Read Jamaican Patois Aks 7 Bible Online

Aks 7 - Jamaican Patois bible

Aks 7

¹ Den di liida fi di priis dem aks Stiivn se, “Dem sitn ya we dem a se bout yu, dem a chuu?”

² Stiivn ansa an se, “Aal a unu we a mi breda an mi faada, lisn we mi a se! Di Gad we av im brait brait lait a shain roun im, shuo imself tu wi faada Iebriyam wen Iebriyam did stil a liv iina Mesopotiemiya. Dat a did bifuo im muuv go liv a Ieran.

³ Gad tel im se, ‘Lef yu konchri an yu fambili an go tu di konchri we mi a-go tel yu fi go.’

⁴ “So im lef im konchri Kaldiya an go liv a Ieran. Afta im faada ded, Gad sen im kom a da konchri ya we unu a liv nou.

⁵ Gad neva gi im no lan iina di konchri, no iivn wan likl piis we im kuda kaal fi’im uon. Bot Gad did pramis fi gi di uol a it tu im an im pikni dem wan die. Wen Gad did mek da pramis de Iebriyam neva av no pikni.

⁶ Gad se tu Iebriyam, ‘Yu pikni dem a-go liv laik chrienja iina wan konchri we a no fi dem. Di piipl we ruul da konchri de a-go tek dem ton sliev an dem a-go sofa fi fuo onjrid ier.

⁷ Bot mi a-go ponish di piipl we tek dem ton sliev, an afta dat dem a-go lef da konchri de an kom worship mi rait ya-so.’

⁸ Den Gad aada Iebriyam fi get sorkomsaiz an fi sorkomsaiz aal a di man dem iina im fambili fi shuo se dem bilang tu Gad. So iet die afta Aizak baan, Iebriyam sorkomsaiz im. Wen Aizak bwai pikni, Jiekob baan, Aizak sorkomsaiz im, an wen Jiekob twelv bwai pikni dem baan, im sorkomsaiz dem tu. A dem twelv de a wi faada faada dem.

⁹ “Kaaz wi faada faada dem did bad main gens Juozif, dem sel im tu som man we tek im go ton sliev dong a Iijip. Bot Gad did de wid im

¹⁰ an siev im outa aal a im chobl. Im mek im waiz an mek Fiero, di King a Iijip spirit tek im. So Fiero pik im fi ruul uova Iijip, an di uol a im palis.

¹¹ “Den staavieshan tek Iijip an Kienan, an kaaz uol iip a piipl fi sofa, an wi faada dem kudn get no fuud.

¹² Wen Jiekob ier se fuud de a Iijip, im sen wi faada dem dong de fi di fos taim fi go bai fuud.

¹³ Wen dem go bak dong de di sekan taim, Juozif mek im breda dem nuo uu im bi, an Fiero get fi nuo bout Juozif fambili.

¹⁴ Afta dat, Juozif sen fi’im faada Jiekob an im uol fambili, aal sevnti-faiv a dem.

¹⁵ So Jiekob imself go dong a Iijip, an im an wi faada faada dem liv dong de til dem ded.

¹⁶ Lieta dem muuv dem badi go beri dem iina di griev we Iebriyam did bai a Shekem. Iebriyam did bai da piis a lan de fram Iemuor bwai pikni dem.

¹⁷ “Wen di taim did nier fi Gad du wa im did pramis Iebriyam, di piipl iina Iijip did get nofa an nofa

¹⁸ til di taim wen wan neks king we neehn nuo notn bout Juozif staat ruul uova Iijip.

¹⁹ Im tek advaantij a wi faada faada dem an mek dem sofa. Im fuos dem fi fling out dem likl pikni dem outa dem ous so dem wuda ded.

²⁰ “Roun dem taim de Muoziz did baan. Im a did wan priti-priti biebi. Im faada an mada did av im iina dem ous a tek kier a im fi chrii mont.

²¹ Wen dem did afi put im outa di ous, Fiero daata fain im an tek im fi ar uona pikni an gruo im op.

²² Dem tiich Muoziz aal a di waiz sitn dem we di Iijip piipl dem nuo an im ton wan big impuotant man we se an du som big impuotant sitn.

²³ “Wen Muoziz ton faati ier uol, im mek op im main fi go luk fi fi’im piipl, di Izrel piipl dem.

²⁴ An wen im si wan a dem a get biit op fi no riizn im ron go elp im an kil di Iijip man we did a biit im op.

²⁵ Muoziz tingk se fi’im uona piipl wuda andastan se Gad did a yuuz im fi tek dem outa dem sofarieshan, bot dem neva andastan.

²⁶ Di neks die Muoziz si tuu Izrel man a fait. Im chrai fi paat dem an se tu dem se, ‘Luk man, di tuu a unu a breda, so wa unu a fait fa?’

²⁷ “Bot di man we did a biit op di ada wan push we Muoziz an se, ‘Uu mek yu ruula an joj uova wi?

²⁸ A kil yu waahn kom kil mi laik ou yu kil di Iijip man yeside?’

²⁹ Wen Muoziz ier wa di man se, im ron we go a Midiyan go liv an ton farina an get tuu bwai pikni de.

³⁰ “Afta faati ier did paas, Muoziz did iina di dezot nier mount Sainai we wan ienjel kom tu im iina wan bush we did de pan faiya.

³¹ Wen Muoziz si’it im shak. So wen im go nier fi go si wa riili did a gwaan im ier di Laad vais.

