Read Jamaican Patois Aks 6 Bible Online

Aks 6 - Jamaican Patois bible

Aks 6

¹ Iina dem die de, di gruup a piipl we biliiv iina Jiizas did a gruo muo an muo. Di uman dem we a Juu an we taak di Griik langwij uufa ozban dem did ded, staat mombl anda di kwaiyat gens di uman dem we a Juu we onggl taak di Juu langwij an uufa ozban dem did ded tu. Dem did a mombl se dem neva did a get fi dem shier a di moni an fuud we dem did fi get a die taim.

² So di twelv apasl dem kaal wan miitn wid aal a di piipl we biliiv iina Jiizas fi saat out di mata. Dem se tu dem se, “It wudn rait fi wi tap pred Gad mesij bout Jiizas fi go shier op moni an fuud fi di uman dem we ozban ded.

³ So breda an sista unu pik sevn man fram mongks unu. Evribadi mos si se dem mek di Uoli Spirit kanchuol dem laif an dem wel waiz. Wi wi put dem inchaaj a da wok ya,

⁴ an fi wi wok wi bi fi prie an pred Gad mesij bout Jiizas.”

⁵ Aal a di piipl dem we did biliiv iina Jiizas did api fi du wa di apasl dem did se dem fi du. So dem pik Stiivn, wan man we biliiv iina Gad nof nof an we di Uoli Spirit kanchuol. An dem pik Filip, Prakoros, Nekenor, Timon, Paaminas, an Nikolas we did ton wan Juu an we did kom fram Antiyak.

⁶ Dem put dem man ya fi tan op infronta di apasl dem an dem put dem an pan dem ed an prie fi dem.

⁷ Gad mesij bout Jiizas pred muo an muo, an muo an muo piipl biliiv iina Jiizas an wan uol iip a di priis dem biliiv di Gud Nyuuz tu.

⁸ Stiivn a did wan man we Gad did a yuuz fi du som powaful mirikl an sain mongks di piipl.

⁹ Bot yu did av som man we kom fram di Choch fi di Piipl we get Frii (kaaz a so dem kaal demself). Som a dem kom fram Sairiin, Aligzanjriya, Silisiya an Iezha. Dem man ya staat fi aagyu wid Stiivn,

¹⁰ bot dem fain se dem kudn manij im, kaaz di Spirit did mek im wel waiz an tel im aal wa im fi se.

¹¹ So anda di kwaiyat dem get som man fi tel lai pan Stiivn se, “Wi ier da man ya se som torbl sitn bout Muoziz an bout Gad.”

¹² So dem rail op di piipl, di elda dem an di Laa tiicha dem. Dem ron dong pan Stiivn, grab im an jrag im go a di plies we di liida dem miit an mek im tan op infronta dem.

¹³ Dem kyari iin som man fi tel lai pan Stiivn. Dem se, “Da man ya no tap taak torbl sitn gens da plies ya we uoli, an gens di Laa we Gad gi Muoziz fi gi wi.

¹⁴ Wi ier im se di wan Jiizas we kom fram Nazaret a-go mash dong da plies ya an mek wi liv difrant fram ou Muoziz tel wi faada faada dem fi liv.”

¹⁵ Evribadi we did a sidong iina di plies we dem miit faasn dem yai pan Stiivn an si se im fies did a shain laik wan ienjel.