Read Jamaican Patois Aks 4 Bible Online

Aks 4 - Jamaican Patois bible

Aks 4

¹ Piita an Jan did stil a taak tu di piipl wen di priis dem, di ed gyaad dem fi Gad ous, an di Sadyusii dem kom op tu dem.

² Dem did wel beks kaaz di apasl dem did a tiich di piipl se Jiizas did ded an kom bak alaiv. An dem yuuz dat fi shuo se ded piipl a-go kom bak alaiv tu.

³ Dem grab Piita an Jan, an kaaz nait did suun kom, dem put dem iina jiel til di neks die.

⁴ Bot nof a di piipl dem we did ier di apasl dem mesij biliiv it. Di gruup a man dem we biliiv iina Jiizas nou a did bout faiv touzn.

⁵ Di neks die di ruula dem, di elda dem, an di Laa tiicha dem gyada op iina Jeruusilem.

⁶ Anos di liida fi di priis dem, Kaiyafas, Jan, Aligzanda, an di ada man dem fram di liida fi di priis fambili did de de tu.

⁷ Dem aada Piita an Jan fi kom tan op infronta dem an dem staat kwestiyan dem: “A uu gi unu di powa an di rait fi mek di kripl man get beta?”

⁸ Di Uoli Spirit tek kanchuol a Piita, den Piita se tu dem: “Unu we a di ruula dem an di elda dem fi di piipl,

⁹ sins unu a kwestiyan wi bout di gud we wi du fi di kripl man an ou im get beta,

¹⁰ lisn mi, mi waahn aal a unu an evribadi we iina Izrel fi nuo, a Jiizas Krais we kom fram Nazaret mek im beta. Jiizas we unu kil pan di kraas, an we Gad mek kom bak alaiv, a im mek da kripl man ya tan op chrang infronta unu tide.

¹¹ Jiizas a “ ‘di rakstuon we unu, di bilda, did fling we an we nou a di wan we a uol op di bildin.’

¹² A onggl Jiizas wan kyan siev piipl, an a fi’im niem Gad gi piipl. Nobadi els iina di uol worl kyaahn siev yu.”

¹³ Wen dem si ou Piita an Jan tan op chrang fi wa dem biliiv an wen dem lorn se dem a did jos aadineri sumadi we neva go a no skuul go lorn, dem shak. Den dem si se di tuu a dem did nuo Jiizas an did waak wid im fi a gud wail.

¹⁴ An kaaz di kripl man we did get beta did tan op wid dem, dem kudn se notn.

¹⁵ So di liida dem gi aada fi di gyaad dem tek Piita, Jan, an di man outa di ruum we dem did a miit so dat di liida dem kuda taak wid dem wan aneda.

¹⁶ Dem aks, “Wa wi a-go du wid dem man ya? Evribadi we liv iina Jeruusilem si an nuo se a wan big mirikl dem man ya du tide, so wi kyaahn fuul nobadi se it neva apm.

¹⁷ Bot wi kyaahn mek ada piipl ier bout dem sitn ya. So wi afi go waan dem man ya mek dem nuo se dem kyaahn priich tu di piipl dem an yuuz Jiizas niem no muor.”

¹⁸ Den dem kaal iin Piita an Jan an waan dem se dem no fi priich ar tiich iina Jiizas niem tu di piipl at aal at aal.

¹⁹ Bot Piita an Jan ansa dem se, “Unu joj fi unuself wa unu tingk it rait fi du iina Gad yai, fi du we unu se, ar fi du we Gad se?

²⁰ Kaaz wi kyaahn tap taak bout di sitn dem we wi did si an ier.”

²¹ Di liida dem chretn Piita an Jan agen, den dem let dem go. Dem kudn mek op dem main ou fi ponish Piita an Jan, kaaz aal a di piipl dem did a gi Gad priez fi wa did apm.

²² Dem did a gi priez kaaz di kripl man we did get beta did uova faati ier uol.

²³ Afta dem get let go Piita an Jan go bak tu di ada piipl we biliiv iina Jiizas an go tel dem evriting we di liida fi di priis dem an di elda dem se tu dem.

²⁴ Wen dem ier di nyuuz, aal a dem jain tugeda an staat prie tu Gad. Dem se, “Maasa Gad, a yu mek di evn an di ort an di sii an evriting we iina dem.

²⁵ Yu yuuz di Uoli Spirit fi mek yu sorvant Dievid, fi wi faada se: ‘Wa mek di piipl we a no Juu a rail op an a plan aal saat a sitn gens Gad iivn duo dem kyaahn mek dem apm?

²⁶ Di king dem pan ort get demself redi fi fait, an di ruula dem jain tugeda fi fait gens Gad an gens fi’im Krais.’

²⁷ Wi nuo fi shuor se a so it go, kaaz Erad, Ponchos Pailat, piipl we a no Juu, an di Izrel piipl miit op iina da siti ya an plan fi kil Jiizas, yu sorvant we uoli.

²⁸ Dem kom tugeda fi du aal wa yu did don plan se wuda apm an it apm da wie de kaaz a yu powa an kaaz dat a wa yu did waahn fi apm.

²⁹ So Laad, luk pan ou dem a chretn wi! Elp yu sorvant dem fi pred yu mesij an no fried a notn.

³⁰ Yuuz yu powa an mek piipl beta. An mek wi yuuz di niem a yu sorvant Jiizas fi du som powaful mirikl an som sain.”

³¹ Afta dem don prie, di ous we dem did a miit get shiek op. Di Uoli Spirit tek kanchuol a dem an mek dem priich Gad wod an no fried a notn.

³² Aal a di piipl we biliiv iina Jiizas a did wan iina dem aat an main. Nobadi neva se, ‘Notn mi av a fi mi wan.’ Bot dem shier aal wa dem av mongks dem wan aneda.

³³ Di apasl dem kip aan tel piipl iina wan powaful wie bout ou Jiizas kom bak alaiv, an ou Gad shuo dem nof nof lov, iivn duo dem no dizorv it.

³⁴ Non a di piipl we biliiv iina Jiizas neva shaat a notn, kaaz di wan dem we av lan an ous wuda sel dem an kyari di moni we dem get

³⁵ kom gi di apasl dem. Di apasl dem wuda shier it op gi evribadi bies pan wa dem niid.

³⁶ So Juozif, wan man fram Saipros we elp tek kier a Gad ous, an we di apasl dem kaal Baanabas (Baanabas miin Bwai pikni we push piipl fi gwaan chos iina Gad),

³⁷ sel piis a lan we im did av an kyari di moni kom gi di apasl dem fi shier op.