Read Jamaican Patois Aks 2 Bible Online

Aks 2 - Jamaican Patois bible

Aks 2

¹ Wen Pentikas die kom, aal a di piipl we biliiv iina Jiizas did gyada op iina di siem plies.

² Aal av a sodn dem ier wan naiz a kom fram di skai. Di naiz soun laik wen wan chrang chrang briiz a bluo, an it ful op di uol ous we dem did sidong.

³ Den dem si som sitn we luk laik som likl faiya we shiep laik tong kom res pan evri wan a dem ed.

⁴ Di Uoli Spirit tek kanchuol a aal a dem an gi dem powa fi taak iina som difrant difrant langwij.

⁵ Nou yu did av som Juu we aalwiez a worship Gad an we kom fram aal uova di worl. Di uol a dem did a stie iina Jeruusilem.

⁶ Wen dem ier di big naiz, wan kroud a dem gyada op. Dem did wel shak kaaz evri wan a dem did ier iina fi dem uona langwij wa di biliiva dem did a se.

⁷ Dem did so shak dem kudn biliiv we dem did a ier, so dem aks, “Wiet, aal a dem piipl ya we a taak, no Gyalalii dem kom fram?

⁸ So ou kom evri wan a wi a ier dem a taak iina fi wi uona langwij, di langwij we wi taak fram wi a pikni?

⁹ Evribadi ier dem uona Langwij, piipl we kom fram Paatiya, Miid, Iilom, piipl we kom fram Mesopotiemiya, Judiya, Kyapaduoshiya, Pontos, an Iezha,

¹⁰ piipl we kom fram Frijiya, Pamfiliya, Iijip an di paat a Libiya we nier Sairiin; piipl we kom fram Ruom an jos a tan de likl,

¹¹ (piipl we a Juu an piipl we ton Juu); piipl we kom fram Kriit an piipl we a Arab — wi ier di uol a dem a taak iina fi wi uona langwij bout di powaful sitn dem we Gad du!

¹² Kaaz dem did so shak an kaaz wa dem di ier did kanfyuuz dem, dem aks dem wan aneda, “A wa aal a dis miin?”

¹³ Bot som a dem laaf aafa di biliiva dem an se, “A jongk dem jongk man. Dem jringk tu moch wain we jos mek.”

¹⁴ Den Piita tan op wid di ada ilevn apasl dem, riez im vais an taak tu di kroud a piipl dem se, “Aal a unu we a Juu, an aal a unu we liv iina Jeruusilem, mek a tel unu sopm an unu fi lisn gud wa mi a tel unu.

¹⁵ Dem piipl ya no jongk laik unu tingk. A jos nain aklak a maanin!

¹⁶ No man, a dem sitn ya di prafit Jowel did se wuda apm. Im se:

¹⁷ “Gad se, ‘Iina di laas die dem, mi a-go put mi Spirit iina piipl evriwe. Unu bwai pikni dem an unu gyal pikni dem a-go priich mi mesij. Unu yong man dem a-go get vijan fram Gad, an unu uol man dem a-go andastan Gad mesij chuu di jriim dem we dem get fram Gad.

¹⁸ Iina dem die de mi a-go put mi Spirit iina aal uu du we mi se dem fi du, weda dem a man ar uman, an dem a-go priich mi mesij tu.

¹⁹ Mi a-go shuo som powaful sitn op iina di skai an shuo som sain pan da ort ya, blod an faiya an wan ton a sumuok.

²⁰ Di son a-go ton blak laik nait an di muun a-go ton red laik blod bifuo di big an impuotant die kom fi di Laad du som powaful sitn.

²¹ An evribadi we kaal pan di Laad niem gweehn get siev.’

²² “Unu Izrel piipl, ier we mi a se: Gad yuuz di mirikl, sain an powaful sitn dem we im did mek Jiizas du mongks unu, fi shuo unu klier klier se im did a wok wid Jiizas, di man fram Nazaret.

²³ Azkaadn tu im plan, Gad gi uova da man de tu unu kaaz a so im did set it op, an im did don nuo se a so tingz did a-go go. An unu mek di piipl we a no Juu kil im pan di kraas.

²⁴ Bot Gad mek im kom bak alaiv an frii im fram det powa kaaz det kudn kip im dong fi eva.