³² Di Laad se, ‘Mi a di Gad fi yu faada faada dem, di Gad fi Iebriyam, Aizak an Jiekob.’ Muoziz did so fried im staat fi chrimbl an im kudn luk pan di bush no muor.

³³ “Den di Laad se tu im, ‘Tek aaf yu slipaz dem; yu a tan op pan uoli grong.

³⁴ Mi luk an mi si ou mi piipl dem iina Iijip a sofa. Mi ier ou dem a gruon, so mi kom dong fi frii dem. So kom, mi a-go sen yu bak dong a Iijip.’

³⁵ “A da siem Muoziz ya dem did ton dem bak pan wen dem se, ‘A uu mek yu wan ruula an wan joj?’ A im siem wan Gad sen tu dem fi ruul dem an fi frii dem wid di elp a di ienjel we did taak tu im fram di bush.

³⁶ Im liid dem outa Iijip. An im du som powaful mirikl an sain iina Iijip, a di Red Sii an iina di dezot fi faati ier.

³⁷ “Dis a di siem Muoziz we tel di Izrelait dem se, ‘Gad a-go sen unu wan prafit jos laik mi fram mongks unu uona piipl.’

³⁸ Da siem Muoziz ya did de de wid di Izrel piipl we did gyada op iina di dezot. Im did de de wid wi faada faada dem an wid di ienjel we did taak tu im pan Mount Sainai. An a im did get Gad wod, di Wod we laas fi eva, an a im kyari it kom gi wi.

³⁹ “Bot wi faada faada dem mek op dem main se dem naa du wa im se dem fi du. Insted-a dat, dem push im wan said an staat wish iina dem aat fi go baka Iijip.

⁴⁰ Dem se tu Ieran, ‘Bil op som gad fi wi we wi kyan kyari infronta wi, kaaz di wan Muoziz, di wan we liid wi outa Iijip, wi no nuo wa apm tu im!’

⁴¹ A da taim de dem did mek di faalz gad we luk laik wan bulkou. Dem bon sakrifais gi it, an dem did wel api wid di sitn wa dem mek wid dem uona an.

⁴² Bot Gad ton we fram dem an lef dem fi worship di staar dem iina di skai. Dis a di siem ting wa rait dong iina di buk we di prafit dem rait: ‘Unu Izrel piipl a mi unu did kil animal an gi an bon sakrifais tu iina di dezot fi faati ier?

⁴³ Unu kyari di tent wich paat unu worship di faalz gad we niem Molak an unu kyari wid unu di staar fi fu’unu gad Riefan. An unu mek dem faalz gad de an unu worship dem. So mi a-go mek unu get kyari we go faar faar paas Babilan.’

⁴⁴ Iina di dezot wi faada faada dem did av wid dem di tent we shuo se Gad did de mongks dem. Gad did tel Muoziz fi mek it an im mek it siem laik ou Gad did shuo im.

⁴⁵ Lieta wi faada faada dem get di tent fram fi dem faada. Dem kyari it wid dem wen dem go wid Jashwa. Dem kyari it wid dem wen dem tek uova di konchri wich paat Gad did ron out di piipl dem bifuo di Izrelait dem riich. An di tent did de op tu di taim wen king Dievid did a ruul.

⁴⁶ Siek-a ou Dievid liv, Gad did api wid im. Dievid beg Gad fi lou im fi bil op wan ous fi’im, wich paat aal a Jiekob piipl kyan worship im.

⁴⁷ Bot a Salaman bil wan ous fi Gad.

⁴⁸ Bot wi nuo se di Muos Ai Gad no liv iina ous we man mek. Wan a im prafit se:

⁴⁹ “Di Laad se, ‘Evn a mi chuon we mi ruul fram an di ort a mi fut stuul. So wa kain-a ous yu a-go bil fi mi? Ar wa kain-a plies unu kyan gi mi fi liv?

⁵⁰ No mi mek aal a dem sitn ya?’”

⁵¹ “Unu piipl, unu stoban, an aad-iez an no waahn lisn tu Gad mesij. Unu aat komiin jos laik di piipl dem we no biliiv iina Gad. Unu eva a-go gens wa di Uoli Spirit waahn, siem laik we unu faada faada dem did du!

⁵² Wich wan a Gad prafit dem fi unu faada faada dem neva mek sofa? Dem aal kil Gad mesinja dem we did tel dem fram wie bak wen se di wan we aalwiez du we rait did a kom. Bot unu sel im out an kil im.

⁵³ Iivn duo Gad sen im ienjel dem tu unu fi gi unu im Laa, unu naa du we im se.”

⁵⁴ Wen di Juu liida dem ier dis dem beks wid im so til dem staat grain dem tiit.

⁵⁵ Bot di Uoli Spirit tek kanchuol a Stiivn. Im faasn im yai op iina di skai an si Gad brait brait lait iina evn an Jiizas tan op a Gad rait-an-said.

⁵⁶ Im se “Luk! Mi si evn uopm op an di Man we Gad pik tan op a Gad rait-an-said.”

⁵⁷ Wen dem ier dat, dem baal out pan tap a dem vais, kova op dem iez, an di uol a dem ron dong pan im wan taim.

⁵⁸ Dem ron im outa di siti an staat stuon im. An di wan dem we did a stuon im pudong dem kluoz a di fut a wan yong man we niem Saal.

⁵⁹ Wen dem did a stuon im, Stiivn prie an se, “Laad Jiizas, mi put mi spirit iina yu an.”

⁶⁰ Den im jrap pan im nii an kaal out, “Laad, no uol da sin ya gens dem.” Afta im se dat im ded.