Read Jamaican Patois Aks 21 Bible Online

Aks 21 - Jamaican Patois bible

Aks 21

¹ An wen di taim kom wi lef dem an siel go chriet a Kos, an di neks die wi riich a Ruodz an fram de-so wi ed fi Patara.

² Wi fain wan ship we a kraas uova go a Foniisiya, so wi go pan it an siel out.

³ Wen wi riich we wi kuda si Saipros, an wi paas it pan di lef-an-said, wi siel go a Siriya. Wi tap a Taiya, kaaz di ship did fi lef di sitn dem we it did a kyari de.

⁴ Afta wi fain di biliiva dem, wi tan wid dem fi sevn die. Di Uoli Spirit shuo di biliiva dem wa did a-go riich Paal iina Jeruusilem, so dem beg im uova an uova no fi go op de.

⁵ An wen a did taim fi wi lef dem, wi shub out agen. Aal a dem wid dem waif an pikni fala wi outa di siti. Afta wi go dong pan wi nii an prie pan di biich,

⁶ wi tel wan aneda ba-bai. Den wi go bak pan di ship an dem go baka dem yaad.

⁷ Wi gwaan siel fram Taiya til wi riich a Talomieyis. An afta wi se oudi tu di biliiva dem, wi tan wid dem fi wan die.

⁸ Di neks die wi lef an go a Sesuriiya an go tan a Filip yaad. Im a did wan a di man dem we priich di Gud Nyuuz, an wan a di sevn man dem we di biliiva dem iina Jeruusilem did pik fi luk aafa di uman dem uufa ozban did ded.

⁹ Filip did av fuo daata we neva marid, an di fuo a dem a did prafit.

¹⁰ Afta wi did de de fi kopl die, wan prafit niem Agabos kom dong fram Judiya.

¹¹ Im kom op tu wi, tek Paal belt, an tai op im uona an an fut an se, “Di Uoli Spirit se, ‘A siem so di Juu dem iina Jeruusilem a-go tai op di man uu uon da belt ya, an ton im uova tu di piipl dem we a no Juu.’”

¹² Wen wi ier dis, wi an di ada biliiva dem fram di ieriya beg Paal uova an uova se, “Du! No go op a Jeruusilem.”

¹³ Den Paal ansa wi se, “Wa unu a du, a baal unu a baal an a brok mi aat? Wel, mi redi no onggl fi dem tai mi op bot aal ef a ded mi a-go ded iina Jeruusilem mi redi fi ded fi mi Laad Jiizas Krais.”

¹⁴ Wen wi si se wi kudn get im fi chienj im main an no go, wi gi op an jos se, “Laad, mek we yu waahn fi apm apm!”

¹⁵ Afta dat wi get wi sitn dem an shub out go a Jeruusilem.

¹⁶ Som a di biliiva dem fram Sesuriiya kom wid wi tu an liid wi go a Nieson ous we wi did fi stie. Nieson did kom fram Saipros an im a did wan biliiva fram wie bak wen.

¹⁷ Wen wi riich a Jeruusilem, di biliiva dem did api fi tek wi iin.

¹⁸ Di neks die Paal go wid wi fi go taak tu Jiemz, an aal di elda dem fi di choch did de de.

¹⁹ Afta Paal go iin an tel dem oudi, im staat tel dem evriting wa Gad did a du siek-a fi im wok mongks di piipl we a no Juu.

²⁰ Wen dem ier dis, dem priez Gad. Den dem se tu im se, “Breda, yu si di touzn an touzn a Juu iina Jeruusilem we biliiv iina Jiizas, an aal a dem biliiv an fala di Laa dong tu di laas leta.

²¹ Wel, dem ier se yu a tiich aal a di Juu dem we liv mongks di piipl we a no Juu se dem fi ton we fram we Muoziz tiich, no sorkomsaiz dem pikni, ar liv laik ou Juu fi liv.

²² So, wa wi a-go du wen dem ier se yu de ya?

