Read Jamaican Patois Aks 5 Bible Online

Aks 5 - Jamaican Patois bible

Aks 5

¹ Nou yu did av wan man an im waif niem Ananaiyas an Sofaira. Dem did sel piis a lan we dem did av.

² Im mek op im main fi kip bak som a di moni we im get fi di lan, an im waif did nuo bout it tu. Im kyari di res a di moni go gi di apasl dem.

³ Den Piita aks im se, “Ananaiyas, ou kom yu mek Sietan tek kanchuol a yu an mek yu lai tu di Uoli Spirit? Yu kip bak som a di moni fi yuself, an kom a gwaan laik se yu a gi evriting?

⁴ Tel mi sopm, di lan a no did fi yu bifuo yu sel it? An afta yu sel it, di moni a did fi yu an yu kuda du eniting we yu did waahn fi du wid it. So wa mek yu tingk yu did afi lai? A no piipl yu lai tu, a Gad yu lai tu.”

⁵ Wen Ananaiyas ier dem wod de im jrap dong ded siem taim. An evribadi we ier we apm kech dem fried.

⁶ So di yong man dem komiin kom rap op im badi an kyari im out go beri im.

⁷ Bout chrii owa lieta im waif kom iin tu, bot shi neva nuo wa did apm.

⁸ So Piita aks ar se, “Tel mi sopm, dis a aal a di moni yu an yu ozban sel di lan fa?” Shi se, “Yes! A aal a di moni dat we wi get fi’it.”

⁹ Piita se tu ar se, “Mek di tuu a unu mek op unu main fi si ef unu kuda lai tu di Laad Spirit an no get ponish? Luk! Di man dem we beri yu ozban tan op a di duor, an dem a kom fi yu fi go beri yu tu.”

¹⁰ Siem taim shi jrap dong a im fut an ded. Den di yong man dem kom iin kom fain ar ded an dem kyari ar out go beri ar saida ar ozban.

¹¹ Evribadi iina di choch an evribadi we ier bout dem sitn ya kech dem fried.

¹² Di apasl dem mek nof sain an mirikl apm mongks di piipl dem. An di uol a dem mek op dem main fi miit op tugeda pan Salaman Puoch.

¹³ Nobadi we neva paat a dem gruup did mad inof fi go jain dem, iivn duo aal a di piipl iina Jeruusilem taak gud bout dem.

¹⁴ Bot muor an muor piipl biliiv iina di Laad an jain dem gruup, uol iip a man an uman.

¹⁵ Siek-a aal wa did a apm, piipl kyari out dem sik kom pudong iina di ruod pan dem chrecha so dat iivn Piita sheda kuda faal pan dem.

¹⁶ Kroud an kroud a piipl kom fram di toun dem roun Jeruusilem. Dem kyari dem sik piipl an piipl we diiman spirit did tek set pan kom a di apasl dem an aal a dem get beta.

¹⁷ Den di liida fi di priis dem an di Sadyusii dem we did a fala im did wel beks kaaz evribadi did api wid di apasl dem.

¹⁸ So dem ares di apasl dem an put dem iina di prizn we aal kain-a bad piipl de.

¹⁹ Bot iina di nait wan a di Laad ienjel dem uopm di prizn duor an let out di apasl dem. Di ienjel se,

²⁰ “Go tan op iina di yaad we Gad ous de an tel di piipl dem evriting bout da nyuu wie ya fi liv.”

²¹ Wen die lait dem go iina di yaad we Gad ous de, siem laik ou di ienjel did tel dem fi du, an staat tiich di piipl dem. Wen di liida fi di priis dem an im falara dem riich, im kaal tugeda aal a di Juu liida dem fi wan miitn. Den im sen som suoja tu di prizn fi kyari di apasl dem kom infronta dem.

²² Bot wen di afisa dem riich a di prizn, dem neva fain di apasl dem. So dem go bak go tel dem se,

²³ “Wi fain di prizn lak op tait tait an di gyaad dem tan op a di duor, bot wen wi uopm di duor, wi no fain nobadi at aal.”

