Read Jamaican Patois Aks 3 Bible Online

Aks 3 - Jamaican Patois bible

Aks 3

¹ Wan die Piita an Jan did a go op a Gad ous. A did chrii aklak iina di die, di taim wen piipl miit fi prie.

² A di giet fi Gad ous, di giet we dem kaal Giet Byuutiful, yu did av wan man we did kripl fram im baan. Evridie dem wuda put im a di giet fi beg sopm fram di piipl dem we a go iina di yaad we Gad ous de.

³ Wen di bega-man si Piita an Jan bout fi go iin, im beg dem som moni.

⁴ Piita an Jan luk chriet pan im an Piita se tu im, “Luk pan wi!”

⁵ So di kripl man faasn im yai dem pan dem kaaz im fiil shuor se dem did a go gi im som moni.

⁶ Den Piita se tu im, “Mi no av no moni at aal kyan gi yu. Bot wa mi av mi a-go gi yu. Iina Jiizas Krais niem, di wan we kom fram Nazaret, git op an waak.”

⁷ Den Piita uol im rait an an elp im fi get op. Siem taim di man fut dem get chrang.

⁸ Im jomp rait op an staat waak. Den im go wid dem iina di yaad we Gad ous de, a waak, an a jomp op an dong an a priez Gad.

⁹ Wen di piipl dem si im a waak an a priez Gad,

¹⁰ dem si se a di siem bega-man we yuus tu de a di giet fi Gad ous, di giet we niem Giet Byuutiful. Dem did so shak dem kudn biliiv we apm tu im.

¹¹ Wen dem riich di plies we dem kaal Salaman Puoch, dat a wan waak wie we av wan ous tap uova it, di man did stil a uol aan pan Piita an Jan. Aal a di piipl dem did shak. Dem ron tugeda go we Piita an Jan an di man did de.

¹² Wen Piita si dem, im se tu dem se, “Aal a unu Izrel piipl, wa unu shak so fa? Wa unu tan op a luk pan wi so fa? Unu tingk a chuu wi powaful ar chuu wi gud iina Gad yai mek wi mek da man ya waak?

¹³ Di Gad fi Iebriyam, Aizak, an Jiekob, di Gad fi wi faada faada dem, im big op an gi nof rispek tu im sorvant Jiizas. A da siem Jiizas de unu gi op, an ton unu bak pan im infronta Pailat, iivn duo Pailat did mek op im main fi let im go.

¹⁴ Iivn duo Jiizas aalwiez sorv Gad an du we rait, unu ton unu bak pan im an aks fi dem le’go wan mordara insted-a im.

¹⁵ Unu kil di wan we gi piipl riil laif, bot Gad mek im kom bak alaiv. An wi si aal a dat wid wi uona yai.

¹⁶ A Jiizas powa mek da kripl man ya get beta. So wa unu si apm tide, onggl apm kaaz wi biliiv iina Jiizas. Unu kyan si fi unuself se a Jiizas powa mek im beta.

¹⁷ “Nou mi breda an sista, mi nuo se unu an unu liida dem neva nuo wa unu did a du.

¹⁸ Bot lang bifuo it apm, Gad tel im prafit dem se di wan we im wuda sen fi siev piipl wuda sofa, an a siem so im mek it apm.

¹⁹ So ton we fram unu sin, beg Gad paadn an kom bak tu im, so dat im wi tek we unu sin dem.

²⁰ Unu fi du dat so di Laad Gad wi sen wan taim fi unu spirit res an get chrang, an im wi sen Krais Jiizas kom tu unu, Jiizas we im pik fi siev piipl.

²¹ Jiizas afi tan a evn til di taim kom fi Gad mek evriting nyuu. A dat Gad mek im prafit dem tel piipl fram wie bak wen.

²² Kaaz Muoziz did se, ‘Di Laad, fu’unu Gad, a-go riez op wan prafit laik mi. Da prafit de a-go bi fu’unu, an im a-go kom fram mongks unu uona piipl. Unu mos lisn an du evriting we im se.

²³ Gad a-go ton im bak pan enibadi we no lisn an we no du we da prafit de se, an dem naa go bi paat a im piipl no muor.’

²⁴ “An aal a di prafit dem, fram Samwel kom dong, taak bout di sitn dem we a apm iina dem taim ya lang bifuo dem apm.

²⁵ Unu a di prafit dem pikni, an Gad did mek wan pramis tu unu faada faada dem an da pramis de a fi unu. Im tel Iebriyam se, ‘Mi a-go yuuz fi yu pikni dem fi bles aal a di piipl dem pan ort.’

²⁶ So wen Gad riez op Jiizas im sorvant, im sen im kom a unu fos fi bles unu. Im bles unu wen im kaaz unu fi ton we fram unu wikidnis.”