Read Jamaican Patois Aks 23 Bible Online

Aks 23 - Jamaican Patois bible

Aks 23

¹ Paal luk chriet pan di liida dem an se tu dem se, “Mi breda, aal a mi laif op tu tide, mi liv rait, an mi kanchens naa go bada mi wen mi tan op infronta Gad.

² Wen im se dat, Ananaiyas, di liida fi di priis dem, aada di man dem we did tan op de fi baks Paal pan im mout.

³ Den Paal se tu im se, “Gad a-go chraik yu dong, yu wait wash waal yu! Yu sidong de laik wan joj we a du wa di Laa se, bot yu brok di Laa an aada dem fi baks mi?”

⁴ Di man dem we did tan op saida im aks im se, “A di liida fi Gad priis dem yu a chat tu so?”

⁵ Paal ansa se, “Mi breda, mi neva nuo se im a did di liida fi di priis dem, kaaz it rait dong iina Gad wod se, ‘Yu no fi chat bad bout di ruula fi yu piipl.’ ”

⁶ Bot wen Paal si se som a dem a did Sadyusii an som a dem a did Farisii, im shout out iina di miitn, “Mi Breda, mi a wan Farisii, an mi faada a wan Farisii tu. A kaaz mi biliiv se ded piipl a-go kom bak alaiv mek dem a joj mi.”

⁷ Wen im se dis, di Sadyusii an di Farisii dem staat kwaril mongks dem wan aneda so di gruup plit op iina tuu.

⁸ Kaaz di Sadyusii dem se nobadi kyaahn ded an kom bak alaiv, no ienjel no de, ar no spirit no de, bot di Farisii dem biliiv iina aal a dem sitn de.

⁹ Di Sadyusii dem an di Farisii dem shout aafa wan aneda louda an louda til som a di Laa tiicha fram di Farisii gruup get op an taak chrang chrang, an wan a dem se, “Wi no fain notn rang wid da man ya. Sopuoz a wan spirit ar wan ienjel did taak tu im fi chuu?”

¹⁰ Wen di kwaril get riili riili bad, di ed fi touzn suoja kech im fried kaaz im tingk se dem wuda tier op Paal. So im aada im suoja dem fi go dong go tek we Paal fram mongks dem an kyari im bak iina di suoja kyamp.

¹¹ Di neks nait di Laad tan op saida Paal an tel im se, “Tek aat, kaaz siem ou yu tel di Jeruusilem piipl dem bout mi, a siem so yu afi go tel di piipl dem iina Ruom bout mi tu.”

¹² Di neks maanin, di Juu dem mek wan siikrit plan an som a dem swier se tonda ruol an brok dem nek dem naa nyam ar jringk notn til dem kil Paal.

¹³ Yu did av uova faati a dem we se so.

¹⁴ Dem go tu di ed priis an di elda dem an se tu dem se, “Wi swier se tonda ruol an brok wi nek wi naa nyam ar jringk notn til wi kil Paal.

¹⁵ So wi a aks yu an di liida dem fi beg di ed fi touzn suoja fi kyari im kom dong tu yu laik se yu out fi mek op yu main bout im kies. Tel im se yu waahn fi kwestiyan im som muor. Wi redi fi kil im iivn bifuo im riich nier ya.”

¹⁶ Bot Paal sista bwai pikni ier bout ou dem plan fi gyang Paal, so im go tu di suoja kyamp an go tel Paal bout it.

¹⁷ So Paal kaal wan a di ed fi onjrid suoja an se tu im se, “Kyari da yuut man ya tu di ed fi touzn suoja, kaaz im av sopm fi tel im.”

¹⁸ So im kyari im tu ed fi touzn suoja an se tu im se, “Di prizna we niem Paal kaal mi an aks mi fi kyari da yuut man ya tu yu kaaz im av sopm fi tel yu.”

¹⁹ Di ed fi touzn suoja tek im go wan said an aks im se, “Wa yu av fi tel mi?”

²⁰ Im ansa im se, “Di Juu dem plan fi aks yu fi kyari Paal dong tu di liida dem tumaro. Dem plan fi mek it luk laik se dem waahn fi kwestiyan im som muor.

²¹ Bot no mek dem presha yu an yu go du wa dem se, kaaz muor dan faati a dem a aid an a wiet fi gyang im. Dem swier blain se dem naa nyam ar jringk notn til dem kil im. Dem redi an a wiet rait ya nou fi ier ef yu a-go du wa dem a aks yu fi du.”

²² Den di ed fi touzn suoja sen we di yuut man afta im tel im se, “No tel nobadi se yu tel mi dem sitn ya.”

²³ Afta dat im kaal tuu ed fi onjrid suoja an tel dem se, “Get tuu onjrid suoja, sevnti man we raid aas an tuu onjrid man we fait wid spier an get redi fi go a Sesuriiya nain aklak tinait.

²⁴ An av som aas redi fi Paal raid an mek shuor se im riich govana Fiiliks sief.”

²⁵ Di ed fi touzn suoja rait wan leta se:

²⁶ Govana Fiiliks sa, dis a Klaadiyos Lisiyas. Oudi!

²⁷ Di Juu dem kyapcha da man ya an did out fi kil im. Bot wen mi lorn se im did kom fram Ruom, mi get wan gruup a suoja an go siev im fram dem.

²⁸ Sins mi did waahn fi nuo wa rang dem did se im did du, mi kyari im go dong tu dem liida.

²⁹ Mi fain se som a di Juu dem did a aagyu wid im bout som sitn fi du wid dem Laa, bot im neehn du notn fi wi kil im ar lak im op fa.

³⁰ Wen mi lorn se dem did a set op wan siikrit plan fi kil di man, mi sen im tu yu siem taim an aada im enimi dem fi kom tu yu kom saat out dem prablem.

³¹ So di suoja dem du we di ed fi onjrid suoja aada dem fi du. Dem tek Paal iina di nait an kyari im go tu Antipachris.

³² Di neks die dem mek di man dem we raid di aas dem go wid Paal an di ada man dem go baka Jeruusilem.

³³ Wen di man dem we raid pan aas riich a Sesuriiya, dem gi di govana di leta an lef Paal iina im an.

³⁴ Afta di govana riid di leta, im aks Paal wich konchri im kom fram. Wen im fain out se Paal kom fram Silisiya,

³⁵ im se, “Wen di piipl dem we a se yu du rang kom, mi wi joj wa yu av fi se fi yuself.” Den im gi aada fi dem kip Paal anda gyaad iina di palis we Erad did bil.