Read Jamaican Patois Aks 25 Bible Online

Aks 25 - Jamaican Patois bible

Aks 25

¹ Chrii die afta Festos riich iina di konchri, im go a Jeruusilem fram Sesuriiya.

² So di ed priis an di impuotant man dem mongks di Juu dem kom faawod an tel im di prablem dem av wid Paal.

³ Dem beg Festos fi du sitn speshal fi dem. Dem beg im fi gi aada fi Paal kom baka Jeruusilem. Dem du dat kaaz dem did av a plan fi gyang op an kil im bifuo im kuda riich.

⁴ Den Festos tel dem se, “Paal de a prizn a Sesuriiya an mi out fi go dong de suun.

⁵ So mek unu liida dem go dong de wid mi an ef da man ya did du notn rang, dem kyan se wa im du.”

⁶ Afta Festos tan mongks dem fi bout iet ar ten die im lef an go a Sesuriiya. Di neks die im tek im siit iina di kuot an gi aada fi Paal kom infronta im so im kyan joj im.

⁷ Wen Paal kom iin, di Juu dem we did kom dong fram Jeruusilem tan op roun im. Dem staat tel di govana som torbl sitn we dem se Paal du. Bot dem kudn pruuv notn we dem se.

⁸ So Paal taak op fi imself an se, “Mi no du notn rang gens di Juu dem, mi no brok non a dem Laa, ar du notn we wuda mek Gad ous no kliin no muor, ar se notn bad gens Siiza.”

⁹ Bot Festos did a chrai fi kori fieva wid di Juu dem, so im aks Paal se, “Yu waahn fi go a Jeruusilem an mek mi joj yu an si ef aal wa dem a se bout yu a chuu ar a no chuu?”

¹⁰ Paal ansa im se, “Mi tan op iina Siiza kuot rait ya nou an a ya-so mi fi get joj. Mi no du notn rang tu di Juu dem, an yu wel an nuo dat.

¹¹ Ef mi rang an du notn we dem shuda kil mi fa, mi naa chrai fi ron we. Bot ef mi neva du non a di sitn dem we dem se, nobadi kyaahn ton mi uova tu dem. So sen mi go a Siiza, mek im joj mi.”

¹² So afta Festos taak wid di man dem we elp im fi mek op im main bout wa im a-go du, im se, “Yu se yu waahn mi sen yu go a Siiza, so a Siiza mi a sen yu!”

¹³ Afta kopl die wel, King Agripa an Borniis kom a Sesuriiya fi welkom Festos.

¹⁴ Afta dem did de de fi a gud wail, Festos tel di King bout Paal, di Juu dem, an aal wa did a gwaan, kaaz im did waahn fi nuo wa di King tingk. So im tel im se, “Fiiliks lef wan prizna ya.

¹⁵ Wen mi did de a Jeruusilem, di ed priis an di Juu elda dem tel mi bout im, an aks mi fi joj im an se im gilti.

¹⁶ “Bot mi tel dem se Ruoman piipl no joj nobadi an se dem gilti jos so. Dem afi get di chaans fi tan op infronta di piipl dem we se dem du sitn rang, an taak op fi demself.

¹⁷ So afta dem kom ya wid mi, mi neva wies no taim. Di neks die mi gi aada fi dem bring im a kuot fi mi joj im.

¹⁸ Bot wen di Juu liida dem taak op gens im, di wikid sitn dem we mi did tingk se dem wuda se im du a no dat dem se.

¹⁹ Insted-a dat, dem did a aagyu wid im bout sopm fi du wid di wie ou dem worship Gad an bout wan ded man niem Jiizas we Paal se kom bak alaiv.

²⁰ Mi neva nuo ou fi diil wid di mata, so mi aks di man ef im did waahn fi go a Jeruusilem an mek mi joj im de-so.

²¹ Bot wen Paal aks mi fi uol im til Siiza kuda joj im, mi gi aada fi dem gyaad im so til mi kuda sen im go a Siiza.”

²² Den King Agripa se tu Festos, “Mi wuda laik fi ier da man ya miself.” So Festos tel im se, “Aarait, tumaro yu wi ier im.”

²³ Di neks die wen King Agripa an Borniis did a kom di piipl dem du aal saat a sitn fi big dem op an welkom dem. So dem go iina di plies we di piipl dem gyada op fi kip kuot. Aal a di ed fi touzn suoja an di big impuotant man dem iina di siti go wid dem tu. Den Festos aada di suoja dem fi kyari iin Paal.

²⁴ Den Festos se, “King Agripa, an evribadi we de ya wid wi, unu si da man ya, aal a di Juu dem beg mi loud loud no fi mek im liv no langga. Dem beg mi wen mi did de a Jeruusilem an dem beg mi dong ya iina Sesuriiya.

²⁵ Bot mi fain se im no du notn we wi fi kil im fa, an wen im se im waahn di Ruula Siiza imself fi joj im, mi mek op mi main fi sen im.

²⁶ Bot mi no riili av notn we mi kyan rait bout im an sen gi mi Laad. So mi kyari im kom ya infronta aal a unu, an muo dan dat mi kyari im infronta yu, King Agripa, so dat afta yu ier im da fos taim ya, mi mait-a av sopm fi rait.

²⁷ Kaaz mi no tingk it rait fi sen wan prizna an kyaahn se fi shuor wa rang dem se im du.”