Read Jamaican Patois Aks 27 Bible Online

Aks 27 - Jamaican Patois bible

Aks 27

¹ Afta dem mek op dem main se wi shuda siel go Itali, dem ton Paal an som ada prizna uova tu Juuliyos wan ed fi onjrid suoja. Im a did paat a di ruula big big gruup a suoja.

² Wi go pan wan ship we did a kom fram Ajramitiyom. Di ship did plan fi tap a som difrant difrant plies pan di Iezha sii kuos. So wi siel out an Ieristaakos fram Masiduoniya we iina Tesalonaika go wid wi.

³ Di neks die wi tap a Saidan. Juuliyos did kain tu Paal an lou im fi go luk fi im fren dem so dem kuda gi im di sitn dem we im niid.

⁴ Afta dat wi siel out an stie pan di sief said a Saipros kaaz di briiz did tuu chrang fi wi.

⁵ Afta wi siel paas Silisiya an Pamfiliya, wi tap a Maira iina Lishiya.

⁶ Wen wi tap a Maira di ed fi onjrid suoja si wan ship fram Aligzanjriya we did a go a Itali, so im put wi pan it.

⁷ Di briiz did so chrang dat fi kopl die, wi did afi siel sluo sluo so wi bieli manij fi riich nier Naidos toun. Kaaz di briiz did stil so chrang, wi kudn go no forda, wi did afi siel pan di sief said a Kriit nier Salmuoni.

⁸ Wi gwaan siel pan di sief said a Kriit an bieli manij fi riich a wan plies niem Fier Ievnz nier Lasiiya toun.

⁹ Nof die did paas an it neva sief fi dem siel no muor kaaz di speshal die wen piipl go fi get dem sin paadn did paas. So Paal waan dem se,

¹⁰ “Man, ou mi si’it, ef wi gwaan siel it naa go ton out gud fi wi. Di ship an evriting we wi a kyari a-go mash op an nof piipl a-go ded.”

¹¹ Bot insted-a lisn tu Paal, di ed fi onjrid suoja lisn wa di kyaptin an di man we uon di ship se.

¹² Kaaz we di ship did de neva sief fi spen di winta, muos a uu did de pan di ship mek op dem main se dem naa tan de, so di kyaptin siel out. Dem did a luk se som ou dem wuda riich Fiiniks nier Kriit we di briiz did a bluo fram an spen di winta de.

¹³ Wen wan briiz we neva so chrang staat bluo fram di sout, dem tingk se dem kuda siel out laik ou dem did plan, so dem jraa op di ship angka an siel out. Bot dem kip nier Kriit shuor.

¹⁴ No tuu lang afta dat wan powaful staam niem di “Naatiista” bluo dong kraas Kriit.

¹⁵ Di ship get kech op iina di staam an kudn manij it, so wi gi op an mek di staam bluo wi we it waahn wi go.

¹⁶ Wi siel paas wan likl ailan niem Kyaada, we wi bieli manij fi kanchuol di likl buot fi di ship an kip it sief.

¹⁷ Afta dem lif op di likl buot put pan di ship, dem yuuz ruop anda di ship fi tai it op. Dem du dat kaaz dem did fried di ship mait go jam iina di san il nier Libiya we di waata neva diip. Den dem jrap angka an mek di briiz gwaan bluo di ship.

¹⁸ Di neks die di wie di staam did a bata di ship so bad, dem staat fling som a di sitn dem we did de pan di ship iina di sii.

¹⁹ An pan di tord die, dem siem wan tek op som a di sitn dem we a paat a di ship an fling dem iina di sii.

²⁰ Afta wi kudn si no son ar staar fi wan lang lang taim, an di staam kip aan a bata wi, wi did shuor se wi don fa, notn kudn siev wi.

²¹ Nof a di man dem neva fiil fi notn fi iit, so Paal tan op mongks dem an se tu dem se, “Unu shuda did lisn tu mi man wen mi did tel unu se wi neva did fi lef outa Kriit. Kaaz ef unu did lisn, wi neva wuda sofa so an luuz so moch.

