Read Jamaican Patois Aks 22 Bible Online

Aks 22 - Jamaican Patois bible

Aks 22

¹ “Aal a unu we uolda dan mi an aal a unu we a di siem iej laik mi, lisn tu wa mi av fi se tu unu.”

² Wen dem ier se im a taak tu dem iina di Aramik langwij, dem kwaiyat dong iivn muor. Den Paal se,

³ “Mi a wan Juu. Mi baan iina Taasos we de iina Silisiya, bot mi gruo op rait ya-so iina Jeruusilem. Fi mi tiicha a did Gyamieliyel, an im tiich mi fi fala di Laa we Gad gi fi wi faada faada dem, aad aad. An siem laik ou unu siiros bout Gad, a siem so mi did wel siiros tu.

⁴ Mi yuus tu mek piipl we fala di Wie ou Jiizas se piipl fi liv sofa bad bad til dem aal ded, an tai op man an uman, an mek dem get lak op iina prizn.

⁵ Di liida fi di priis dem an di uol gruup a elda dem kyan tel unu bout mi kaaz dem did aal gi mi leta fi kyari tu wi breda dem iina Damaskos we a Juu. So mi go de go ares di piipl dem we did a fala di Wie ou Jiizas se dem fi liv an kyari dem kom a Jeruusilem kom ponish dem.

⁶ “Wen mi did de pan mi wie an aalmuos riich Damaskos, aal av a sodn, wan brait brait lait fram evn kom uova mi, dat a did bout migl die.

⁷ Den mi jrap a grong an ier wan vais se tu mi se, ‘Saal, Saal, wa mek yu a mek mi sofa?’

⁸ “So mi aks, ‘A uu yu, Sa?’ Im se tu mi se, ‘Mi a Jiizas di Nazariin we yu a mek sofa.’

⁹ Di man dem we did de de wid mi si di lait, bot dem neva ier di vais we did a taak tu mi.

¹⁰ “So mi aks, ‘Wa mi fi du Laad?’” “Di Laad se tu mi se, ‘Git op an go a Damaskos. Wen yu riich de yu wi ier wa mi pik yu fi du.’

¹¹ Sins mi kudn si kaaz di brait brait lait we did shain uova mi did blain mi, di man dem we did de de wid mi uol mi an an liid mi go a Damaskos.

¹² “Wan man niem Ananaiyas, we riili worship Gad an liv di wie ou di Laa se wi fi liv an we aal di Juu we liv de taak gud bout

¹³ kom tu mi an tan op saida mi. Im se tu mi se, ‘Breda Saal, luk, si agen!’ Siem taim mi luk op an si’im.

¹⁴ “Den im se tu mi se, ‘Di Gad we wi faada faada dem worship pik yu fi nuo wa im plan fi du, fi si im sorvant we aalwiez du wa im waahn im fi du an fi ier da wan de taak tu yu imself.

¹⁵ Im du dat kaaz im waahn yu fi go tel piipl evriwe wa yu si an wa yu ier.

¹⁶ So wa yu a wiet fa nou? Git op, kaal pan Gad niem, get baptaiz an mek Gad wash we yu sin.’

¹⁷ “Afta mi go baka Jeruusilem, mi did iina Gad ous a prie an mi get wan vijan.

¹⁸ Iina mi vijan mi si di Laad an im se tu mi se, ‘Ori op! Kom outa Jeruusilem faas faas, kaaz dem naa go biliiv wa yu av fi tel dem bout mi.’

¹⁹ “So mi se tu im se, ‘Laad, aal a dem wel nuo se mi yuus tu go a di Juu dem choch an biit an lak op enibadi we biliiv iina yu.

²⁰ An wen dem did a kil yu sorvant Stiivn, mi did tan op de an did a se ye, im fi ded, an did aal a tek kier a di kluoz fi di man dem we did a kil im.’

²¹ “Den di Laad se tu mi, ‘Gwaan, kaaz mi a-go sen yu faar faar tu di piipl dem we a no Juu.’”

²² Di kroud did a lisn tu Paal til im taak bout se di Laad sen im tu di piipl we a no Juu. Den dem staat baal out pan tap a dem vais, “Da man ya fi ded, kil im! Aal im so — aal im no fi liv!”

²³ Wail dem did stil a baal out pan tap a dem vais, a bak aaf dem jakit, an a fling dot iina di ier,

²⁴ di ed fi touzn suoja aada di ada suoja dem fi kyari Paal go bak iina di suoja kyamp. Im tel dem fi biit Paal wid wan wip so im wi tel dem wa im du mek di kroud a rail op gens im so.

²⁵ Afta dem tai im op an chrech im out fi biit im, Paal aks di ed fi onjrid suoja we did tan op de, “Di Laa gi yu no rait fi biit mi, wan man we kom fram Ruom, wen yu no iivn kyari mi go a kuot an se mi gilti fi notn?”

²⁶ Wen di ed fi onjrid suoja ier dis, im go tu di ed fi touzn suoja an tel im wa im ier an aks im se, “Wa yu a-go du? Yu no nuo se da man ya kom fram Ruom?”

²⁷ So di ed fi touzn suoja aks Paal, “Tel mi sopm, yu kom fram Ruom?” Paal ansa im se, “Ye man mi kom fram Ruom.”

²⁸ Di ed fi touzn suoja se, “Mi did afi pie wan uol iip a moni fi ton Ruoman.” So Paal se, “Bot a Ruom mi baan an gruo.”

²⁹ Den di suoja dem we did out fi biit Paal fi mek im taak, dem bak aaf fram im. An di ed fi touzn suoja did fraitn wen im fain out se im did mek dem tai op Paal, wan man we kom fram Ruom.

³⁰ Di neks die, di ed fi touzn suoja did riili waahn fi nuo wa mek di Juu dem did a go gens Paal. So im let im go an aada di ed priis an di liida dem fi miit. Den im mek Paal tan op infronta dem.