Read Jamaican Patois Aks 24 Bible Online

Aks 24 - Jamaican Patois bible

Aks 24

¹ Afta faiv die Ananaiyas di liida fi di priis dem kom dong wid som elda an wan laaya niem Tortyuulos an dem tel di govana bout di prablem dem av wid Paal.

² Afta dem kyari iin Paal Tortyuulos staat fi chat gens im. Im se tu di govana se, “Yu a wan waiz liida. Siek-a dat fi wan lang lang taim nou wi av piis iina wi konchri. An yu kaaz nof gud sitn fi apm sins yu staat ruul.

³ Govana Fiiliks, Sa, yu du aal kain-a gud sitn. Wi si dem, an wi si dem evriwe an wi tangk yu wid aal a wi aat.

⁴ Bot mi no waahn tek op tu moch a yu taim, so mi a beg yu, lisn tu wi likl bit muor kaaz yu aalwiez shuo gud fies aal wen wi no dizorv it.

⁵ “Wi fain se da man ya a wan wikid wikid chobl-meka we a rail op di Juu dem aal uova di worl, an im a wan ring liida fi wan paati we dem kaal di Nazariin.

⁶ Im aal chrai fi doti op Gad ous an no mek it kliin no muor, so wi kech im.

⁸ Bot wen yu kwestiyan im fi yuself yu wi lorn se aal a dem sitn ya wa wi a tel yu bout a riili chuu.”

⁹ Aal di Juu dem jain iin an se di sitn dem we im did a se bout Paal a chuu.

¹⁰ Wen di govana paint pan Paal an gi im di chaans fi taak fi imself, Paal se: “Mi nuo se a lang lang taim nou yu a sorv az joj uova da konchri ya, so mi api fi taak op fi miself.

¹¹ Yu kyan fain out iizi iizi se no muor dan twelv die nou mi go op tu Jeruusilem fi go worship Gad.

¹² Dem neva fain mi a aagyu wid nobadi ar a rail op no kroud iina Gad ous, iina di Juu dem choch, ar no we els iina di siti.

¹³ An dem kyaahn pruuv tu yu aal di sitn dem we dem a tel yu se mi du.

¹⁴ Bot wa mi kyan se tu yu a dis, mi worship di Gad we wi faada faada dem worship azkaadn tu da Wie de — di Wie we dem se rang. Mi biliiv evriting we iina di Laa an we di prafit dem rait dong.

¹⁵ Mi an dem man ya biliiv di siem ting. Wi a wiet an a luk fi Gad mek ded piipl kom bak alaiv, weda dem did gud ar bad.

¹⁶ A dat mek mi aalwiez du mi bes fi liv rait so dat nobadi kyaahn paint no fingga pan mi an mi kyan tan op infronta Gad an mi kanchens no bada mi.

¹⁷ “Afta mi did kip we fram Jeruusilem fi kopl ier, mi go bak fi kyari som moni fi gi mi uona piipl fi elp di puor an fi bon sakrifais gi Gad.

¹⁸ A dat mi did a du wen dem si mi iina Gad ous. Dat taim de mi did don du aal we mi did sopuoz fi du fi mek miself kliin iina Gad yai. Mi neva av no kroud wid mi, an mi neva du notn fi kaaz no chobl niida.

¹⁹ Bot yu av som Juu fram Iezha we shuda de ya infronta yu nou, ef dem av notn gens mi.

²⁰ Ar dem man ya shuda tel yu wa rang dem did fain se mi du wen mi did tan op infronta dem liida.

²¹ Di onggl ting dem kyan se a dat mi baal out iina dem miitn an se: ‘A kaaz mi biliiv se ded piipl a-go kom bak alaiv mek unu de ya tide a joj mi.’ ”

²² Den Fiiliks, we nuo di chuut bout di Laad Wie tap wa did a gwaan, don kuot an se, “Wen Lisiyas di ed fi touzn suoja kom, mi wi mek op mi main bout wa mi a-go du wid yu.”

²³ So im aada di ed fi onjrid suoja fi gyaad Paal, bot fi gi im likl spies, an no tap non a im fren dem fram elp im non at aal.

²⁴ Kopl die afta dat wen Fiiliks an im waif Jruusila, we a wan Juu uman riich, im sen fi Paal. Im lisn wen Paal taak bout wa it miin fi biliiv iina Jiizas Krais.

²⁵ Wail Paal did a taak bout wa it miin fi sumadi du we rait, kanchuol demself, an di die wen Gad a-go joj evribadi fi aal we dem du, weda gud ar bad, Fiiliks kech im fried an se tu Paal se, “Dat inof fi nou. Yu kyan lef. Wen mi fain taim mi wi sen fi yu agen.”

²⁶ Bot im did a uop se Paal wuda pie im aaf fi im let im go, so im sen fi im an taak wid im agen an agen.

²⁷ Afta tuu ier paas, Porshiyos Festos ton di nyuu govana an tek uova fram Fiiliks. Bot kaaz Fiiliks did a chrai fi kori fieva wid di Juu dem, im lef Paal iina prizn.