²⁴ Wen di ed gyaad fi Gad ous an di ed priis ier dem sitn de, dem shak, an staat wanda bout wa wuda kom out a aal a dis.

²⁵ Den sumadi kom tel dem se, “Lisn! Di man dem we unu did put iina prizn, mi si dem tan op iina di yaad we Gad ous de a tiich di piipl!”

²⁶ So di ed gyaad an di afisa dem go fi di apasl dem. Bot dem neva rof dem op ar notn, kaaz dem did fried se di piipl wuda stuon dem.

²⁷ Afta di ed gyaad fi Gad ous kyari iin di apasl dem, dem aada dem fi tan op infronta di liida dem, an di liida fi di priis dem kwestiyan dem.

²⁸ Im se tu dem se, “Wi neva aada unu chrang chrang se unu no fi tiich nobadi bout di sitn dem we da man de niem Jiizas se unu fi tiich? Bot luk wa unu du. Unu ful op Jeruusilem wid di sitn dem we im tiich. An no onggl dat, unu chrai put fi’im blod pan wi an dem an se a wi kil im.”

²⁹ Bot Piita an di ada apasl dem se tu dem se, “Wi afi du we Gad se wi fi du, bot wi no afi du wa piipl se wi fi du.

³⁰ Unu niel op Jiizas pan di kraas an kil im, bot di Gad fi fi wi faada faada dem, im mek im kom bak alaiv.

³¹ Gad big op Jiizas an put im fi sidong a im rait an. Im mek Jiizas wan liida an di wan we a-go siev piipl so dat di Izrel piipl wuda get di chaans fi ton we fram dem sin, shuo se dem sari, an get dem sin paadn.

³² Wi a tel piipl bout dem sitn ya we wi nuo, an di Uoli Spirit we Gad gi tu aal uu du we im se, im a tel piipl bout dem sitn ya tu.”

³³ Wen di Juu liida dem ier dem sitn de, dem get beks til dem blod staat bwail an dem redi fi kil di apasl dem.

³⁴ Bot wan Farisii niem Gyamieliyel, wan a di Laa tiicha dem we evribadi rispek, tan op iina di miitn infronta aal a di liida dem an aada dem fi put di apasl dem outa duor likl bit.

³⁵ Afta dat im se tu di ada liida dem, “Mi breda aal a wi a Izrelait. Nou ier wa mi a se, unu beta main wa unu bout fi du tu dem man ya.

³⁶ Kopl ier bak wan man niem Tuodos shuo op an staat tel piipl bout ou im a wan powaful liida an bout fuo onjrid man did jain op wid im. Bot dem kil im, an aal a im falara dem skyata aal uova di plies an a so dat did don.

³⁷ Afta dat wen di govament did a rait dong evribadi niem fi si umoch piipl did iina di konchri, Juudas we kom fram Gyalalii go gens di govament an get som piipl fi jain op wid im. Dem kil im an aal a im falara dem skyata tu.

³⁸ So ier mi, wen it kom tu dem man ya lef dem, no du notn fi ort dem. Kaaz ef di sitn we dem plan an di wok we dem a du, ef a man kom op wid dem, it naa kom tu notn.

³⁹ Bot ef a Gad a gi dem powa fi du wa dem a du, unu kyaahn tap dem; unu wuda fain se unu onggl a fait gens Gad.” Im get dem fi lisn an du wa im se

⁴⁰ an dem kaal iin di apasl dem an mek di suoja dem biit dem. Den dem aada dem se, “No taak tu di piipl an yuuz Jiizas niem eva agen!” Afta dat dem let dem go.

⁴¹ So di apasl dem lef di miitn wel api kaaz Gad did tingk dem gud inof fi mek dem sofa fi Jiizas Krais.

⁴² An evridie di apasl dem go a di yaad we Gad ous de an iina piipl ous go tiich an priich di Gud Nyuuz se Jiizas a di wan we Gad sen fi siev piipl.