Read Jamaican Patois Aks 20 Bible Online

Aks 20 - Jamaican Patois bible

Aks 20

¹ Afta di el an powda ous iina di siti sekl dong, Paal sen fi di biliiva dem. Im taak tu dem an elp dem fi tan op chrang iina wa dem biliiv an den im tel dem ba-bai an lef fi go a Masiduoniya.

² Afta im paas chuu da ieriya de an taak tu di biliiva dem an elp dem tan op chrang iina wa dem biliiv, im riich a Griis,

³ we im spen chrii mont. Bot kaaz di Juu dem did set op deriks fi kil im wen im did a go siel go Siriya, im mek op im main fi go bak chuu Masiduoniya.

⁴ An Sowpata, Piros bwai pikni fram Beriya, Ieristaakos, Sikondos fram Tesalonaika, Gaiyos fram Dorbi, an Timoti, Taikikos an Chrofimos fram Iezha go wid Paal.

⁵ Dem did go bifuo wi an did de a Chuowas a wiet fi wi.

⁶ So afta di Paasuova alidie, wi siel fram Filipai. An it tek wi faiv die fi riich a Chuowas an jain di wan dem we did a wiet fi wi, an wi tan de fi sevn die.

⁷ Pan di fos die a di wiik wen wi gyada op fi brok bred, Paal staat taak tu di piipl. An kaaz im did plan fi lef di neks die, Paal priich til migl nait.

⁸ Nou uol iip a lamp did iina di ruum opstiez we wi did av di miitn.

⁹ An wan yong man niem Yuutikos did a sidong pan wan winda. An wen Paal did a priich, im jrap iina wan diip diip sliip. Im did stil iina diip sliip wen im jrap chuu di winda fram di tord fluor an wen dem pik im op, im ded.

¹⁰ Bot Paal go dongstiez, an chrech out imself uova di yong man badi an og im op. Den im se tu di piipl we did de de se, “Unu no bada baal, im stil alaiv.”

¹¹ Den Paal go bak opstiez, an afta im brok bred an iit, im taak wid dem fi wan lang taim so til die lait. Afta dat im lef.

¹² Som a di biliiva dem fala di yong man go a im yaad. Im did alaiv an dem did wel api.

¹³ Wi tek wan ship an siel go a Asos we Paal wuda jain wi pan di ship. Paal did set tingz op da wie ya, kaaz im did mek op im main fi tek fut an no siel go a Asos.

¹⁴ Wen im miit op wid wi a Asos, im jain wi pan di ship an wi siel go a Mitaliine.

¹⁵ Wi siel out fram de-so an di neks die wi riich a Kaiyas. Di neks die wi riich a Samos an di die afta dat wi riich a Miletos

¹⁶ Paal neva waahn spen no taim iina Iezha, so im did mek op im main fi siel paas Efisos, kaaz im did a ori fi si ef im kuda riich Jeruusilem bifuo Pentikas.

¹⁷ Fram Miletos, im sen sumadi go a Efisos wid wan mesij fi tel di choch elda dem fi kom miit im.

¹⁸ Wen dem riich, im se tu dem se, “Unu nuo ou mi liv di uol taim mi did de ya wid unu, fram di fos die mi riich iina Iezha til nou,

¹⁹ ou mi ombl miself an sorv di Laad. An unu nuo ou mi baal siek-a aal di sofarieshan we mi did afi go chuu siek-a aal wa di Juu dem du tu mi.

²⁰ An unu nuo se wen mi did a priich tu unu, mi neva kip bak notn fram unu we kuda elp unu. An mi neva fried fi tiich unu infronta evribadi an fi go fram ous tu ous a tiich.

²¹ An mi neva fried fi tel piipl we a Juu an piipl we a Griik fi ton we fram dem sin, shuo se dem sari fi wa dem du, ton tu Gad, an biliiv iina Jiizas.

²² “An nou di Uoli Spirit push mi fi go a Jeruusilem an mi a go, iivn duo mi no nuo wa a-go apm tu mi wen mi riich,

²³ bot di Uoli Spirit waan mi se, iina evri toun we mi go, dem a-go lak mi op iina prizn an mek mi sofa.

²⁴ Bot fi mi laif no wot notn tu mi kaaz di onggl ting we mi a liv fa a fi mek shuor se mi don mi wok an du aal we mi Laad Jiizas gi mi fi du, fi tel evribadi bout di Gud Nyuuz — ou Gad lov wi, iivn duo wi no dizorv it.

²⁵ “An aal a unu we mi did go roun an priich tu bout Gad kindom, mi nuo se unu naa go si mi fies agen.

²⁶ So mi a tel aal a unu klier klier se ef eni a unu ded iina unu sin, a no fi mi faalt.

²⁷ Kaaz mi neva kip bak notn fram unu wen mi did a priich tu unu bout wa Gad waahn unu fi du.

²⁸ An siem laik ou wan shepad luk aafa im Shiip dem, a siem so unu fi tek kier a unuself an Gad choch we di Uoli Spirit put unu inchaaj a, an we im mek im uon wen im bwai pikni ded pan di kraas.

²⁹ Mi nuo se afta mi lef som man a-go kom mongks unu we komiin laik som torbl wail animal an dem a-go kom mash op di choch.

³⁰ An di taim a-go kom wen iivn som a unu uona piipl a-go tiich som torbl sitn we go gens di chuut fi get som a unu fi fala dem.

³¹ So wach unuself an memba ou nait an die fi chrii ier, mi neva tap waan evri wan a unu, iivn duo mi did afi go chuu nof sofarieshan.

³² “So nou mi a put unu iina Gad an, an lef unu wid di mesij bout ou Gad lov unu iivn duo wi no dizorv it. Da mesij de wi tek kier a unu an elp unu tan op chrang an gi unu aal wa Gad pramis fi gi aal a im piipl.

³³ Mi neva red yai nobadi fi dem moni ar dem dier kluoz.

³⁴ Unu wel nuo se wid mi uona tuu an dem mi tek kier a aal we mi did niid, an aal we di piipl we wok wid mi did niid tu.

³⁵ Iina evriting we mi du mi shuo unu se wi afi wok aad so wi kyan av inof fi shier wid di wan dem we no av notn. An unu fi memba wa wi Laad Jiizas se, im se, ‘Ef yu gi sumadi sopm, it mek yu muo api dan ef sumadi gi yu sopm.’ ”

³⁶ Afta im don taak tu di elda dem, Paal an aal a dem go dong pan dem nii an prie.

³⁷ An aal a dem staat fi baal loud loud an og op Paal an kis im.

³⁸ An wa mek dem baal so a kaaz im tel dem se dem naa go si im fies agen. Den dem fala im go a di ship.