wi get fi liv fi eva.

²⁴ Nou yu did av wan man we niem Dimiichriyos we yuus tu mek tingz outa silva. Im yuus tu mek som likl likl ous we luk jos laik di big wan fi di faalz gad we niem Aatimis. An di woka dem yuus tu mek uol iip a moni aafa dem.

²⁵ Dimiichriyos gyada op aal a di piipl we du di siem kain-a wok laik im an di piipl we du sitn kluos tu wa im du an se tu dem se, “Piipl, unu nuo se wi mek nof nof moni aafa da wok ya.

²⁶ An unu si an ier fi unuself ou di wan Paal a get piipl fi biliiv se di gad dem we man mek wid dem an a no gad at aal. An dat naa jos apm iina Efisos, it a apm aal uova Iezha.

²⁷ Ef dis ting no tap, it a-go mash op wi bizniz. An no onggl dat, bot piipl a-go staat tingk se di ous fi di powaful gad Aatimis no wot notn no muor. An piipl aal uova Iezha an di uol worl we yuus tu worship ar, naa go worship ar no muor.”

²⁸ Wen dem ier wa Dimiichriyos se dem get mad an staat baal out pan tap a dem vais an a se, “Aatimis, gad fi di Efisos piipl dem, yu laaj!”

²⁹ Di uol siti did rail op. So dem grab Gaiyos an Ieristaakos, di man fram Masiduoniya we did a chravl wid Paal, an staat jrag dem go a di plies iina di siti we piipl aalwiez gyada op wen sitn speshal a apm.

³⁰ Paal did waahn fi go iina da speshal plies de fi go taak tu di piipl dem, bot di biliiva dem wudn mek im go.

³¹ Aal som a Paal fren dem we di bilang tu di gruup a ruula dem we inchaaj a di siti sen wan mesij tu im an beg im no fi go de.

³² Som a di piipl did a shout wan ting an som did a shout sitn els, kaaz dem did iina wan big miks op. Muos a dem neva iivn nuo wa dem did de de fa.

³³ Som a di piipl iina di kroud tingk se Aligzanda a did di prablem, kaaz di Juu dem did push im op front. So im uol op im an fi di kroud kip kwaiyat so im kuda taak fi imself fi mek dem nuo se im an im fren dem neva du notn.

³⁴ Bot wen di kroud lorn se im a wan Juu, aal a dem staat baal out, “Aatimis, gad fi di Efisos piipl dem, yu laaj!” An dem kip dis op fi bout tuu owa.

³⁵ Di man we inchaaj fi tel di piipl iina di siti bout notn impuotant we di liida dem mek op dem main fi du ar se, im get di kroud fi sekl dong. Den im se tu dem se, “Efisos piipl, uu out de no nuo se a wi inchaaj fi tek kier a di ous fi di powaful Aatimis an ar stuon we jrap fram evn we wi worship?

³⁶ So sins nobadi kyaahn se dem sitn ya no go so, unu fi sekl unuself an tap dis fuulinish we a kaaz so moch chobl.

³⁷ Kaaz unu kyari dem tuu man ya komiin ya iivn duo dem no tiif notn outa di ous fi wi gad, ar se notn bad bout ar.

³⁸ So ef Dimiichriyos an di man dem we du di siem kain-a wok laik im av no prablem wid enibadi, di kuot uopm regila an joj de de. So mek dem kyari it go de-so.

³⁹ Bot ef unu waahn notn els, unu afi go diil wid dat wen di liida dem fi di siti kaal di piipl fi miit.

⁴⁰ Kaaz rait nou di Ruoman ruula kuda chaaj wi fi aal a wa apm ya tide laik ou nobadi kyaahn gi no gud riizn fi wa apm.”

⁴¹ Afta im don taak, im aada dem fi lef di bildin an go a dem yaad.