Read Jamaican Patois Aks 28 Bible Online

Aks 28 - Jamaican Patois bible

Aks 28

¹ Afta aal a wi riich shuor sief, wi fain out fram di piipl dem se di ailan niem Maalta.

² Di piipl dem shuo wi gud fies an chriit wi wel gud. An kaaz rien did staat faal an it did kuol, dem kech op faiya fi wi.

³ Paal pik op wan bongl a bram-bram an put it pan di faiya. Wen im du dat, di faiya iit kaaz wan siniek fi kom out an grab aan pan Paal an.

⁴ Wen di piipl si se di siniek eng an pan Paal an, dem se tu wan aneda se, “Da man ya a mos wan mordara! Iivn duo im get we fram di sii, di gad we niem Jostis se im no fi liv.”

⁵ Bot Paal shiek im aaf iina di faiya an notn neva du im.

⁶ Bot di piipl did a luk fi si im swel op ar jrap dong ded siem taim. Bot afta dem wiet fi wan lang taim an no si notn apm tu im, dem chienj dem main an se im a wan gad.

⁷ Kluos tu we dat did apm tu Paal, wan man niem Pyuubliyos did av im ous an lan. Im a did di ed fi di govament fi di ailan. Im tek wi iina im ous an tek gud kier a wi. An wi tan a im ous fi chrii die.

⁸ Pyuubliyos faada did sik an iina bed. Im di av fiiva an wan siknis we mek im beli ron an kaaz im fi vamit. Paal go iin go si im an afta im prie fi im, im put im an pan im an mek im beta.

⁹ Afta dat uol iip a piipl pan di ailan we did sik kom tu Paal fi im mek dem beta.

¹⁰ Di piipl dem shuo wi nof rispek an wen wi did out fi lef, dem gi wi evriting we wi did niid.

¹¹ Afta wi spen chrii mont de, wi lef iina wan ship we did kom fram Aligzanjriya an we did de pan di ailan fi di winta. Di ship di niem “Di Twin Gad.”

¹² Wi tap iina Sirakyuus aaba an tan de fi chrii die.

¹³ Wi lef de-so an siel tu Rejiyom siti. Di neks die wan chrang chrang briiz we bluo fram di sout tek wi an di sekan die wi riich a Pyutiyoli.

¹⁴ Wi fain som piipl we biliiv iina Jiizas de an dem beg wi fi tan wid dem fi sevn die. Afta dat wi lef an go a Ruom.

¹⁵ Wen di breda an sista dem a Ruom ier bout wi, som a dem kom aal di wie a Apiyos Maakit, an som kom a di plies kaal Chrii In kom miit wi. Wen Paal si dem im tek aat an gi Gad tangks.

¹⁶ Wen wi riich a Ruom, di govament lou Paal fi liv a wan ous im wan, nobadi neehn afi tan de wid im onggl di suoja we gyaad im.

¹⁷ Chrii die afta dat, Paal sen kaal di Juu liida dem iina di ieriya fi miit wid im. Wen dem kom im se tu dem se, “Mi breda, mi neva du notn rang gens wi piipl. Mi neva se notn rang bout di wie wi faada faada dem did liv niida. Bot wi liida dem iina Jeruusilem tek mi ton prizna gi di Ruoman liida dem.

¹⁸ Afta dem kwestiyan mi an fain out se mi neva du notn rang we wuda gi dem di rait fi kil mi, dem did waahn fi let mi go.

¹⁹ Bot di Juu dem neva waahn di liida dem fi let mi go, so mi did afi tel di liida dem se mi waahn Siiza fi joj mi imself. Bot mi no av notn gens mi uona piipl.

²⁰ A dat mek mi aks unu fi miit wid mi. Matarafak, dem tek mi ton prizna an put mi iina dem chien ya siek-a di wan we di Izrel piipl dem a wiet fa an a luk fi kom.”

²¹ Di liida dem se, “Wi no get no leta fram Judiya bout yu, an non a di breda dem no kom fram op de kom tel wi notn bad bout yu niida.

²² Bot wi wuda laik fi ier wa yu tingk, kaaz wi nuo se piipl evriwe taak gens da gruup ya we yu bilang tu.”

²³ So dem set di taim fi miit wid im. Wen dem shuo op a im ous fi di miitn, uol iip muor a dem kom dan di fos taim. Fram maanin til iivnin, Paal taak tu dem an elp dem andastan di mesij bout Gad kindom an Jiizas. An im yuuz di Laa we Muoziz did rait dong, an wa di prafit dem did rait fi get dem fi biliiv se wa im did a tel dem bout Gad kindom a chuu.

²⁴ Som a dem biliiv wa Paal se, bot som a dem mek op dem main no fi biliiv an ton dem bak pan Gad mesij.

²⁵ So di liida dem staat aagyu mongks dem wan aneda an som a dem waak out afta di laas ting Paal se. Im did se, “Di Uoli Spirit did rait wen im did yuuz di prafit Aizaiya fi taak tu wi faada faada dem.

²⁶ Im se, “ ‘Go tu dem piipl ya an se tu dem se, “Unu a-go aalwiez a lisn gud, bot unu naa go andastan wa unu ier. Unu a-go kip aan a luk aad aad, bot unu naa go si notn.”

²⁷ Kaaz dem piipl ya blak dem main, brok tik iina dem iez, an lak dem yai dem, so dem kyaahn si wid dem yai dem, ar ier wid dem iez dem an andastan wid dem main, an ton we fram wa rang, an mi wuda iil dem.’

²⁸ “So mi waahn unu fi nuo se Gad mesij bout ou im a-go siev piipl a-go go tu di piipl dem we a no Juu. Dem wi lisn!”

³⁰ Fi tuu uol-a ier Paal liv iina im uona ous we im rent. Im tek iin evribadi we kom tu im

³¹ an priich tu dem bout Gad kindom an tiich dem bout di Laad Jiizas Krais. An im neva fried fi tiich bout di Laad Jiizas an notn neva de de fi tap im.