²⁵ Dis a wa Dievid did se bout im. Im se, “‘Mi si di Laad, im eva infronta mi. Im aalwiez de wid mi, rait saida mi. Notn kyaahn shiek mi.

²⁶ Siek-a dat an kaaz mi aat api, mi gi yu priez wid mi uona mout. An mi shuor se evriting a-go aarait, iivn duo mi a wan man jos laik evribadi els, bot mi a luk fi get aal wa Gad pramis fi gi mi.

²⁷ Kaaz yu naa go figet mi an lef mi suol mongks di ded, an yu naa go lef yu sorvant we aalwiez du wa yu se fi ratn iina di griev.

²⁸ Yu shuo mi wa mi fi du so dat mi kyan riili liv. An kaaz yu de ya wid mi, yu wi mek mi aat wel api.’

²⁹ “Breda an sista mi no afi fried fi taak tu unu bout wi faada Dievid. Wi nuo se im ded an dem beri im, an im tuum stil de ya op tu tide.

³⁰ Im a did wan prafit an im did nuo se Gad did pramis im se im a-go mek wan a im pikni sidong pan im chuon.

³¹ Chuu Gad did shuo Dievid wa im a-go du bifuo it apm, Dievid taak bout ou Gad wuda mek Krais Jiizas kom bak alaiv afta im ded. Im se Gad wudn lef im iina di griev ar mek im badi ratn.

³² Gad did mek da siem Jiizas de kom bak alaiv, an di uol a wi did si wid wi uona yai.

³³ So Gad big op Jiizas an put im fi sidong a im rait an. An Faada Gad gi im Bwai Pikni di Uoli Spirit jos laik im did pramis. So aal wa unu a si an a ier ya nou, a Jiizas mek dem a apm.

³⁴ Dievid neva get tek op iina evn, bot im se, “ ‘Di Laad tel fi mi Laad se: “Sidong a mi rait an

³⁵ til mi mek yu enimi dem kom ton wan stuul fi yu put yu fut pan.” ’

³⁶ “So mi waahn aal a unu Izrel piipl fi nuo an andastan dis: Gad mek da siem Jiizas ya Laad an Krais.”

³⁷ Wen di piipl dem ier di sitn dem we Piita se, a laik sitn tab dem iina dem aat. So dem aks Piita an di ada apasl dem se, “Wi breda, wa wi fi du?”

³⁸ Piita tel dem se “Aal a unu, ton we fram unu sin dem an shuo se unu sari fi wa unu du, get baptaiz iina Jiizas Krais niem an Gad wi paadn unu fi unu sin dem. Ef unu du dat, Gad wi gi unu im gif, dat a di Uoli Spirit.

³⁹ Wa Gad pramis a fi unu an unu pikni dem an fi aal uu liv faar faar fram ya-so — a fi evribadi we Gad a-go kaal fi bi im pikni.”

⁴⁰ Piita yuuz nof ada wod fi waan dem an fi beg di piipl dem se, “Unu fi tek we unuself fram mongks di wikid piipl we a liv iina dem taim ya, so dat di ponishment we a-go kom pan dem no riich unu tu.”

⁴¹ Di wan dem we biliiv Piita mesij get baptaiz, an da die de, di Laad mek bout chrii touzn muor piipl jain di choch.

⁴² Di piipl dem we biliiv Piita mesij spen di uol a dem taim a lorn fram di apasl dem, shier wa dem av wid wan aneda, iit tugeda an prie tu Gad tugeda.

⁴³ Aal a di piipl dem shuo nof rispek fi Gad kaaz im did mek di apasl dem du nof nof mirikl an som powaful sitn mongks dem.

⁴⁴ Evribadi we biliiv iina Jiizas did stie tugeda — dem a did wan gruup, an dem elp dem wan aneda wid wa dem niid.

⁴⁵ Dem sel som a di sitn dem we dem did av an gi tu wan aneda fram taim tu taim azkaadn tu wa dem niid.

⁴⁶ Evridie dem miit op iina di yaad we Gad ous de. Dem go a wan aneda ous an iit fuud tugeda an dem aat did wel api. Dem did api fi shier wid wan aneda.

⁴⁷ Dem kip aan a priez Gad an aal di piipl iina Jeruusilem did api wid dem an taak gud bout dem. Evridie di Laad Jiizas siev muor an muor piipl an mek dem jain di choch.