²³ Wel, dis a wa wi waahn yu fi du: wi av fuo man mongks wi we did mek wan pramis tu Gad,

²⁴ kyari dem wid yu go a Gad ous an pie di moni we dem fi pie fi get bak kliin, an yu wi get kliin tu. Afta dat dem kyan kot aaf dem ier. Da wie de evribadi wi nuo se wa dem se bout yu a no chuu. Dem wi si se yu liv laik ou di Laa se wi fi liv.

²⁵ Bot yu si di piipl we a no Juu we biliiv, wi did rait tu dem bout wa wi did mek op wi main fi du aredi. Wi tel dem se dem no fi nyam miit we piipl did tek bon sakrifais gi faalz gad, ar miit wid blod stil iina it, ar animal we eng, an dem fi kip we fram aal saat a seks sin.”

²⁶ So di neks die, Paal tek di fuo man dem, an im an dem du wa di Laa se fi du fi get kliin iina Gad yai. Den im go a Gad ous an mek di liida dem nuo se im set di taim fi gi op sakrifais fi im an di man dem.

²⁷ Wen di sevn die dem aalmuos don, di Juu we kom fram Iezha we did si Paal iina di yaad we Gad ous de rail op di kroud an grab aan pan Paal,

²⁸ an staat baal out, “Aal uu a Juu, unu kom elp wi diil wid da man ya! A da man ya a tiich evribadi evriwe fi ton gens wi piipl, wi Laa, an da uoli plies ya! An fi mek it wosa, im aal kyari som Griik piipl go iina di paat a Gad ous we di Laa se onggl Juu fi go, an mek it no uoli no muor.”

²⁹ Dem se dis kaaz dem did si Chrofimos we kom fram Efisos iina di siti wid Paal bifuo, so dem tek it se Paal did mek im go iina di paat a Gad ous we onggl Juu fi go.

³⁰ Di uol siti did rail op, an aal a di piipl dem rosh Paal. Dem grab im an jrag im outa di yaad we Gad ous de, an shot di duor kwik kwik.

³¹ Wen dem did a chrai fi kil im, sumadi sen go tel di ed fi touzn suoja se a pie chobl a gwaan iina di siti.

³² Im tek som suoja an som a dem liida siem taim an ron dong pan di kroud. Wen di kroud si di ed fi touzn suoja an di ada suoja dem wid im, dem tap biit Paal.

³³ Den di ed fi touzn suoja kom an ares im an aada di ada suoja dem fi tai im op wid tuu chien. Den im aks a uu da man ya an a wa im du.

³⁴ Som a di piipl iina di kroud kaal out wan sitn an som ada piipl kaal out sitn els. Di ed fi touzn suoja kudn get no we wid wa di kroud did a se, so im gi aada fi dem kyari im go iina di suoja kyamp.

³⁵ Wen dem riich a di step, di suoja dem afi tek op Paal an kyari im kaaz di kroud did a galang bad.

³⁶ Di kroud a piipl did a fala dem an a baal out, “Mek wi kil im! Gi wi im mek wi kil im!”

³⁷ Wen dem did out fi kyari Paal iina di suoja kyamp im se tu di ed fi touzn suoja se, “Mi kyan se sopm tu yu?” Di ed fi touzn suoja aks im se, “Yu kyan taak Griik?

³⁸ So a no yu a di Ijipshan we jos di ada die did kaaz piipl fi fait gens di govament an we did liid di fuo touzn bad man dem go out iina di dezot?”

³⁹ Paal ansa im se, “Mi a wan Juu. Mi baan an gruo iina Taasos wan big impuotant siti iina Silisiya. Mi a beg yu, gi mi a chaans fi taak tu di piipl dem.”

⁴⁰ Wen di ed fi touzn suoja lou im fi taak tu di piipl dem, Paal tan op pan di step an riez im an fi kwaiyat dong di piipl dem. Wen dem get kwaiyat im taak tu dem iina fi dem Juu langwij.