²² Bot lisn tu mi nou, tek aat, kaaz non a wi naa go ded, bot di uol ship a-go mash op.

²³ Mi nuo dat kaaz laas nait di Gad we mi bilang tu an we mi sorv sen wan ienjel tu mi an im se tu mi se,

²⁴ ‘No fried Paal! Yu afi go tan op infronta Siiza, an Gad so gud iivn duo piipl no dizorv it, im naa go mek non a di man dem we a siel wid yu ded.’

²⁵ So unu tek aat man, kaaz mi chos iina Gad. An mi shuor se evriting a-go ton out siem laik ou im tel mi se it wuda go.

²⁶ Bot di ship a-go krash pan wan ailan.”

²⁷ Wan nait, afta wi did de a sii fi tuu wiik, di staam did a bluo wi kraas di Ajriyatik Sii. Wen it did riich bout migl nait, di siela dem did biliiv se dem de nier lan.

²⁸ So dem jrap wan ruop wid sitn evi tai pan it fi chek ou diip di waata bi. Dem fain out se dem did de iina waata we did wan onjrid an twenti fut diip. Afta dem siel likl forda dem chek agen an fain out se di waata did nainti fut diip.

²⁹ Dem did fried se wi did a-go krash pan di riif, so dem jrap fuo a di ship angka dem fram di baka di ship, an prie fi die lait.

³⁰ Di siela dem did waahn fi get we fram di ship, so dem let dong di likl buot iina di waata an gwaan laik se a angka dem did a chuo fram infronta di ship.

³¹ Bot Paal se tu di ed fi onjrid suoja se, “Ef di siela dem no tan pan di ship yu kyaahn riich a shuor alaiv.”

³² So di suoja dem kot di ruop dem we did tai op di buot an mek it jrap iina di waata an bluo we.

³³ Wen die suun lait, Paal beg dem fi iit sopm. Im se, “Tide mek fuotiin die sins unu a wori unuself an no iit notn.

³⁴ So unu kom aan nou man, iit sopm, ar unu naa go mek it. An non a unu naa go luuz no iivn wan dege-dege ier aafa unu ed.”

³⁵ Afta im se dat, Paal tek bred an gi Gad tangks infronta aal a dem. Den im brok it an staat fi iit it.

³⁶ So aal a dem tek aat an iit sopm tu.

³⁷ A did tuu onjrid an sevnti-siks a wi de pan di ship.

³⁸ Afta dem don nyam aal wa dem waahn, dem fling di res a sitn dem pan di ship iina di waata.

³⁹ Wen die lait, dem neva nuo wich paat dem did de, bot dem si wan ieriya we luk laik wan bie wid wan biich. So dem mek op dem main fi chrai an ron di ship pan di san bangk.

⁴⁰ So dem kot aaf di angka dem aafa di ruop an lef dem iina di sii. Dem luus di chien aafa di sitn dem we fi ton di ship, put op di big big piis a klaat we dem yuuz fi kech di briiz, ton roun di ship an ed fi di biich.

⁴¹ Bot dem ron iina di san wich paat di waata shalo. Di fronta di ship jam an faasn iina di san an kudn muuv. Di wiev dem krash so aad gens di baka di ship dat it brok op iina piisiz.

⁴² So di suoja dem plan fi kil di prizna dem so dat non a dem kudn jomp iina di sii an get we.

⁴³ Bot di ed fi onjrid suoja neva waahn dem fi kil Paal, so im neva mek di suoja dem kil non a di prizna dem. So im gi aada se aal uu kyan swim fi jomp aaf fos an swim go a lan,

⁴⁴ an di wan dem we kyaahn swim fi eng aan pan piis a plangk ar eniting we brok aafa di ship an fluot go a shuor. An a so aal a dem riich lan sief.